وسى سەميناردا ايتىلعانداي, ەلىمىزدىڭ اۋىل شارۋاشىلىعىندا قولدانىلاتىن ءادىس-تاسىلدەر جاڭا تەحنولوگيالاردىڭ كومەگىمەن كۇشەيە تۇسپەك. مىسالى, وسىمدىك شارۋاشىلىعىنداعى دالمە-ءدال ەگىنشىلىك – وسى سالاداعى شارۋاشىلىقتار يگەرۋگە ءتيىس ماڭىزدى تاسىلدەردىڭ ءبىرى. سەمينارعا ارنايى اقمولا, قاراعاندى, سولتۇستىك قازاقستان وبلىستارىنان اوك بيزنەس وكىلدەرىنىڭ كەلۋ سەبەبى دە وسى. ولار ەلورداداعى قازاق اگروتەحنيكالىق ۋنيۆەرسيتەتى قابىرعاسىندا زەرتتەۋمەن شۇعىلداناتىن عالىمداردىڭ دارىسىنە قاتىسىپ, ورتاق ماسەلەلەردى تالقىلاۋعا مۇمكىندىك الدى. بىلىكتى دە ءبىلىمدى دارىسكەرلەر فەرمەرلەرگە, بيزنەسمەندەرگە تىڭ تەحنولوگيالاردىڭ, جاڭا يدەيالاردىڭ جاي-جاپسارىن, جاڭا تەحنيكالاردىڭ ارتىقشىلىقتارىن ايتىپ, جۇمىس ونىمدىلىگىن ارتتىرۋدىڭ جولدارىن كورسەتتى.
– بۇل سەميناردان القاپتاردا كەزدەسەتىن اۋرۋلاردىڭ الدىن الۋ جانە زيانكەستەرمەن كۇرەس ادىستەرى, داقىلداردىڭ ونىمدىلىگىن ارتتىرۋ تاسىلدەرى, جايىلىمداردىڭ ەلەكتروندىق كارتاسىن جاساۋ دەگەن سەكىلدى جاڭا اقپاراتتار الىپ جاتىرمىز. وسىنىڭ ارقاسىندا ششارۋاشىلىعىمىزدى دامىتۋ ءۇشىن ءبىلىمىمىزدى جەتىلدىرگىمىز كەلدى. كەيىن جۇمىسىمىزعا سەپتىگىن تيگىزەدى دەپ ويلايمىن, – دەيدى اتباسار اۋدانىنان كەلگەن «باستاۋ» جشس اگرانومى شۇعالوۆ ءساتباي.
بۇعان دەيىن مۇنداي سەمينار قاراعاندى, قوستاناي, اقتوبە, پەتروپاۆل سەكىلدى تاعى باسقا قالالاردا وتكىزىلدى. ءار ۇيىمداستىرىلعان ساباقتار وزەكتىلىگىمەن ەرەكشەلەنەدى. ويتكەنى القاپتاردى كارتوگرافيالاۋ نەگىزدەرىن وقىتۋ, اگروقۇرىلىمدار مونيتورينگىندە گەواقپاراتتىق جۇيەلەردى پايدالانۋ سەكىلدى تىڭ تاسىلدەر اۋىل شارۋاشىلىعىن وركەندەتۋ ىسىندە اسا قاجەت. اگروتەحنيكالىق ۋنيۆەرسيتەتىنىڭ وقىتۋشىلارى بۇل تاسىلدەردى سىناقتان وتكىزىپ تە ءجۇر.
– بىلتىر ءبىز درون پايدالانعانبىز. ەڭ الدىمەن عارىشتان الىنعان فوتولار ارقىلى ەگىس الاڭىن انىقتاپ, جاعدايىن تەكسەردىك. بەلگىلى ءبىر جەردە قانداي وزگەرىس بولىپ جاتقانىن, ءتىپتى قانداي ارام ءشوپ ءوسىپ, قانداي زيانكەستەر ەگىستىككە زاقىم كەلتىرىپ جاتقانىنا دەيىن ءبىلۋ ءۇشىن ۇشقىشسىز دروننىڭ كومەگىنە سۇيەندىك. دروننىڭ ءبىر جاقسىسى – قالاعان بيىكتەن باستاپ, ءبىر مەتر تومەندەتىپ تە قاراۋعا بولادى. مىسالى, 500 گا ەگىس الاڭىن ءبىر زەرتتەۋشى 5-6 ساعاتتا زەرتتەپ شىعا الادى. ول شارۋاشىلىقتا 10 000 - 15 000 گا جەر بولاتىن بولسا, وندا ەكى اي ۋاقىت ارناۋعا تۋرا كەلەدى. مەن ايتىپ وتىرعان قۇرىلعىلاردى پايدالانساڭىز 500 گا جەردى 10-15 مينۋتتىڭ ىشىندە زەرتتەي الاسىز. سول سەكىلدى ەكى-ءۇش كۇننىڭ ىشىندە 15 000 گا اۋماقتى باقىلاۋ قيىن ەمەس. ناقتى ەگىنشىلىك ءۇشىن مۇنىڭ ماڭىزى وراسان, - دەيدى «وسىمدىك قورعاۋ جانە كارانتين» كافەدراسىنىڭ وقىتۋشىسى سادىقوۆ بەكمىرزا.
فوتولاردى تۇسىرگەن اۆتور.