كانادالىق سۋرەتشى گيلليان گەنزەر 15 جىل بويى ادام اتانىڭ ءمۇسىنىن جاساپ كەلگەن. ەرەكشەلىگى سول, ءمۇسىندى قاشاۋعا دالادان, تەڭىز جاعاسىنان تەرىپ العان ءارتۇرلى قاۋاشاق, تاس, ءتۇرلى جان-جانۋاردىڭ سۇيەگى سياقتى زاتتاردى پايدالانعان. ال ءبىر كۇنى جۇمىس ۋاعىندا سۋرەتشىنىڭ جاعدايى كەنەتتەن ناشارلاپ, ەمحاناعا تۇسەدى.
جەر بەتىندەگى العاشقى ادامنىڭ ءمۇسىنىن جاساۋ گيلليان گەنزەرگە توسىننان كەلگەن وي ەمەس. بۇرىن 1998 جىلى ەۆرەي اپساناسىنداعى العاشقى ايەل ءليليتتىڭ ءمۇسىنىن جۇمىرتقانىڭ قابىعىنان جاساپ شىققان سوڭ, كەزەكتى جۇمىسىنىڭ جالعاسى ادام اتانىڭ قۇرمەتىنە ارنالۋى كەرەك دەپ ءبىلدى. كوپ ۇزاماي وعان قاجەتتى ماتەريالدى وڭاي تاپتى. تورونتوداعى قىتاي اۋدانىنداعى بازاردان ميديا قاۋاشاقتارىن ارتىعىمەن ساتىپ الادى. «ادامنىڭ اياقتالۋعا جاقىن مۇسىنىنە قاراما-قارسى وتىردىم دا, ومىرمەن قوش ايتىستىم. ابدەن قالجىراعان ەدىم. سۋرەتشى تۋدىرعان دۇنيەگە قاراعاندا, تابيعاتتىڭ جاراتقانى الدەقايدا سۇلۋ. ميديا (ۇلۋ) قاۋاشاقتارىنىڭ قۇرىلىمى ادام اتانىڭ بۇلشىق ەتتەرىن بەينەلەۋگە تۋرا كەلەتىن», دەپ ەسكە الادى سۋرەتشى.
بىرتە-بىرتە سۋرەتشىنىڭ زاتتارمەن جۇمىس ىستەۋى قيىنداپ, قاۋاشاقتاردى كەرەكتى جەرگە جابىستىرا المايتىن كۇيگە جەتەدى. اۋىر كۇيدە ەمحاناعا تۇسكەن گيلليانعا دەمەنتسيانىڭ (اقىل-وي كەمىستىگى, مي قىزمەتىنىڭ بۇزىلۋى) اسقىنعان ءتۇرى دەگەن دياگنوز قويىلدى. دارىگەرلەر سۋرەتشىگە اۋىر مەتالداردان ۋلانعان دەگەن قورىتىندى شىعارعان, ال گيلليان بولسا نەدەن ۋلانعانىن بىلمەي, تەك تابيعي زاتتارمەن جۇمىس ىستەيتىنىن ايتىپ باعۋمەن بولدى.
ۋلانۋدىڭ سەبەبى كوپ ۇزاماي انىقتالدى. سىرتىنان تىم بەيكۇنا, مىسقالداي زيانى جوقتاي كورىنەتىن ميديا قاۋاشاقتارى تەڭىز سۋىنداعى اۋىر مەتالداردى وزىنە سىڭىرەتىن قاسيەتكە يە بولىپ شىققان. ومىرىنە قاۋىپ ءتونىپ تۇرعانىنا قاراماستان, سۋرەتشى ونەر تۋىندىسىن سوڭىنا دەيىن جەتكىزۋدى ءجون ساناعان.
– شەبەرحانامنىڭ ەسىگىنە كەلگەن سايىن ۋلاناتىنىمدى ويلاپ, تۇرىپ قالامىن. اقىرى ولەدى ەكەنمىن, ەندەشە ولە-ولگەنشە ءمۇسىندى اياقسىز قالدىرماي, سوڭىنا جەتكىزەيىن دەدىم. دەگەنمەن قازىرگى جۇمىستارىما كەرەك ماتەريالداردا دا توكسين قاۋىپى بار. ەندى ماعان تەك ساق بولۋ كەرەك. وتكەندى ويلاپ, قايعىرۋدىڭ ەش ماڭىزى جوق. قورشاعان ورتانى اياۋسىز بۇلدىرگەن ادام بالاسى ءۇشىن بۇل دا ءبىر ساباق, – دەيدى ول.
وسىلايشا 15 جىل بويى ارپالىسقان ادام اتانىڭ ءمۇسىنىن ويداعىداي اياقتاعان گيلليان ەشتەڭەگە قاراماستان, وزگە شىعارماشىلىق جۇمىستارىنا كىرىسىپ كەتتى. بىراق بۇل جولى قاۋىپسىزدىك شارالارىن ءبىر كىسىدەي قاپەرىنە ۇستاماق.
ايا ءومىرتاي,
«Egemen Qazaqstan»