«ۇستازدىق – ۇلى قىزمەت» دەگەن ناقىل سوزگە ءمان بەرىپ كورسەك, مۇعالىمدىكتىڭ جاۋاپكەرشىلىگى جوعارى, قوعامدا ۇلكەن سالماعى بار جۇمىس ەكەنىن كورەمىز. سوعان قاراي بۇل قىزمەتتىڭ ولشەمى مەن باعاسى دا لايىقتى بولۋى كەرەك.
ەلباسىمىز قوعامداعى مۇعالىم مارتەبەسىن كوتەرۋ تۋرالى زاڭ قابىلداۋعا ۇسىنىس بەردى. قوعام, كوپشىلىك, ۇستازدار وسى زاڭنىڭ دۇرىس قابىلدانۋىنا اتسالىسىپ جاتىر.
جالپى مۇعالىمگە مەملەكەت تاراپىنان مۇلدە قولداۋ جوق دەگەن ويدان اۋلاقپىز. سەبەبى رەفورمالار ارقىلى ءبىلىم جەتىلدىرۋ كەزەڭ-كەزەڭىمەن جۇزەگە اسىرىلىپ كەلەدى. سوعان ساي بىرتىندەپ ۇستەماقى قوسىلىپ تا جاتىر.
دەي تۇرعانمەن, وسى رەتتە بىرنەشە ۇسىنىس ايتۋعا بولادى. اتاپ ايتقاندا, اپتالىق جۇكتەمەنى ازايتۋ. بۇل – جاڭارتىلعان ءبىلىم بەرۋ باعدارلاماسىنىڭ تالابى. قىسقا مەرزىمدى جوسپار جاساۋ, ساباق زەرتتەۋ, ءتيىمدى جۇرگىزۋ, تابىستى وقۋشىعا جەتۋ شىنايىلىقتى, ۋاقىتتى, الدىن الا ويلانۋ مەن ازىرلىكتى تالاپ ەتەدى. كريتەريالدى باعالاۋ, بەلسەندى وقۋ مەن وقىتۋ, وقىتۋداعى سارالاۋ, وقۋ مەن وقىتۋداعى جاڭاشا تاسىلدەر, باعالاۋ تاپسىرمالارىن ازىرلەۋ – قازىرگى وقىتۋدىڭ باستى تالاپتارى. مۇنى يگەرۋ ءۇشىن مۇعالىم بۇرىنعىداي 5 نەمەسە 3 جىلدا ءبىر رەت ەمەس, جىل سايىن ءبىلىمىن جەتىلدىرۋى كەرەك. بۇل رەتتە بىلىكتىلىك كۋرستارى مەملەكەت تاراپىنان تەگىن ءارى جۇيەلى وقىتىلۋدا. بۇعان جەرگىلىكتى قۇزىرلى ۇيىمدار, مەكتەپ اكىمشىلىگى دۇرىس كوزقاراسپەن قاراسا دەيمىز. سەبەبى ەلباسىمىزدىڭ ء«ومىر بويى ءبىلىم الۋ كرەدوعا اينالۋى ءتيىس» دەگەن ويى اقيقاتقا اينالىپ كەلە جاتىر.
ارينە, كەلەسى ماسەلە – جالاقىنى كوبەيتۋ. جاس ماماندار 60 مىڭ تەڭگە ايلىقپەن قالاي كۇن كورەدى؟ جاسىراتىنى جوق, بۇل ماماندار اتا-اناسى, تۋىستارىنىڭ كومەگىمەن قالت-قۇلت ەتىپ كۇن كەشۋدە. ايتۋعا ۇيالاتىن سىنىپ جەتەكشىسىنىڭ ماردىمسىز اقشاسى تاعى بار. «شىنىمەن ەلىمىزدە بۇل قىزمەتتىڭ ولشەمى مەن باعاسى وسى ما؟» «الدە شەتىنەن وسىعان تۇرارلىق ماماندار مەن ادامدار ما؟» دەگەن ساۋال ءار كوكىرەكتە سايراپ تۇر.
بۇگىنگى ۇرپاقتى وقىتۋ مەن تاربيەلەۋ وتە قيىن دا نازىك قۇبىلىسقا اينالدى. ۇدەرىس بولعان جەردە داۋ-دامايلار, كەلىسپەۋشىلىكتەر بولادى. بۇل كوبىنەسە اتا-انا مەن وقۋشى پايداسىنا شەشىلىپ جاتادى. سول كەزەڭدە مۇعالىم نە باسشىسىنان, نە ارىپتەسىنەن قولداۋ كورە الماي بەيشارا كۇن كەشەتىنى راس. مۇعالىم قۇقىعىن قورعاۋ ابدەن كەرەك. وسى ماسەلەنى ەستىپ قۋانىپ قالعان جاعدايىمىز بار.
سونداي-اق رەسپۋبليكا دەڭگەيىندە اتاق العان مۇعالىمدەرگە دە ۇستەماقى قاراستىرىلۋى كەرەك. سەبەبى اتالعان دەڭگەيدى ولار كۇنى-ءتۇنى قاعاز كەمىرىپ, وقۋلىقپەن قوسا, وقۋ-ادىستەمەلىك كەشەن, قۇرالدار جازىپ, بايقاۋلارعا قاتىسىپ, شاكىرتتەرىن بايگەگە قوسىپ باعىندىردى. ونىمەن قوسا جىل سايىن onlinە تارتىبىندە ساباق بەرەدى.
مۇعالىمنىڭ دەنساۋلىعى دا نازاردان تىس قالىپ قويادى. جىل سايىن ءبىر مارتە تولىق مەديتسينالىق تەگىن ەم مەن الدىن الۋ شارالارى مەملەكەت تاراپىنانان ەسكەرىلسە ەكەن دەيمىز. قوعامدىق كولىكتە جۇرۋگە مۇعالىمدەرگە پايىزدىق جەڭىلدىك جاسالۋى ءتيىس دەپ ويلايمىز.
زەينەتكەرلىك جاستىڭ مۇعالىمدەر ءۇشىن باسقاشا قاراستىرىلىپ جاتقانىن قۇپتايمىز. مۇعالىمدى قۇرمەتتى دەمالىسقا ەرتەرەك شىعارعانى دۇرىس. سەبەبى كۇندە وزگەرىپ جاتقان قوعامدا جاس ۇرپاققا ءبىلىم مەن تاربيە بەرۋ كۇش-جىگەرى بار لايىقتى مامانداردىڭ قولىندا بولعانى جاقسى.
گۇلميرا رىسكەلديەۆا,
شونا سماحان ۇلى اتىنداعى №62 گيمنازيا ديرەكتورىنىڭ وقۋ ءىسى جونىندەگى ورىنباسارى
الماتى