الماتىدا ارنايى جاساقتالعان مامانداردىڭ قاتىسۋىمەن «كوكتەم-2019» كوماندالىق-شتابتىق وقۋ-جاتتىعۋ شاراسى ءوتتى. جاۋاپتى قىزمەت وكىلدەرى وزدەرىنىڭ كوكتەمگى سۋ تاسقىنىنا دايىندىعىن تەكسەردى.
وقۋ-جاتتىعۋ جۇمىستارىنىڭ ناتيجەسىندە قارعالى وزەنىنىڭ الاتاۋ اۋدانى اۋماعىنا قاراستى 1,5 شاقىرىمى مۇزدان تازارتىلدى. ماماندار وزەنگە جاقىن ورنالاسقان ۇيلەرگە تونگەن قاۋىپ تولىقتاي سەيىلگەنىن ايتادى. وعان قوسا توتەنشە جاعدايدىڭ الدىن الۋ اياسىندا 50 شاقىرىم اۋماقتاعى قالا وزەندەرىنىڭ ارنالارى بەكىتىلگەن.
«ەكى جىلدا اتقارىلعان جۇمىستاردىڭ ارقاسىندا, 55 ۋچاسكىدە قاۋىپ جويىلدى. قازىر قالا بويىنشا 12 نۇكتە عانا قالىپ وتىر. ونىڭ التاۋى الاتاۋ اۋدانىندا, تورتەۋى جەتىسۋ اۋدانىندا ورنالاسقان. بۇگىنگى تاڭدا الاتاۋ اۋدانىنداعى 4 ۋچاسكىدە ارىق جۇيەسىن سالۋدىڭ جوبالىق قۇجاتتارى دايىن, تاعى ەكەۋى راسىمدەلۋ ۇستىندە», – دەيدى الماتى قالاسى تجد باسشىسىنىڭ ورىنباسارى ەرلان الىبەكوۆ.
الماتى قالاسىنىڭ بىرقاتار اۋدانى تاۋ شاتقالدارىنا جاقىن ورنالاسقاندىقتان, بۇل اۋماقتارداعى ساقتىق شارالارى بارىنشا كۇشەيتىلگەن.
ارمان وكتيابر,
«ەگەمەن قازاقستان»
الماتى