ەستۋ قابىلەتى ناشار بالالارعا ارنالعان وبلىستىق ارنايى مەكتەپ-ينتەرنات جانىنان قۇرىلعان «Sensitive» بيشىلەر ءانسامبلى بىرىككەن اراب امىرلىكتەرىندە وتكەن حالىقارالىق بي بايقاۋىندا باس جۇلدەگە جانە ءۇش ءبىرىنشى ورىنعا يە بولدى.
بىرىككەن اراب امىرلىكتەرى, ءۇندىستان, تۇركيا, يتاليا, رەسەي, قىرعىزستان مەن قازاقستاننىڭ ونەرلى ورەندەرى باق سىناسقان بايقاۋعا 400-گە جۋىق ونەرپاز قاتىستى. ەۋروپالىق جانرداعى زاماناۋي حورەوگرافيا, لاتىنامەريكالىق باعدارلاما مەن «تانگو», «چا-چا-چا» بيلەرىن ۇسىنعان جەرلەستەرىمىزدىڭ ونەرىنە قازىلار القاسى ەڭ جوعارى باعا بەردى.
«الەمنىڭ ءار قيىرىنان كىل مىقتىلار جينالعان ايتۋلى دوداعا «Sensitive» بي ۇجىمىنىڭ ەرەسەكتەر توبى باق سىنادى.ء تورت جۇزگە جۋىق ونەرپازدىڭ اراسىنان توپ جارىپ, سۋىرىلىپ شىعۋ وڭاي بولمادى. ەل نامىسىن قورعاپ, جەڭىس تۇعىرىنان كورىنۋ ءۇشىن بارىمىزدى سالدىق. بىزگە قارجىلىق قولداۋ كورسەتكەن «نۇر وتان» پارتياسى مەن جەرگىلىكتى اتقارۋشى بيلىككە ايتار العىسىمىز شەكسىز» دەيدى توپتىڭ كوركەمدىك جەتەكشىسى ولگا روستوۆششيكوۆا.
بارشا الەمگە تانىلعان بي ۇجىمى ارنايى ديپلوممەن ماراپاتتالىپ, مالديۆ ارالىندا دەمالۋعا جولداما الدى.
انسامبل كوكتەمدە الماتى قالاسىندا وتەتىن بي بايقاۋىنا قاتىسۋدى جوسپارلاپ وتىر.
ىم ارقىلى بي قيمىلىن جان-جاقتى مەڭگەرىپ, اۋەنگە لايىقتى قويىلىمداردى ءوز كورەرمەندەرىنە جوعارى دەڭگەيدە جەتكىزىپ جۇرگەن «Sensitive» بيشىلەر توبى 13 جىلدىڭ ىشىندە وسىمەن 6-شى باس جۇلدەنى يەلەنىپ وتىر.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى