بۇگىن شۆەيتساريادا دۇنيەجۇزىلىك ەكونوميكالىق داۆوس فورۋمى باستالدى. داۆوس فورۋمىنا 110 ەلدەن كەلگەن 3 مىڭنان استام ساياسات, قوعام قايراتكەرلەرى, عالىم جانە ۇكىمەتتىك ەمەس ۇيىم وكىلدەرى قاتىسادى. بيىلعى فورۋم «جاھاندانۋ 4: ءتورتىنشى يندۋستريالىق رەۆوليۋتسيا داۋىرىندە جاھاندىق ارحيتەكتۋرانى قالىپتاستىرۋ» تاقىرىبىنا ارنالعان.
جيىن باعدارلاماسى ءارتۇرلى تاقىرىپتاردى قامتيدى. باعدارلاما التى سىني ديالوگقا: الەمدەگى گەوساياساتقا, ەكونوميكانىڭ بولاشاعىنا, ونەركاسىپتىك جۇيەلەر مەن تەحنولوگيالىق ساياساتقا, ادام كاپيتالى مەن قوعامدى كوتەرمەلەۋگە, سونداي-اق جاھاندىق ينستيتۋتسيونالدىق رەفورما جاساۋعا باعىتتالعان.
«جاھاندانۋدىڭ ءتورتىنشى تولقىنى ادامدارعا نەگىزدەلىپ, ينكليۋزيۆتى جانە تۇراقتى بولۋ كەرەك. ءبىز ء«تورتىنشى يندۋستريالىق رەۆوليۋتسيانىڭ» اسەرى مەن گەوەكونوميكالىق جانە گەوساياسي كۇشتەردى قايتا قۇرۋ ناتيجەسىندە تۋىنداعان ۇلكەن عالامدىق تۇراقسىزدىق كەزەڭىنە كىرىپ وتىرمىز. داۆوسقا قاتىسۋعا قىزىعۋشىلىق تانىتقان توپتار وسى ماسەلەلەردى شەشۋ ءۇشىن اتسالىسادى دەپ ويلايمىز», دەدى دۇنيەجۇزىلىك ەكونوميكالىق فورۋمنىڭ نەگىزىن قالاۋشى جانە باس اتقارۋشى پروفەسسور كلاۋس شۆابت.
فورۋمعا 60-تان استام ەلدىڭ مەملەكەت باسشىسى مەن پرەمەر-ءمينيسترى قاتىسادى. اتاپ ايتقاندا جاپونيا پرەمەر-ءمينيسترى سيندزو ابە, گەرمانيا كانتسلەرى انگەلا مەركەل, قىتاي توراعاسىنىڭ ورىنباسارى ۆان تسيشان, برازيليانىڭ جاڭا پرەزيدەنتى جاير بولسونارۋ, يتاليا پرەمەر-ءمينيسترى دجۋزەپپە كونتە, اعىلشىن تاعىنىڭ ەكىنشى كەزەكتەگى مۇراگەرى, حانزادا ۋيليام, يسپانيا پرەمەر-ءمينيسترى پەدرو سانچەس, اۋعانستان پرەزيدەنتى اشراف گاني, يراك پرەزيدەنتى بارحام سالەح, ارمەنيا پرەمەر-ءمينيسترى نيكولا پاشينيان, ازەربايجان پرەزيدەنتى يلحام اليەۆ كەلەدى. بۇدان باسقا, بۇۇ جانە ونىڭ بولىمشەلەرىنىڭ, حۆق, ناتو, دۇنيەجۇزىلىك بانك, دسۇ جانە باسقا ءىرى حالىقارالىق ۇيىمداردىڭ باسشىلارى قاتىسادى.
جيىننىڭ ەڭ جاس قاتىسۋشى 16 جاستاعى - وڭتۇستىك افريكانىڭ جابايى جانۋارلار ءومىرىن سۋرەتكە ءتۇسىرۋشى فوتوگراف سكي مەيكەر. ال 92 جاستاعى كليماتتىڭ وزگەرۋىنە الەم نازار اۋدارۋ ءۇشىن ءوز جۇمىسىن ءتيىمدى پايدالانعان ايگىلى تەلەجۇرگىزۋشى دەۆيد اتتەنبورو ەڭ قارت قاتىسۋشىسى.
ۋاقىتشا بيۋدجەت داعدارىسى سالدارىنان اقش دەلەگاتسياسى فورۋمعا قاتىسپايدى. بۇل تۋرالى اق ءۇيدىڭ رەسمي وكىلى سارا ساندەرس مالىمدەدى. سونداي-اق برەكسيتتەن باسى قاتقان ۇلىبريتانيا پرەمەر-ءمينيسترى تەرەزا مەي, پاريجدەگى «سارى كۇرتە كيگەندەردىڭ» ەرەۋىلدەرىنە بايلانىستى ەلدەگى ىشكى جاعدايدى قولعا العان فرانتسيا پرەزيدەنتى ەممانۋەل ماكرون بۇل فورۋمعا كەلگەن جوق.
فورۋم مەملەكەت باسشىلارى ءۇشىن ءتۇرلى كەزدەسۋلەر, قارىم-قاتىناس جانە كەلىسسوزدەر جۇرگىزۋگە مۇمكىندىك بەرەدى. مىسالى رەسەي ەنەرگەتيكا ءمينيسترى الەكساندر نوۆاك فورۋمدا ساۋد ارابياسىنىڭ ەنەرگەتيكا ءمينيسترى حاليد ءال-فاليحپەن مۇناي نارىعىندا وپەك+ كەلىسسوزىن جۇزەگە اسىرۋدى تالقىلايتىنىن حابارلادى. سونداي-اق, داۆوستا تاياۋ شىعىستاعى, ونىڭ ىشىندە ليۆيا مەن سيرياداعى جاعداي بويىنشا بىرنەشە پىكىرتالاستار وتەدى. بۇۇ-نىڭ سيريا ماسەلەلەرى بويىنشا ارنايى وكىلى گەير پەدەرسەن سيريا تاقىرىبىن جابىق كەزدەسۋدە مۇددەلى ەلدەردىڭ وكىلدەرىمەن تالقىلايدى. جاقىندا ول داماسكىدە بولىپ ۇكىمەتپەن كەزدەستى, وپپوزيتسيا دەلەگاتسياسىمەن جەكە اڭگىمەلەستى.
بۇكiلالەمدiك ەكونوميكالىق فورۋم حالىقارالىق ارiپتەستiكتi دامىتۋ ماقساتىندا ۇيىمداستىرىلادى. 1971 جىلى قۇرىلعان فورۋمعا 1000-نان استام iرi كومپانيالار مەن الەم مەملەكەتتەرi مۇشە.
ءمادينا جالەلقىزى,
«ەگەمەن قازاقستان»