الماتىداعى تسيفرلىق فورۋمدا ەاەو ەلدەرىنىڭ تەحنوپاركتەرىنىڭ ىنتىماقتاستىعى مەموراندۋمىنا قول قويىلدى

فورۋمنىڭ ماقساتى — يننوۆاتسيالىق ەكوجۇيە ماسەلەلەرى بويىنشا بىلىممەن جانە تاجىريبەمەن الماسۋ ءۇشىن ءبىر قۇرىلىم اياسىندا ەاەو-عا مۇشە مەملەكەتتەردىڭ قىزمەتتەرىن بىرىكتىرۋ ارقىلى ەۋرازيا ايماعىنىڭ الەۋەتىن اشۋ. بۇل الاڭ ەۋرازيالىق ەكونوميكالىق وداقتىڭ 2025 جىلعا دەيىنگى تسيفرلىق كۇن ءتارتىبىن ىسكە اسىرۋدى كوزدەيتىن ماڭىزدى بىرلەسكەن قادام رەتىندە قارالادى. شاراعا بارلىعى 800-دەن استام حالىقارالىق ساراپشى, ەەك, بۇۇ, ەاەو ەلدەرىنىڭ, ەلشىلىكتەردىڭ وكىلدەرى قاتىستى.

پلەنارلىق سەسسياعا بەلارۋس رەسپۋبليكاسىنىڭ پرەمەر-ءمينيسترى — س. رۋماس, قىرعىز رەسپۋبليكاسىنىڭ پرەمەر-ءمينيسترى — م. ابىلگازيەۆ, رەسەي فەدەراتسياسىنىڭ پرەمەر-ءمينيسترى — د. مەدۆەدەۆ, ارمەنيا رەسپۋبليكاسىنىڭ ۆيتسە-پرەمەر-ءمينيسترى م. گريگوريان جانە ەۋرازيالىق ەكونوميكالىق كوميسسيا القاسىنىڭ توراعاسى ت. ساركيسيان قاتىستى. بۇدان وزگە, پىكىرتالاستارعا تسيفرلىق يننوۆاتسيالار سالاسىنداعى حالىقارالىق ساراپشىلار: تسيفرلىق ەكونوميكانى ترانسفورماتسيالاۋ جونىندەگى كەڭەسشى, مالايزيا تسيفرلىق ەكونوميكا كورپوراتسياسىنىڭ بۇرىنعى سەو ياسمين ماحمۋد, Big Innovation Centre باس ديرەكتورى بيرگيتتا اندەرسەن, LINAGORA نەگىزىن سالۋشى الەكساندر زاپولسكي, Tlabs CEO, Singularity University ەكونوميكا جانە قارجى فاكۋلتەتىنىڭ باسشىسى امين تۋفاني قاتىستى.

سەسسيا بارىسىندا ەاەو تسيفرلىق كۇن ءتارتىبىن ىسكە اسىرۋ جانە يننوۆاتسيالىق ەكوجۇيەنى دامىتۋ ءۇشىن, سونىڭ ىشىندە وداققا مۇشە مەملەكەتتەردىڭ تەحنوپاركتەرىن بىرىكتىرۋ مەن جاڭا تسيفرلىق جوبالاردى ىسكە قوسۋ ارقىلى كۇش-جىگەردى ودان ءارى بىرىكتىرۋ ماسەلەلەرى تالقىلاندى. شارا قاتىسۋشىلارى زاماناۋي تسيفرلىق ەكونوميكانى قۇرۋ سالاسىنداعى ەلدىك تاجىريبەلەرمەن ءبولىستى. يننوۆاتسيالار ەلدەرگە باسەكەگە قابىلەتتى, وزگەرىستەرگە بەيىمدەلگەن بولۋعا جانە ءومىردىڭ جوعارى دەڭگەيىن قامتاماسىز ەتۋگە مۇمكىندىك بەرەتىنى اتالىپ ءوتتى. وسىلايشا, يننوۆاتسيالار بۇگىندە كاسىپكەرلىكتى دامىتۋعا, بيزنەستى وسىرۋگە جانە جاڭا جۇمىس ورىندارىن قۇرۋعا نەگىز بولادى, سونداي-اق دەنساۋلىق ساقتاۋ, ەكولوگيا, ەنەرگەتيكا جانە ازىق-ت ۇلىك قاۋىپسىزدىگى سالالارىنداعى پروبلەمالاردى شەشۋگە كومەكتەسەدى.

