جەكەمەنشىك ۇيلەردىڭ بىرىندە الاباي تۇقىمداس ءيتتى جەدەل شاقىرتىلعان پوليتسەيلەر بىرنەشە رەت اتسا دا, ولتىرە الماعان.
ادەتتە ءيتتىڭ يەلەرى تۇندە قاۋمالدان شىعارىپ, اۋلاعا بوساتىپ جىبەرىپ وتىرعان. وقىس وقيعا بولعان كۇنى 67 جاستاعى ايەل ارنايى ورىنعا كىرگىزە الماي, ابدەن اۋرە-سارساڭعا تۇسەدى. جايشىلىقتا ايتقانعا تەز كونە قوياتىن توبەتتىڭ ىزاسىنا ءتيىپ كەتسە كەرەك, قارسى شاۋىپ, تارپا باس سالادى. ۋ-شۋدى ەستىپ, كومەككە كەلگەن وتاعاسىنا دا تۇرا ۇمتىلىپ, تالاپ تاستايدى. ايتەۋىر ايەلى كومەك شاقىرىپ ۇلگەرەدى.
شۇعىل جەتكەن جول-پاترۋلدىك پوليتسيا باتالونىنىڭ قىزمەتكەرلەرى يەسىن تىستەلەپ جاتقان ءتورت اياقتى تاعىعا تابەلدىك قارۋ قولدانعانمەن, تايىنشاداي توبەتتىڭ قالىڭ تەرىسىنە وق دارىماعان. ودان سايىن ىزالانىپ, شابالانا تۇسكەن. اقىرى ۆەتەرينارلىق قىزمەت ماماندارى ۋلى وقپەن اتىپ ولتىرگەن.
اۋىر دەنە جاراقاتىن العان ءۇي يەسى جەدەل اۋرۋحاناعا جەتكىزىلىپ, جان ساقتاۋ بولىمشەسىنە جاتقىزىلعان.
كۇشىك كەزىنەن اسىراعان الاباي تۇقىمداس ءيتتىڭ الابوتەن مىنەز كورسەتىپ, اگرەسسيالىق ارەكەتكە تۇسۋىنە كورشىلەرى دە اڭ-تاڭ. «كۇشىك اسىراپ يت ەتتىم, ول بالتىرىمدى قاناتتى» دەگەن وسى بولار, ءسىرا! يت يتتىگىن ىستەمەي تۇرمايتىنىن ەستەن شىعارماعان ءجون. بىلتىر وڭىردە يتتەن 181 ادام, بيىل 12 ادام زارداپ شەككەن.
ءومىر ەسقالي,
«Egemen Qazaqstan»
پەتروپاۆل