جاقسىنىڭ ۇشى-قيىرىنا جانارىڭ جەتپەيتىن جۋساندى, جالپاق دالاسىندا بەيىتتەر كوپ ۇشىراسادى. سوڭعى ۋاقىتتا ۇزىلىڭكىرەپ قالعانى بولماسا, ەل ىشىندەگى كونەكوز قاريالار ءار بەيىتكە جەرلەنگەن ادامنىڭ تاعدىرىن تاسقا باسقانداي ەتىپ ايتىپ وتىرار ەدى. مىنا ءبىر بەيىت ەل ىشىندە «قوس بەيىت» دەپ اتالادى. كەيبىرەۋلەر «شاتىرلى بەيىت» دەپ تە اتايدى. قالاي بولعان كۇندە دە, اڭىزى ورتاق, اقيقاتى بىرەۋ.
ەستە جوق ەسكى زاماندا الدىنا مال بىتپەگەن كەدەي جىگىت پەن وسى جالپاق دالادا مىڭعىرتىپ مال باعىپ, شاشاسىنان اسىپ توگىلگەن بايدىڭ قىزعالداقتاي قۇلپىرعان بويجەتكەن قىزى بىرگە جەرلەنگەن دەسەدى. كونەكوزدەردىڭ ايتۋىنا قاراعاندا, مالشى جىگىت قۇرىعىن سۇيرەتىپ مال باعىپ جۇرگەن كۇندەردىڭ ءبىر كۇنىندە اۋىزدىعىمەن الىسقان سايگ ۇلىك مىنگەن سۇلۋدى كورەدى. سىڭعىرلاپ كۇلگەنى قانداي! جانارىن جارق ەتكىزىپ, قاسىن سەرپىپ تاستاپ قاراعانى قانداي! جۋساندى دالادا ارمان قۋىپ جۇرگەن ءوندىر جىگىتتىڭ جۇرەگىنە وت تۇسكەندەي. ءبىر كورگەننەن عاشىق بولادى. دالانىڭ ەڭبەكپەن شىڭدالىپ وسكەن بوزبالاسىنا بويجەتكەن دە كەت ءارى دەمەپتى. تىلدەسە كەلە, ءبىرىن-ءبىرى ۇناتقان. كادىمگىدەي عاشىق بولعان. ەل ىشىندە اڭگىمە جاتا ما, سىپسىڭ ءسوز جىلانشا جورعالاپ اۋزىنان جالىنى شىعىپ تۇرعان قىز اكەسى – بايعا دا جەتەدى. جىگىتتىڭ ءوز باسىن كەم كورمەسە دە, كەدەي اۋلەت. جارىماعان تۇقىم. جارلىعا قىز بەرۋ, قىز بولعاندا دا جەلگە, كۇنگە تيگىزبەي الپەشتەپ باققان پەرزەنتىن ۇزاتۋدى نامىس كورەدى. ويلانىپ-تولعانا كەلە, مالشىسىنان قالايدا قۇتىلۋ قاجەت دەپ شەشەدى. ءبىرجولا قۇتىلۋدىڭ جالعىز جولى – ءولتىرۋ. جەندەتتەرىنە تاپسىرما بەرگەن. وكىنىشتىسى, جانالعىشتار بايدىڭ تاپسىرماسىن ورىنداعان كەزدە جىگىتپەن بىرگە بويجەتكەن وقىستان قازا تابادى. ءوزىنىڭ قاتەلىگىن كەش تۇسىنگەن باي بارماعىن تىستەپ, قىزىلدى-جاسىلدى بۇل دۇنيەدە باقىت بۇيىرماعان قىز بەن جىگىتتى جەر بەسىككە بىرگە بولەيدى.
قازىر بۇل جەر سۇيىسپەنشىلىك پەن مەيىرىمدىلىكتىڭ وتاۋى ءتارىزدى. ات تۇياعى جەتەتىن جەردەن جاستار كەلىپ ءمىناجات ەتەدى. جاقسى اۋدانىنىڭ اۋماعىنداعى وسى ءبىر قوس بەيىت باعزى زامانداعى ءبىر-بىرىمەن قوسىلا الماي ارماندا كەتكەن ەكى جاستان قالعان ماڭگىلىك بەلگى ىسپەتتى.
بايقال ءبايادىل,
«Egemen Qazaqstan»
اقمولا وبلىسى,
جاقسى اۋدانى