قانىش ساتباەۆ ۋنيۆەرسيتەتىندە «قازاقتار ەكىنشى دۇنيەجۇزىلىك سوعىستا: شەتەلدىك ارحيۆتەردىڭ قۇجاتتارى» قۇجاتتار جيناعىنىڭ تانىستىرىلىمى ءوتتى.
«رۋحاني جاڭعىرۋ» باعدارلاماسىن ىسكە اسىرۋ مەن ەلباسىنىڭ « ۇلى دالانىڭ جەتى قىرى» ماقالاسىندا كورسەتىلگەن «ارحيۆ-2025» تۋرالى ۇسىنىستارىن قولداۋ ماقساتىندا ۇيىمداستىرىلعان شارا اياسىندا عالىمدار زەرتتەۋلەرىنىڭ ناتيجەسىندە جارىققا شىققان جيناققا قاتىستى ماڭىزدى دەرەكتەر اشىلدى.
جيناقتىڭ ءى تومىندا قازاقتاردىڭ ەۆروپا ەلدەرىندەگى ەكىنشى دۇنيەجۇزىلىك سوعىسقا قاتىسۋ تاريحىنا جۇرگىزىلگەن كەشەندىك عىلىمي زەرتتەۋلەردىڭ ناتيجەلەرى جاريالانعان. جيناق ۇلىبريتانيا, فرانتسيا, نورۆەگيا, رەسەي, فينليانديا سەكىلدى ەلدەردىڭ 15 شەتەلدىك ارحيۆتەرى مەن كىتاپحانالارى جانە مۇراجايلارىنان الىنعان قۇجاتتىق ماتەريالداردان قۇرالعان. سونداي-اق ءى تومعا سول سوعىسقا كۋا بولعان ادامداردىڭ جەكە ارحيۆتىك قۇجاتتارى دا ەنگىزىلدى. ولاردىڭ قاتارىندا العاش جاريالانعان دەرەكتەر دە بار.
قازاقستاندىق عالىمدار وسى زەرتتەۋلەر بارىسىندا مالىمەتتەردى جۇيەلى جانە كەشەندى قامتۋعا, ارحيۆتىك جانە ەستەلىك قۇجاتتارعا سۇيەنە وتىرىپ, قازاقتاردىڭ ءىى دۇنيەجۇزىلىك سوعىسقا قاتىسۋ جولدارىن ناقتى سۋرەتتەۋگە تىرىسقان.
جيناقتى قۇراستىرۋشىلاردىڭ ءبىرى, تاريح عىلىمدارىنىڭ دوكتورى, پروفەسسور گۇلنار مەڭدىقۇلوۆا جيناقتىڭ ماڭىزدىلىعىن اتاپ ءوتتى. «اسكەري ادامدار اراسىندا «سوڭعى اسكەر سوعىستان ورالعانشا, سوعىس اياقتالدى دەپ ايتۋعا بولمايدى» دەگەن قاعيدات بار. تاريحي دەرەكتەر بويىنشا, ەكىنشى دۇنيەجۇزىلىك سوعىستا حابارسىز كەتكەندەر قاتارىندا 350-دەن 600 مىڭعا دەيىن قازاقتار بار. ەسىمدەرى ءبىرىنشى تومدا جاريالانىپ وتىرعان بىرنەشە مىڭ ادامدار قازىر تابىلىپ وتىر. ەندى ولاردى ۇيلەرىنە قايتتى دەپ ساناۋعا بولاتىنىن ەرەكشە اتاپ وتكىم كەلەدى» دەپ اتاپ ءوتتى عالىم.
تاريحي عىلىمداردى, اسكەر تاريحىن, الەۋمەتتىك عىلىمدار سالاسىن قامتيتىن زەرتتەۋ ناتيجەلەرى ءبىلىم بەرۋ جۇيەسىندە دە قولدانىلادى.
ەلۆيرا سەرىكقىزى,
«ەگەمەن قازاقستان»
الماتى