تۇركىستان وبلىسى پوليتسيا دەپارتامەنتىنىڭ كوشى-قون باسقارماسى قاڭتاردا جۇرگىزىلگەن «ميگرانت» جەدەل الدىن الۋ ءىس-شاراسىن قورىتىندىلادى. پوليتسەيلەر 5 كۇن ىشىندە كوشى-قون زاڭناماسىن بۇزعان 600-گە جۋىق ادامدى جاۋاپكەرشىلىككە تارتتى.
وبلىس اۋماعىندا زاڭسىز كوشى-قوندى انىقتاۋ, جولىن كەسۋ, ۋاقىتشا جانە تۇراقتى تۇراتىن شەتەلدىكتەردى ەسەپكە الۋدى ماقسات ەتكەن «ميگرانت» ءىس-شاراسى بارىسىندا 485 شەتەلدىك پەن 92 ەلىمىزدىڭ ازاماتى قازاقستانعا كەلۋ, بولۋ جايتتارى بويىنشا جاۋاپكەرشىلىككە تارتىلعان. پوليتسيا دەپارتامەنتىنىڭ حابارلاۋىنشا, قۇقىق بۇزۋشىلىقتاردىڭ 321-ءى ەسكەرتىلگەن, 55-نە اكىمشىلىك ايىپپۇلدار سالىنىپ, 164 شەتەلدىك ازامات اكىمشىلىك قاماۋعا الىنعان. سونداي-اق 28 شەتەلدىك سوت شەشىمدەرىمەن ەل اۋماعىنان شىعارىلعان. جەكە باستارىن انىقتايتىن قۇجاتتارى جوق 24 ادام پوليتسيا دەپارتامەنتىنىڭ قابىلداپ-ءبولۋ مەكەمەلەرىنە ورنالاستىرىلعان. ال 180 شەتەل ازاماتىنىڭ قازاقستاندا بولۋ مەرزىمى قىسقارتىلدى. شەتەل ازاماتتارىن زاڭسىز تۇرعىن ۇيمەن قامتاماسىز ەتكەنى ءۇشىن – 67, شەتەلدىكتەردىڭ جۇمىس كۇشىن زاڭسىز پايدالانعان – 25 ەل ازاماتى انىقتالىپ, ولاردىڭ اكىمشىلىك جاۋاپكەرشىلىكتەرى قارالعان. ەلدەن الاستاتۋ تۋرالى سوت شەشىمىن ورىنداماۋدىڭ 6 فاكتىسى بويىنشا قىلمىستىق ىستەر قوزعالعان.
عالىمجان ەلشىباي,
«Egemen Qazaqstan»
تۇركىستان وبلىسى