پەداگوگ بولعاندىقتان ۇزدىكسىز ىزدەنىس, ۇزدىكسىز سابىلۋ, ۇزدىكسىز جاڭاشىلدىق قاجەت. ءار ساباعىنا قاجەتتى ءتۇرلى-ءتۇستى كورنەكىلىكتەردىڭ وزىنە ءبىرشاما قارجى كەرەك. جۇمىس پەن ءۇيدىڭ اراسىنا قاتىنايتىن قوعامدىق كولىگى, تۇستىگى جانە جەكە وتباسىلىق شىعىندارى تاعى بار. وسىنى ەسەپتەي كەلە, بالاسىنا نە قالادى دەگەن ويعا كەلەمىز. وتە وكىنىشتى, سابىلىپ ءجۇرىپ حالىقتىڭ بالاسىمەن بىرگە ءوزىنىڭ دە بالاسىن قاتارىنان قالدىرماي وسىرەدى.
پەداگوگتەردىڭ ءوزى مەكتەپكە دەيىنگى ۇيىم, مەكتەپ, كوللەدج جانە جوعارى وقۋ ورىندارىنىڭ ماماندارى بولىپ بولىنە بەرەدى. ال وسى ءبىر مەكتەپكە دەيىنگى ۇيىم تاربيەشىسىنىڭ جالاقىسى بار-جوعى 28 مىڭ تەڭگە ەكەنىن بىرەۋ بىلسە, بىرەۋ بەيحابار. بۇل قارجى قاعاز شىعارۋعا جەتكىلىكسىز. باستاۋىش مەكتەپتىڭ ۇستازى مەن ارنايى پاندەردىڭ ۇستازىنىڭ ءبىر-بىرىنەن قانداي ايىرماشىلىعى نەمەسە ارتىقشىلىعى بار دەگەن سۇراق كوكەيدە تۇرادى. ال كوللەدج بەن ۋنيۆەرسيتەتتەگى پەداگوگتەردىڭ جاي-كۇيىن كىم باقىلاپ جاتىر؟ سونىڭ ىشىندە جەكە ءبىلىم بەرۋ ورىندارىنىڭ جالاقى ماسەلەسى قالاي؟
مىسالى, مەن كوللەدجدە ارنايى پاندەر وقىتۋشىسىمىن. 22 635 تەڭگە جالاقى الامىن دەسەم, بىرەۋگە ەرتەگى, بىرەۋگە جالعان سان رەتىندە كورىنەر. الايدا, بۇل – شىندىق. اي بويى تالاي ستۋدەنتكە ءدارىس وقيمىز. 90 مينۋت بويى جاعىمىز تالىپ, ءبىلىم ءنارىن بەرەمىز. ءتۇسىندىرۋ كورنەكىلىكتەرىم, عىلىمي باياندامالارىم, ودان قالسا عىلىمي ماقالالارىم تاعى بار. كۋراتورلىق قىزمەتكە ەشقانداي قاراجات قاراستىرىلماعان. بۇل نە ماسقارا دەيتىن شىعارسىز؟ دەگەنمەن, وسىلايشا توپتاعى ستۋدەنتتەرىمە كەتەتىن شىعىندارىم باستان اسادى. ارقايسىنىڭ جەكە-جەكە ساۋلىعى مەن بىلىمىنە تىكەلەي جاۋاپ بەرەتىن بولعاندىقتان, بۇل جۇكتەلگەن مىندەتتى وپ-وڭاي لاقتىرا سالعىم كەلەدى. الايدا, ءار ستۋدەنتتىڭ جەكە وزىنە ءتان بولمىس-بىتىمدەرى بار. ارقايسى سىڭلىمدەي كورىنەدى.
الەمدىك دەڭگەيدە شەتەلدەردەگى پەداگوگتەردىڭ جالاقىسىن زەرتتەگەن بولاتىنمىن. مىسالى, ءبىر ايلىق جالاقى انگليا مەن نورۆەگيادا – 1 500 000, اۋستراليادا – 1 200 000, جاپونيادا 1 100 000, كانادادا 1 000 000, كورەيادا 750 000 تەڭگە كولەمىندە, ال ەلىمىزدە 21 000 تەڭگەدەن جوعارى باعانى قۇرايدى. اششى مالىمەتتىڭ ۋداي شىندىعى وسى. قازاقستاندىق پەداگوگ شەتەلدە 1 جىل جۇمىس ىستەپ كەلسە, ميلليونەر بولار ەدى. بۇل وزگەنىڭ قالتاسىنا ءۇڭىلۋ ەمەس, ەلىمىزدىڭ پەداگوگتەرىنە دە لايىقتى سىي-قۇرمەت جاسالسا دەگەن وي.
ايدا حاسانوۆا,
ورال گۋمانيتارلىق كوللەدجىنىڭ وقىتۋشىسى, پەداگوگيكا عىلىمدارىنىڭ ماگيسترى
باتىس قازاقستان وبلىسى