ايگىلى BoxRec.com سايتى قازىرگى كەزدەگى قازاقستاننىڭ ەڭ ۇزدىك ون كاسىپقوي بوكسشىسىنىڭ رەيتينگىن جاريالادى. مىقتىلار كوشىن ءالى دە WBC, WBA (Super), IBF جانە IBO نۇسقالارى بويىنشا الەمنىڭ ەكس-چەمپيونى گەننادي گولوۆكين باستاپ تۇر.
ارينە, وعان تاڭدانۋعا بولماس. سەبەبى, وتانداستارىمىزدىڭ اراسىنان ەڭ تاجىريبەلىسى دە, ەڭ اتاقتىسى دا ءدال وسى GGG ەكەنى ەش كۇمان تۋعىزباۋعا ءتيىس. وسى كۇنگە دەيىن ول 40 كەزدەسۋ وتكىزىپ, 38 رەت جەڭىسكە جەتتى. 34 باسەكەنى مەرزىمىنەن بۇرىن اياقتادى. ءبىر رەت ۇتىلىپ, ءبىر مارتە تەڭ ءتۇستى. BoxRec رەيتينگىندە گەننادي گولوۆكين 263 ۇپاي جيىپ وتىر.
ەكىنشى جانە ءۇشىنشى ورىندارعا باتىر جۇكەمباەۆ پەن مەيىرىم نۇرسۇلتانوۆ جايعاستى. 14 جەكپە-جەكتىڭ 12-ءسىن نوكاۋتپەن اياقتاعان باتىر 50 ۇپاي جيسا, 10 كەزدەسۋدىڭ 8-ىندە ايقىن جەڭىسكە قول جەتكىزگەن مەيىرىم 32 ۇپايدى يەلەنۋدە. ءتورتىنشى ورىندا – ايدوس ەربوسىن ۇلى. ونىڭ دا كورسەتكىشى ءدال مەيىرىم نۇرسۇلتانوۆتىكى سەكىلدى. ايدوستىڭ ەنشىسىندە 26 ۇپاي بار. ءبىر قۋانتارلىعى, بۇل جىگىتتەردىڭ ۇشەۋى دە كۇنى بۇگىنگە دەيىن جەڭىلىستىڭ كەرمەك ءدامىن تاتقان ەمەس.
سونداي-اق, «توپ-10» بوكسشىنىڭ قاتارىندا بەيبىت شۇمەنوۆ (18-2, 12 كو), ءالي احمەدوۆ (13-0, 10 كو), ابىلايحان قۇساينوۆ (9-0, 6 كو), بوبىرجان مومىنوۆ (9-0, 8 كو), نۇرسۇلتان جاناباەۆ (6-0, 4 كو) جانە رۋسلان ماديەۆ (12-1, 5 كو) سىندى ساڭلاقتار بار.
عالىم سۇلەيمەن,
«ەگەمەن قازاقستان»