دارىگەر جول اپاتىنان زارداپ شەككەندەردىڭ جاعدايى جايلى ايتتى

«№2 اۋرۋحاناعا 29 زارداپ شەگۋشى جەتكىزىلدى, ونىڭ 14-ءى امبۋلاتورلىق جاعدايدا قارالدى, بارلىعىنا مەديتسينالىق كومەك كورسەتىلىپ, ۇيلەرىنە جىبەرىلدى. قازىر ستاتسيوناردا 13 ادام ەم قابىلداۋدا. ونىڭ سەگىزى ءتۇرلى جاراقاتپەن حيرۋرگيا بولىمىندە ەمدەلىپ جاتىر. ال ۇشەۋى جانساقتاۋ بولىمىندە جاساندى تىنىس الۋ قۇرالىنا قوسىلعان. ولاردىڭ جاعدايى اۋىر دەپ باعالانىپ وتىر. ەكى ناۋقاس توراكالدى حيرۋرگيا بولىمىندە», – دەپ مالىمدەدى  №2 قالالىق اۋرۋحانانىڭ باس دارىگەرى يۆان لي.

ونىڭ ايتۋىنشا, كەشەدەن بەرى ومىرىنە قاۋىپ تونگەن بەس ادامعا شۇعىل وپەراتسيا جاسالعان. تاعى قوسىمشا وپەراتسيالار جاساۋ كوزدەلۋدە.

قازىرگى تاڭدا بارلىق ناۋقاستىڭ جاعدايى تۇراقتى.

«وكىنىشكە قاراي, ءبىر ايەلدىڭ وڭ اياعىن ساقتاپ قالا المادىق. اياعىن امپۋتاتسيالاۋعا ءماجبۇر بولدىق. سول اياعى دا سىنعان, بىراق ءبىز وعان شينا سالدىق, الداعى ۋاقىتتا مەتاللووستەوسينتەز جاساپ, امان ساقتاپ قالامىز دەپ ويلايمىز. ەكىنشى ءبىر ايەلدىڭ ءبىر اياعى جول-كولىك وقيعاسى كەزىندە  كەسىلىپ كەتكەن, وعان دا كومەك كورسەتىپ جاتىرمىز. ازىرگە ونى امپۋتاتسيالامايمىز, مەتاللمەن ۇستايمىز. ناۋقاستار ۇزاق ۋاقىت بويى ءبىزدىڭ تراۆماتولوگيا ءبولىمىنىڭ بازاسىندا ەمدەلەتىن بولادى», – دەدى يۆان لي.

ەسكە سالا كەتەيىك, بۇگىن ەلوردا اكىمى باقىت سۇلتانوۆ پەن قر دەنساۋلىق ساقتاۋ ءمينيسترى ەلجان ءبىرتانوۆ كەشە ءىرى جول-كولىك وقيعاسىنىڭ سالدارىنان زارداپ شەككەن ازاماتتار ەم قابىلداپ جاتقان قالالىق №2 كوپبەيىندى اۋرۋحانادا بولىپ قايتتى.

اۋرۋحانانىڭ باس دارىگەرى يۆان لي قابىلداۋ, ينتەنسيۆتى تەراپيا, تراۆماتولوگيا جانە جانساقتاۋ بولىمدەرىنىڭ جۇمىسى تۋرالى ايتىپ بەردى. اۋرۋحاناداعى 3ن جۇيەسى (شۇعىلدىق ساناتىنا بايلانىستى ناۋقاستاردى سۇرىپتاۋ جۇيەسى) مەن اپاتتىق اقپارات قىزمەتى جۇيەسىنىڭ جۇمىسى كورسەتىلدى.