ەندى الىستاعى اقكولدىڭ ءوز «شينومونتاجى» بار

جۇرت ءمىنىپ جۇرگەن جەڭىل كولىكتەر اۋىلدا دا كوبەيىپ كەلەدى. تەحنيكا سىنباي, توزباي تۇرمايدى. وندايدا اۋىلداستار سوناۋ الىسقا ات شالدىراتىن نەمەسە ولاردى دومبايلاپ, «بالتالاپ» وزدەرى جوندەيتىن. ارينە, ساپاسىز جوندەگەن تەحنيكانىڭ جارامدىلىعى دا كوپكە بارمايدى دا, ءار ءۇيدىڭ الدىندا كولىك قاڭتارىلىپ تۇرۋشى ەدى. اقكول اۋىلىنداعى ەربولات دوسوۆ, اسىلبەك قوجامجاروۆ جانە بەكسۇلتان مىرزاحان دەگەن ءۇش جىگىت شينومونتاج تسەحىن اشقالى قاتار جاتقان اقكول مەن قاراسۋ اۋىلدارىنداعى تەحنيكا مىنگەندەردىڭ كوزى اشىلىپ قالدى.

–اۋىلدا وتىزدىڭ سىرتىندا جەڭىل ماشينا, 30 تراكتور, بىرنەشە جۇك كولىگى بار. سونىمەن قاتار بالىق اۋلاۋعا كەلگەندەردىڭ كولىكتەرى دە دالانىڭ جولىندا ءجيى سىر بەرەدى. ولار دا وسى شينومونتاج تسەحىن ىزدەپ كەلەدى. جىگىتتەردىڭ باستاماسى اۋىلدىڭ ناعىز قاجەتىنە جارادى, – دەيدى اقكول اۋىلدىق وكرۋگىنىڭ اكىمى بالعاباي قاليەۆ.

جاسى 26-27-كە ەندى كەلگەن ءۇش جىگىتتىڭ اراسىنداعى بەكسۇلتان مىرزاحان وسى يگى ىسكە مۇرىندىق بولعان كورىنەدى. ءوزى قوستاناي قالاسىنداعى اۆتوكولىك كوللەدجىن بىتىرگەن, اۋىلداعى جەدەل-جاردەم قىزمەتىنىڭ كولىگىن جۇرگىزەدى. تەحنيكادان حابارى جامان ەمەس. اۋىلدا شينومونتاج تسەحىن اشۋ ءۇشىن «جاس پرودجەكت» جوباسىنا قاتىسىپ, وتكەن جىلى 1 ميلليون تەڭگە قارجى ۇتىپ الادى. وعان جۇمىسقا قاجەتتى ستانوك, كومپرەسسور جانە تاعى باسقا كەرەك-جاراقتارىن قوستاناي قالاسىنان ساتىپ اكەلەدى. بەكسۇلتان ءوزىنىڭ دوستارى ەربولات پەن اسىلبەككە قولىنان كەلگەنىن ۇيرەتەدى. قازىر ءۇش جىگىتتىڭ ۇشەۋى دە ارقالىق قالاسىنا بارىپ, 10 كۇندىك كۋرستا وقىپ جاتىر. تەحنيكا جوندەۋدى, ونىڭ ىشىندە دوڭعالاق اۋىستىرۋ, جاماۋ سياقتى جوندەۋ جۇمىستارىن بارىنشا ۇيرەنىپ قايتاتىن بولادى.

– ەربولات پەن اسىلبەك بۇرىن كولدەن بالىق اۋلاپ, سونى ساتىپ, قارجى تاۋىپ جۇرەتىن. مىنا «شينومونتاجدى» اشقالى ولار ءوزىن تولىق جۇمىسپەن قامتاماسىز ەتتى, ونىڭ سىرتىندا جىگىتتەر اۋىلداعى تاعى ءۇش جىگىتتى جۇمىسقا الاتىن بولدى, – دەيدى اۋىل اكىمى بالعاباي.

اۋىل اكىمىنىڭ ايتۋىنشا, «جاس پرودجەكت» جوباسىنا قاتىسقان اۋىل جاستارى ودان تاعى دا قارجى الۋعا ءتيىستى كورىنەدى. دەمەك, ولاردىڭ قولعا العان جۇمىسى قازىرگىدەن دە كەڭەيىپ, اياعىنان تۇرىپ كەتەدى. ويتكەنى تەحنيكا بار جەردە ونىڭ جوندەۋ جۇمىستارى دا قوسارلانا جۇرەدى. جاستار وسىلاي ءوز ءىسىن اشامىن دەسە, جەردىڭ شالعايلىعى كەدەرگى ەمەس ەكەنىن اقكولدىك جىگىتتەردىڭ قيمىلى كورسەتكەندەي.

حالىقارالىق قايتا قۇرۋ جانە دامۋ بانكىنىڭ جانە ءبىلىم جانە عىلىم مينيسترلىگىنىڭ جاستار كورپۋسىن دامىتۋ جوباسىنىڭ شەڭبەرىندە وتكەن جىلى قوستاناي وبلىسىندا ءوز ىسىنە قاراجات الۋ ءۇشىن 394 ءوتىنىش قابىلدانعان بولاتىن. ءۇش ساتىلى ىرىكتەۋدەن كەيىن 143 جوبا بويىنشا 492 جاس گرانتتىق قارجىعا يە بولدى. ولاردىڭ بۇگىنگى جاعدايىنا كەلسەك, 6 جوبا جابىلىپ قالعان. قالعان 137 جوبا ءىسىن جالعاستىرىپ الىپ كەتكەن. سولاردىڭ اراسىندا سوناۋ شالعايداعى ءۇش جىگىتتىڭ «شينومونتاجى» دا جۇمىس ىستەپ تۇر. ونىڭ اشىلۋىنا اۋىلدىڭ شالعايلىعى كەدەرگى ەمەس, قايتا سەبەپ بولعانداي. شالعاي اۋىلدا كولىگىنىڭ دوڭعالاعىن اۋىستىرۋعا, جوندەۋگە سۇرانىس ىلعي دا بار. «الىستان اربالاعانشا, جاقىننان دوربالا» ۇستانىمى اقكول اۋىلىنىڭ كۇندەلىكتى تىرشىلىك كورىنىسىنە اينالعان.

ءنازيرا جارىمبەت,

«Egemen Qazaqstan»

قوستاناي وبلىسى

جانكەلدين اۋدانى

اقكول اۋىلى