«Kompetenz» ساقتاندىرۋ كومپانياسى» اق ساقتاندىرۋ قىزمەتىن جۇرگىزۋ قۇقىعىن بەرەتىن ليتسەنزيادان ايىرىلدى. بۇل تۋرالى كازتاگ قازاقستان ۇلتتىق بانكىنە سىلتەمە بەرىپ حابارلادى.
«ساقتاندىرۋ قىزمەتى تۋرالى» قازاقستان رەسپۋبليكاسى زاڭىنىڭ 55-بابى 1- تارماعىنىڭ 2) تارماقشاسىندا كوزدەلگەن نەگىزدەر بويىنشا, «جالپى ساقتاندىرۋ» سالاسى بويىنشا ساقتاندىرۋ (قايتا ساقتاندىرۋ) قىزمەتىن جۇزەگە اسىرۋ قۇقىعى بەرىلگەن 2018 جىلعى 12 قىركۇيەكتەگى № 2.1.24 ليتسەنزياسىنىڭ قولدانىلۋىنىڭ بىرنەشە رەت توقتاتىلعانى ءۇشىن قازاقستان رەسپۋبليكاسى ۇلتتىق بانكى باسقارماسىنىڭ 2019 جىلعى 31 قاڭتارداعى № 10 قاۋلىسىمەن «Kompetenz» ساقتاندىرۋ كومپانياسى» اكتسيونەرلىك قوعامى 2019 جىلعى 1 اقپاننان باستاپ ليتسەنزيادان ايىرىلدى», - دەلىنگەن حاباردا.
ماسەلەن, قازاقستان رەسپۋبليكاسىنىڭ ۇلتتىق بانكى توراعاسىنىڭ 2019 جىلعى 31 قاڭتارداعى № 63 بۇيرىعىمەن ۋاقىتشا اكىمشىلىك تاعايىندالدى, وعان ساقتاندىرۋ ۇيىمىنىڭ بارلىق باسقارۋ ورگاندارىنىڭ وكىلەتتىكتەرى ءوتتى.
«ساقتاندىرۋ ۇيىمى 2019 جىلعى 1 اقپاننان باستاپ قارجىلىق قىزمەتىن, ونىڭ ىشىندە ۋاكىلەتتى ورگاننىڭ نورماتيۆتىك قۇقىقتىق اكتىلەرىندە كوزدەلگەن شىعىستارعا بايلانىستى جاعدايلاردى قوسپاعاندا, قولدانىستاعى شوتتار بويىنشا وپەراتسيالاردى جۇزەگە اسىرۋدى توقتاتادى», - دەلىنگەن حاباردا.
حاباردا اتاپ وتىلگەندەي, قازاقستان رەسپۋبليكاسىنىڭ ۇلتتىق بانكى زاڭنامادا بەلگىلەنگەن تارتىپپەن ساقتاندىرۋ ۇيىمىنىڭ قىزمەتىن ماجبۇرلەپ توقتاتۋ (تاراتۋ) تۋرالى وتىنىشپەن سوتقا جۇگىنەدى. ساقتاندىرۋ ۇيىمىن ليتسەنزيادان ايىرعان كۇننەن باستاپ كرەديتورلاردىڭ ساقتاندىرۋ ۇيىمىنا تالاپتارى ساقتاندىرۋ ۇيىمىن ۇستاۋعا جۇمسالاتىن اعىمداعى شىعىستارمەن بايلانىستى تالاپتاردى قوسپاعاندا, تاراتۋ وندىرىسىندە عانا قويىلۋى مۇمكىن.