ورال قالاسىنداعى نازارباەۆ زياتكەرلىك مەكتەبىندە ء«باتىسبىلىمTalks» لەكتوريى ءوتتى. V رەت وتكىزىلىپ جاتقان ءبىلىم بەرۋ لەكتوريى «وندىرىستىك رەۆوليۋتسيا جاعدايىندا ادامي كاپيتال مەن ءبىلىم بەرۋ جۇيەسىنە قويىلاتىن جاڭا تالاپتار» تاقىرىبىنا ارنالدى.
ءىس-شارانىڭ باس سپيكەرى – «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمدارىنىڭ باسقارما توراعاسى كۇلاش ءشامشيدينوۆا بولدى. بۇل شاراعا باتىس قازاقستان وبلىسىنىڭ اكىمى التاي كولگىنوۆ جانە وڭىردەگى ءبىلىم بەرۋ جۇيەسىنىڭ قىزمەتكەرلەرى قاتىستى.
پەداگوگتارعا ارنالعان لەكتوريدە ەل بولاشاعى جاستاردىڭ ءبىلىم ىرگەتاسى مەكتەپتە قالاناتىندىعىنا باسا ءمان بەرىلدى. ءوز سوزىندە وتاندىق جانە الەمدىك تاجىريبەنى ۇشتاستىرعان كۇلاش ءشامشيدينوۆا قازىرگى ۇرپاق تاربيەسىندە جاتتاندى بىلىمنەن گورى ومىردە پراكتيكالىق قولدانا الاتىن ناقتى تاجىريبە, شەشىم قابىلداۋ ماڭىزدى ەكەنىن ايتادى. تاياۋ بولاشاقتا كوپتەگەن ماماندىق جويىلىپ, دەنە ەڭبەگىن اقىلدى روبوتتار اتقاراتىن تۇستا ءار ازاماتقا «دۇنيەنىڭ كەتىگىن تاۋىپ, كىرپىش بولىپ قالانۋ» - وڭاي شارۋا بولمايدى. وزىق تەحنولوگيا, جاساندى ينتەللەكت كەزەڭىندە وقۋشىنىڭ شىعارماشىلىق قابىلەتىن دامىتۋ قاجەت.
- ءبىلىم دەگەنىڭىز – اقپارات. وعان قول جەتكىزۋدىڭ جولى دا ءارتۇرلى. سوندىقتان مەكتەپ قابىرعاسىندا بالاعا قاجەتتى اقپاراتتى ءوزى ىزدەپ تابۋىنا جانە ونى ءوزى وڭدەپ, پايداسىنا جاراتا بىلۋگە ۇيرەتۋ قاجەت. بۇگىنگى مەكتەپتىڭ باستى مىندەتى – وسى, - دەيدى كۇلاش ءشامشيدينوۆا.
كەزدەسۋدە ءسوز العان باتىس قازاقستان وبلىسىنىڭ اكىمى التاي كولگىنوۆ وڭىردەگى پەداگوگ كادرلاردىڭ ءبىلىمىن جەتىلدىرۋ ماسەلەسىنە توقتالدى. «كىتاپ وقۋ, كۇن سايىن ءوزىن-ءوزى جەتىلدىرىپ, ءبىلىمىن كوبەيتىپ وتىرۋ – بۇگىنگى ادامعا, مامانعا قويىلاتىن ەڭ باستى تالاپ» دەدى ءوڭىر باسشىسى. باتىس قازاقستان كوللەدجدەرىندە ءبىلىم ساپاسىن ارتتىرۋعا باسا ءمان بەرىلۋدە. ماسەلەن, جوعارى اگرارلىق-تەحنيكالىق كوللەدجىنىڭ ماماندارى BIM تەحنولوگيالارىن ەنگىزۋ بويىنشا فيندىك ارىپتەستەرىمەن تاجىريبە الماسىپ قايتتى.
- بۇل جۇمىستار 4 باعىتتا جۇزەگە اسادى. ولار – گۋمانيتارلىق, يندۋستريالىق, مەديتسينالىق جانە سپورتتىق باعىتتار. بۇگىنگى تاڭدا وسى باعىتتارعا كادر دايارلايتىن كوللەدجدەردىڭ ءبىلىم دەڭگەيىن كوتەرۋ ءۇشىن وتاندىق جانە شەتەلدىك سەرىكتەستەر ىزدەستىرىلىپ جاتىر. ماسەلەن, پەداگوگيكالىق كوللەدجدە 2 مىڭنان اسا ستۋدەنت ءبىلىم الادى. ولاردىڭ دەنى ەرتەڭ-اق وقۋ ءبىتىرىپ, مەكتەپتە بالا وقىتادى. ال بالانىڭ ءبىلىم دەڭگەيى تىكەلەي مۇعالىمنىڭ ءبىلىم-بىلىگىنە بايلانىستى. سوندىقتان وسىعان باسا ءمان بەرۋىمىز قاجەت, - دەيدى التاي كولگىنوۆ.
بۇگىنگى لەكتوريگە قاتىسقان مەكتەپ ديرەكتورلارى, مەكتەپكە دەيىنگى جانە كاسىبي ءبىلىم بەرۋ وقۋ ورنى باسشىلارى وسى جيىندا ايتىلعان باعالى وي تۇيىندەرىن ءوز ۇجىمدارىندا تاراتاتىن بولادى. الىس اۋىلدار مەكتەپتەرى ءۇشىن بەينەدارىستەر ازىرلەنىپ, تاراتىلماق.
قازبەك قۇتتىمۇرات ۇلى,
«Egemen Qazaqstan»
باتىس قازاقستان