باقىتجان ساعىنتاەۆ ءوز سوزىندە بارلىق يننوۆاتسيالار مەن تەحنولوگيالاردىڭ باستى ماقساتى ادامداردىڭ ءومىرىن جاقسارتۋ, ولاردىڭ جۇمىسى مەن وسۋىنە قولايلى جاعدايلار جاساۋ ەكەنىن اتاپ ءوتتى. قازىرگى تاڭدا قازاقستاندا مەملەكەتتىك قىزمەتتەردىڭ 60% ەلەكتروندى ۇكىمەت پورتالى ارقىلى ۇسىنىلادى, بيىل اتالعان كورسەتكىشتى 80% جەتكىزۋ مىندەتى تۇر. بۇعان قوسا eGov-تان mGov-قا ء(موبيلدى ۇكىمەت) كوشۋ جۇمىستارى جۇرگىزىلىپ جاتىر.

قازاقستاندا يننوۆاتسيالىق كاسىپكەرلىكتى دامىتۋعا ارنالعان Astana Hub حالىقارالىق تەحنولوگيالىق پاركى جۇمىس ىستەيدى. بۇگىنگى تاڭدا Hub 100% تولعان. سونىمەن قاتار, يننوۆاتسيالىق سالانىڭ مىقتى ويىنشىلارىن ودان ءارى تارتۋ جۇمىستارى جۇرگىزىلىپ جاتىر. Astana Hub قاتىسۋشىلارى ءۇشىن تالانتتاردىڭ باسىن قوسىپ, باسەكەلەستىكتى دامىتۋ ماقساتىندا بارلىق قاجەتتى جاعدايلار جاسالعان: جەڭىلدەتىلگەن ۆيزا جانە ەڭبەك رەجيمدەرى, ارەندالىق تۇرعىن ءۇي بەرۋ, گرانتتىق قارجىلاندىرۋ قۇرالدارى. بۇدان وزگە, ەاەو ىشىندە باسەكەلەستىكتى دامىتۋ ستارتاپ جوبالاردىڭ ساپاسىن ارتتىرۋعا مۇمكىندىك بەرەتىنى اتالىپ ءوتتى.

بۇعان قوسا, يننوۆاتسيالىق ەكوجۇيەنى قۇرىپ, تالانتتاردى دامىتۋ ءۇشىن قازاقستاننىڭ ءبىلىم بەرۋ جۇيەسىندە, سونىڭ ىشىندە ورتا, كاسىبي جانە جوعارى ءبىلىم بەرۋ سالاسىندا بىرقاتار رەفورمالار جۇرگىزىلدى. ماسەلەن, استانادا مامانداندىرىلعان ات-ۋنيۆەرسيتەت اشۋ كوزدەلگەن, ونىڭ جۇمىسى Astana Hub قىزمەتىمەن تىكەلەي بايلانىستى بولماق. عىلىمي قىزمەتتى قولداۋ بويىنشا جەكەلەگەن جۇمىستار جۇرگىزىلىپ جاتىر. جالپى, ەلباسى ن. نازارباەۆ وتكەن جىلدىڭ قازان ايىندا 5 جىل ىشىندە ءبىلىم, عىلىم, دەنساۋلىق ساقتاۋ سالالارىن قارجىلاندىرۋ دەڭگەيىن ءجىو 10% دەيىن جەتكىزۋ تۋرالى مىندەت قويدى, سونىمەن قاتار ءجىو-دە عىلىمي-زەرتتەۋ جانە تاجىريبەلىك-كونسترۋكتورلىق جۇمىستارعا (عزتكج) جۇمسالاتىن شىعىنداردى 2025 جىلعا دەيىن 1% جەتكىزۋدى تاپسىردى.  

پلەنارلىق سەسسيا قورىتىندىسى بويىنشا تسيفرلىق قولتاڭبانى پايدالانا وتىرىپ, Astana Hub (قازاقستان), «سكولكوۆو» (رەسەي), «كاسىپورىندار ينكۋباتورى» (ارمەنيا), «جوعارى تەحنولوگيالار پاركى» (قىرعىزستان) تەحنوپاركتەرى اراسىندا ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويۋ ءراسىمى ءوتتى.

فورۋم جۇمىسى «ەاەو تسيفرلىق كۇن ءتارتىبى», «تۇراقتى دامۋ ماقساتتارىنا قول جەتكىزۋدەگى تسيفرلاندىرۋ (بۇۇ)», «يننوۆاتسيالىق ەكوجۇيەدەگى تسيفرلاندىرۋ», «يندۋستريا 4.0 – يننوۆاتسيالىق ەكوجۇيە تۇتىنۋشىسى», «شاعىن جانە ورتا بيزنەستى تسيفرلاندىرۋ» تاقىرىپتارىنداعى پانەلدىك سەسسيالارمەن جالعاستى.