وتاندىق سپورتشىلارعا قولداۋ كورسەتىپ, الەمگە تانىتۋدى ماقسات ەتكەن بۇل پروموۋتەرلىك كومپانيا وتكەن جىلى قۇرىلعان. از ۋاقىتتىڭ ىشىندە اقش-تىڭ ءىرى پروموۋتەرلىك كومپانيالارىمەن ىسكەرلىك بايلانىس ورناتقان «SULEIMEN Promotions»-ءتىڭ قۇرامىندا ايدوس ەربوسىن ۇلى, نۇرسۇلتان جاڭاباەۆ سەكىلدى شارشى الاڭنىڭ شەبەرلەرى بار. جاقىندا الماتىدا كاسىبي بوكس كەشىن جوعارى دارەجەدە ۇيىمداستىرعان ۇجىم بۇل باستامانى اتىراۋدا جالعاستىرۋدى جوسپارلاپ وتىر.
- جاستار اراسىندا كاسىبي بوكستى دامىتىپ, ناسيحاتتاۋ باعىتىندا پروموۋتەرلىك كومپانيامەن كەلىسىم-شارتقا وتىردىق,-دەيدى وبلىستىق دەنە شىنىقتىرۋ جانە سپورت باسقارماسىنىڭ باسشىسى رينات يبراگيموۆ. –بولاشاعىنان ءۇمىت كۇتتىرەتىن جاستار بار. ەندى تالاپتى سپورتشىلارعا شەتەلگە بارىپ, پروموۋتەرلەرمەن بايلانىس ورناتۋدىڭ قاجەتى بولمايدى, وسى كەلىسىم-شارت ارقىلى بالالار كاسىبي بوكسشىلاردان تىكەلەي ءتالىم الادى.
كومپانيا قۇرامىنداعى بىلعارى قولعاپ شەبەرلەرى ايدوس ەربوسىن ۇلى مەن نۇرسۇلتان جاڭاباەۆ اتىراۋلىق جاس سپورتشىلارعا شەبەرلىك ساعاتتارىن وتكىزىپ, جاتتىعۋلارىنا قاتىسادى. العاشقى كەزدەسۋ ماحامبەت اۋدانىنداعى بالالار مەن جاسوسپىرىمدەر سپورت مەكتەبىندە ءوتتى. «مەن العاش بوكس ۇيىرمەسىنە 15 جاسىمدا كەلدىم. قازىر بۇكىلالەمدىك بوكس اسسوتسياتسياسى (WBA) رەيتينگىندە 10 ورىندا تۇرمىن. بار بىلگەنىمدى ۇيرەتۋ-بورىشىم. بالالاردىڭ سپورتقا دەگەن قىزىعۋشىلىقتارىن كورىپ, قۋانىپ تۇرمىن. ءبىزدىڭ قولىمىزدان كەلەدى»,-دەيدى نۇرسۇلتان جاڭاباەۆ.
شەبەرلىك ساعاتتارى وبلىس ورتالىعىنداعى مامانداندىرىلعان بوكس كلۋبىندا وتەدى.
اتىراۋ