مىنە, قالادا بىرنەشە جىل بويى «ءشوپ تامىرى» اتتى الەۋمەتتىك جوبا قولعا الىنعان. كۇنشىعىس ەلى 11 مەكتەپكە قارجىلاي كومەگىن جاساپ, ەسىك-تەرەزەلەرىن جاڭارتىپ بەردى. جاپونيانىڭ قازاقستانداعى توتەنشە جانە وكىلەتتى ەلشىسى تاتسۋحيكو كاساي اكىممەن كەزدەسۋدەن كەيىن قالاداعى ءۇش مەكتەپتى ارالادى. «ءشوپ تامىرى» جوباسى بويىنشا جاپونيا ەلى سەمەيدەگى №23 مەكتەپتە 195 تەرەزە جاقتاۋىن جاڭالاپ بەردى. ال № 25 مەكتەپتە 209, №3 مەكتەپتە 241 تەرەزە جاقتاۋى جاڭادان ورناتىلدى.
- ءبىز قازاق ەلىن قاتتى قۇرمەتتەيمىز, جاقسى كورەمىز, - دەدى ەلشى تاتسۋحيكو كاساي, - 22 جىلدىق ارىپتەستىگىمىزدە «ءشوپ تامىرى» جوباسى بويىنشا قازاقستاندا 100 الەۋمەتتىك جوبانى قولعا الىپ, ورىنداپ شىقتىق. ونىڭ ىشىندە 24 جوبا - شقو-دا. ال سەمەي ارقاشان ءبىزدىڭ نازارىمىزدا بولماق.
قالالىق ءبىلىم ءبولىمىنىڭ باستىعى ناتاليا فەسەنكونىڭ ايتۋىنشا, «ءشوپ تامىرىنىڭ» ءبىر جوباسىنا كىرگەن №3 جالپى ورتا ءبىلىم بەرەتىن مەكتەپ-كەشەنىنىڭ قابىرعاسى 1977 جىلى قالانىپ, پايدالانۋعا بەرىلگەن. سودان بەرى تەرەزەلەرى كۇردەلى جوندەۋدى قاجەت ەتتى. قازىرگى تاڭدا 820 وقۋشى ءبىلىم الىپ, تاربيەلەنۋدە.
بۇدان كەيىن قۇرمەتتى قوناق تاتسۋحيكو كاساي مىرزاعا باستاۋىش سىنىپ وقۋشىلارى وزدەرىنىڭ ۇستازدارىمەن بىرگە جاساعان قولونەر ەڭبەكتەرىن كورسەتتى. ال جوعارى سىنىپ وقۋشىلارى ءىت تەحنولوگيا مەن روبوتوتەحنيكانى قانشالىقتى مەڭگەرگەندىكتەرىن ايتىپ, بىلىمدەرىن پاش ەتتى. ەلشى مىرزا بارلىعى دا بولاشاعىنان زور ءۇمىت كۇتتىرەتىن جاستار دەپ, ارقايسىسىنىڭ قولدارىن قىستى. №3 مەكتەپ ديرەكتورىنىڭ وقۋ-تاربيە ءىسى جونىندەگى ورىنباسارى ايگۇل سەمباەۆا جاپون ەلشىسىنە العىس حات تابىستاپ, تەرەزەدەن كەلەتىن جارىق پەن جىلۋدىڭ ناتيجەسىندە بيىل بالالاردىڭ دا دەنساۋلىعى جاقسارعاندىعىن اتاپ ايتتى.
مەكتەپ ديرەكتورىنىڭ ادىستەمەلىك جۇمىس جونىندەگى ورىنباسارى سۆەتلانا وسپانوۆا بيىل جۇرگىزىلگەن مونيتورينگ بويىنشا وقۋشىلاردىڭ وقۋعا دەگەن, ەڭبەك, تەحنولوگيا, سۋرەت ساباقتارىنا دەگەن قىزىعۋشىلىعى ارتقاندىعىن اتاپ ءوتىپ, جاپون حالقى سوزگە بەرىك, ىسكە ادال ەكەن دەپ رازىلىعىن ءبىلدىردى. جانە وقۋشىلاردىڭ قولونەر تۋىندىلارىنان جاسالعان كورمەنى تانىستىردى. №3 مەكتەپ ديرەكتورىنىڭ وقۋ ءىسى جونىندەگى ورىنباسارى الماگۇل امانتايقىزىنىڭ جەتەكشىلىگىمەن باستاۋىش سىنىپ وقۋشىلارى قازاقتىڭ ۇلتتىق بيلەرىنەن, اندەرىنەن كورىنىس كورسەتىپ, كىشكەنتاي سابيلەردىڭ بارلىعى ەلشى مىرزامەن بىرگە ەستەلىك سۋرەتكە ءتۇستى.
راۋشان نۇعمانبەكوۆا,
«ەgemen Qazaqstan»