بۇگىن پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا پرەزيدەنتتىڭ بەس الەۋمەتتىك باستاماسىن ىسكە اسىرۋ بارىسى قارالدى.
«7–20–25» باعدارلاماسىن ىسكە اسىرۋ بارىسى تۋرالى ۇلتتىق بانك توراعاسى دانيار اقىشەۆ باياندادى. ونىڭ ايتۋىنشا, بۇل باعدارلاما قازاقستاندىقتاردىڭ تۇرعىن ءۇي جاعدايلارىن جاقسارتۋعا باعىتتالعان. قاتىسۋ شارتتارى وتكەن جىلدىڭ ورتاسىندا بەكىتىلدى. يپوتەكا نارىعىن دامىتۋ ءۇشىن زاڭنامالىق تۇزەتۋلەر ەنگىزىلدى. باعدارلاما وپەراتورى بولىپ «باسپانا» ۇيىمى قۇرىلدى. باعدارلاما 2018 جىلعى شىلدەدە ىسكە قوسىلدى. باعدارلامانى ىسكە اسىرۋعا 8 بانك قاتىسادى.
بيىلعى 17 قاڭتارداعى جاعداي بويىنشا «7–20–25» باعدارلاماسى اياسىندا 52 ملرد تەڭگەگە 4350 ءوتىنىم ماقۇلداندى.
«باعدارلامانى ىسكە اسىرۋ بارىسى بۇقارالىق اقپارات قۇرالدارىندا, الەۋمەتتىك جەلىلەردە جۇيەلى تۇردە جاريالانادى. تاۋلىك بويى كولل-ورتالىق جۇمىس ىستەيدى. ۇلتتىق بانكتىڭ اۋماقتىق بولىمشەلەرى مەن “باسپانا” يپوتەكالىق ۇيىمى بارلىق وڭىرلەردەگى حالىقپەن جانە ەڭبەك ۇجىمدارىمەن كەزدەسۋ وتكىزۋدە. حالىقپەن بەلسەندى تۇردە ءتۇسىندىرۋ جۇمىسىن جۇرگىزۋگە 6 ملن-نان استام ازامات قامتىلدى», — دەدى د. اقىشەۆ.
قر ۇلتتىق بانكى باعدارلامانى جانداندىرۋ ءۇشىن بىرقاتار شارانى ۇسىنادى:
تۇرعىن ۇيگە سۇرانىستى, دەموگرافيالىق ءوسىمدى جانە حالىق كوشى-قونىن ەسكەرە وتىرىپ, تۇرعىن ءۇي قۇرىلىسىن ەلىمىزدىڭ پەرسپەكتيۆالىق وڭىرلەرىندە قامتاماسىز ەتۋ; جاو-عا «باسپانا» يۇ قاراجاتى ەسەبىنەن تۇرعىن ءۇي سالۋعا قارجى تارتۋ قۇقىعىن بەرۋ; «نۇرلى جەر» باعدارلاماسى بويىنشا سالىنعان ۇيلەردى تۇرعىن ءۇي قۇرىلىس جيناق بانكى ارقىلى سالىمشىلار مەن كەزەكتە تۇرعاندارعا جانە بارلىق ازاماتتارعا «7-20-25» باعدارلاماسى بويىنشا يپوتەكالىق قارىزدار ارقىلى ساتۋ. تۇرعىن ءۇي سەرتيفيكاتتارىن بەرۋ ناقتى سيپاتقا يە بولۋى كەرەك جانە باعدارلامانىڭ باسىندا عانا بولۋى مۇمكىن; ۇكىمەتتىڭ باعدارلاماعا مەنشىك قۇقىعىندا باسپاناسى بار ازاماتتارعا قاتىسۋ قۇقىعىن بەرۋ مۇمكىندىگىن زەردەلەۋى;بەس الەۋمەتتىك باستامانىڭ ەكىنشى باعىتىن ىسكە اسىرۋ اياسىندا جالاقىسى تومەن جۇمىسشىلاردىڭ ەڭبەكاقىسىن كوبەيتۋ ءۇشىن ولاردىڭ سالىق جۇكتەمەسىن ازايتۋ بويىنشا اتقارىلىپ جاتقان جۇمىستار تۋرالى ۇلتتىق ەكونوميكا ءبىرىنشى ۆيتسە-ءمينيسترى رۋسلان دالەنوۆ باياندادى.
«بارلىق دايىندىق جۇمىستارى جۇرگىزىلدى جانە اياقتالدى. زاڭنامالىق وزگەرىستەر 2019 جىلدىڭ 1 قاڭتارىنان باستاپ كۇشىنە ەندى, سالىق تولەۋشىلەردىڭ اراسىندا ءتۇسىندىرۋ جۇمىستارى جۇرگىزىلدى, جەرگىلىكتى بيۋدجەتتەردىڭ شىعىندارىن وتەۋ كوزدەلگەن, نورمالار قولدانىلۋدا», — دەدى ر. دالەنوۆ.
ءبىرىنشى ۆيتسە-مينيستر زاڭنامالىق وزگەرىستەرگە قاتىستى, سالىق كودەكسىندە جالاقىسى 63 125 تەڭگەدەن تومەندەر ءۇشىن ءتارتىپ وزگەرگەنىن ايتتى. ولاردىڭ سالىق جۇكتەمەسى 10 ەسە تومەندەتىلدى جانە 2 ملن-عا جۋىق جۇمىسشى جىلىنا 15 مىڭ تەڭگەگە دەيىن قوسىمشا كىرىس الادى.
جەرگىلىكتى بيۋدجەتتەردىڭ شىعىندارىن وتەۋ بويىنشا ايتار بولساق, وزگەرىستەر جەرگىلىكتى بيۋدجەتتەردىڭ شىعىندارىنا اكەلەدى. وسىعان وراي, اتالعان شىعىندار رەسپۋبليكالىق بيۋدجەت كوميسسياسىنىڭ وتىرىسىندا قارالدى جانە ماقۇلداندى. رەسپۋبليكالىق بيۋدجەتتە ترانسفەرتتەر كوزدەلگەن. وسىلايشا, جەرگىلىكتى بيۋدجەتتەردىڭ كىرىستەرى جەڭىلدىكتەردىڭ ارقاسىندا ازايمايدى.
بۇعان قوسا, ر. دالەنوۆ بارلىق جۇمىس بەرۋشىلەر وزگەرىستەرمەن تانىسقانىن, حالىق اراسىندا ءتۇسىندىرۋ جۇمىستارى جۇرگىزىلگەنىن اتاپ ءوتتى.
سونىمەن قاتار, ەكىنشى باستامادا جەكە تابىس سالىعىنىڭ پروگرەسسيۆتى شكالاسىن ەنگىزۋ مۇمكىندىگىن زەردەلەۋ تاپسىرىلعان. ءبىرىنشى ۆيتسە-ءمينيستردىڭ ايتۋىنشا, حالىقارالىق تاجىريبە زەردەلەندى جانە جالدامالى ەڭبەككە اقى تولەۋدەگى اعىمداعى جاعدايعا ەگجەي-تەگجەيلى تالداۋ جۇرگىزىلدى.
جالپى, ۇەم دەرەكتەرىنە سايكەس, جالاقىسى تومەن جۇمىسشىلاردىڭ سالىق جۇكتەمەسىن ازايتۋ تۋرالى تاپسىرما ورىندالدى.