ۇلتتىق بانك ەلىمىزدىڭ سىرتقى بورىشىنىڭ كولەمىن جاريالادى

2019 جىلعى 1 قاڭتارداعى جاعداي بويىنشا قازاقستان رەسپۋبليكاسىنىڭ سىرتقى بورىشى 158,8 ملرد اقش دوللارى نەمەسە ءىجو-گە قاتىناسى 93,1% (جىل باسىنان باستاپ 9,5%-عا جاقساردى) قۇرادى. سىرتقى بورىش قۇرىلىمىندا 63,6%-ىن بۇرىنعىسىنشا فيرماارالىق بەرەشەك, 25,0% بايلانىستى ەمەس كرەديتورلار الدىنداعى «باسقا سەكتورلاردىڭ» سىرتقى بورىشى, 7,8% مەملەكەتتىك سىرتقى بورىش (ۇكىمەت پەن ۇلتتىق بانك), 3,6% - «بانكتەر» سەكتورىنىڭ سىرتقى مىندەتتەمەلەرى (ەدب جانە «قازاقستاننىڭ دامۋ بانكى» اق) الىپ وتىر. 2018 جىلعى 4-توقساندا ەكونوميكانىڭ بانكتىك ەمەس سەكتورى مىندەتتەمەلەرىنىڭ ازايۋى ەسەبىنەن ەلدىڭ سىرتقى بورىشى 2,5 ملرد اقش دوللارىنا قىسقاردى. مەملەكەتتىك سىرتقى بورىشتىڭ جالپى سوماسى 1,05 ملرد ەۋرونى قۇرايتىن 5 جانە 10 جىلدىق تاۋەلسىز ەۋرووبليگاتسيالاردىڭ ەكى ترانشىن شىعارۋ ەسەبىنەن 899,1 ملن اقش دوللارىنا ءوستى. «بانكتەردىڭ» سىرتقى مىندەتتەمەلەرى توقسان ىشىندە وزگەرمەدى, سەبەبى بەيرەزيدەنتتەردىڭ قولىنداعى ەۋرووبليگاتسيالار كولەمىنىڭ ازايۋى ولاردىڭ قازاقستاندىق بانكتەردەگى دەپوزيتتەرىنىڭ وسۋىمەن وتەلدى. «باسقا سەكتورلاردىڭ» ۇلەستەس ەمەس كرەديتورلار الدىنداعى سىرتقى بورىشى 1,6 ملرد اقش دوللارىنا ازايدى, ول, نەگىزىنەن, قارىزداردى وتەۋ ەسەبىنەن, ونىڭ ىشىندە ERG توبى كاسىپورىندارىنىڭ مىندەتتەمەلەرىن قايتا قارجىلاندىرۋ (963 ملن اقش دوللارىنا ازايۋ), «قازمۇنايگاز» ۇك» اق-تىڭ «سبەربانك روسسي» پاو الدىنداعى (371 ملن اقش دولل.) جانە «قازتەمىرترانس» اق-تىڭ ەقدب الدىنداعى قارىزدارىن وتەۋ ەسەبىنەن ورىن الدى. فيرماارالىق بەرەشەك ءىرى كەن ءوندىرۋشى جانە كولىكتىك كومپانيالاردىڭ شەتەلدىك تەل ۇيىمداردان تارتىلعان نەسيەنى وتەۋى ناتيجەسىندە 1,8 ملرد اقش دوللارىنا قىسقاردى. تالدامالىق ماقساتتا سىرتقى بورىش قۇرىلىمىندا ەسەپتى كەزەڭدە 1,2 ملرد اقش دوللارىنا ازايىپ, 2019 جىلعى 1 قاڭتاردا 22,8 ملرد اقش دوللارىن قۇرعان مەملەكەت باقىلايتىن ۇيىمداردىڭ سىرتقى بورىشى (مەملەكەتتىك سەكتور كاپيتالىنا 50%-دان استام تىكەلەي نەمەسە جاناما قاتىساتىن بانكتەر مەن ۇيىمدار) جەكە كورىنەدى. قازاقستان رەسپۋبليكاسىنىڭ تازا سىرتقى بورىشى 2018 جىلعى 4-توقساندا 560,5 ملن اقش دوللارىنا ازايىپ, 47,2 ملرد اقش دوللارىن قۇرادى. بۇل رەتتە مەملەكەتتىك سەكتور جانە «بانكتەر» قالعان الەمگە قاتىستى تازا كرەديتورلار بولىپ, ال «باسقا سەكتورلار» تازا قارىز الۋشىلار بولىپ تابىلادى.