10 ناۋرىز كۇنى فۋتبولدان قازاقستاننىڭ ءححى چەمپيوناتى باستالادى
بيىلعى ماۋسىمعا «شاحتەر» (قاراعاندى), «جەتىسۋ» (تالدىقورعان), «اقتوبە» (اقتوبە), «استانا» (استانا), «ەرتىس» (پاۆلودار), «ورداباسى» (شىمكەنت), «قايسار» (قىزىلوردا), «اتىراۋ» (اتىراۋ), «تاراز» (تاراز), «توبىل» (قوستاناي), «قايرات» (الماتى) پەن ءبىرىنشى ليگادان وتكەن كوكشەتاۋدىڭ «وقجەتپەس», ورالدىڭ «اقجايىق» جانە قاسكەلەڭنىڭ «سۇڭقار» كوماندالارى قاتىسادى. وسى كوماندالار جىل سوڭىنا دەيىن ءبىر-بىرىمەن ءوز الاڭىندا جانە سىرت الاڭدا ەكى رەتتەن ويناپ, چەمپيون جانە ءجۇلدەگەر كوماندالاردى انىقتايدى.
10 ناۋرىز كۇنى فۋتبولدان قازاقستاننىڭ ءححى چەمپيوناتى باستالادى
بيىلعى ماۋسىمعا «شاحتەر» (قاراعاندى), «جەتىسۋ» (تالدىقورعان), «اقتوبە» (اقتوبە), «استانا» (استانا), «ەرتىس» (پاۆلودار), «ورداباسى» (شىمكەنت), «قايسار» (قىزىلوردا), «اتىراۋ» (اتىراۋ), «تاراز» (تاراز), «توبىل» (قوستاناي), «قايرات» (الماتى) پەن ءبىرىنشى ليگادان وتكەن كوكشەتاۋدىڭ «وقجەتپەس», ورالدىڭ «اقجايىق» جانە قاسكەلەڭنىڭ «سۇڭقار» كوماندالارى قاتىسادى. وسى كوماندالار جىل سوڭىنا دەيىن ءبىر-بىرىمەن ءوز الاڭىندا جانە سىرت الاڭدا ەكى رەتتەن ويناپ, چەمپيون جانە ءجۇلدەگەر كوماندالاردى انىقتايدى.
بايقاپ وتىرساڭىزدار, بيىلعى ماۋسىمعا بۇرىنعىداي 12 كوماندا ەمەس, 14 كلۋب قاتىسقالى وتىر. بۇل دا ءبىزدىڭ چەمپيوناتتىڭ جىلدان-جىلعا قارقىن الىپ, جانكۇيەرلەردىڭ ءوزىمىزدىڭ جارىستارعا قىزىعۋشىلىقتارىن ءبىلدىرىپ جاتقانىن كورسەتسە كەرەك.
ال بيىلعى ماۋسىمعا كوماندالاردىڭ دايىندىعىن جاقسى دەپ باعالاۋعا بولادى. ويتكەنى, كوماندالاردىڭ ءبارى بىلتىردان بەرى جىلى جاقتاردا وقۋ-جاتتىعۋ جيىندارىن وتكىزىپ, قاتارلارىن تاجىريبەلى ويىنشىلارمەن تولىقتىرىپ الدى. دەسەك تە, ءدال قازىر قاي كوماندانىڭ ەل چەمپيونى اتاناتىنىن, ۇزدىكتەر قاتارىنا قاي كلۋبتىڭ كىرەتىنىن ايتۋ قيىن. بيىلعى ماۋسىمدا ءبىرىنشى ليگاعا ءتۇسىپ قالاتىن كوماندالاردى دا بولجاپ ايتا المايمىز.
قازىر كوماندالارعا جەرگىلىكتى بيۋدجەتتەن جانە دەمەۋشىلەردىڭ كومەگىمەن ءتيىستى قاراجات ءبولىنۋدە. ونىڭ سەبەبى دە ءتۇسىنىكتى. ءبارى ءوز وكىلدەرىنىڭ قامىن ويلاپ, ءۇزدىكتەر قاتارىنان كورىنگەنىن قالايدى.
ماسەلەن, وتكەن جىلعى چەمپيون «شاحتەردى» الايىق. بۇل كوماندانى دامىتۋعا بيۋدجەتتەن 477 ملن. تەڭگە بولىنگەن. وعان «ارسەلور ميتتال تەمىرتاۋ» مەن «ENRC-كومەك» كومپانياسى دا كومەك قولىن سوزىپ وتىر. سونداي-اق, قىزىلوردانىڭ «قايسار» كلۋبى دا قالتاسىن تولىقتىرىپ الدى. بيىل كومانداعا سپورتقا جانى اشيتىن وبلىس اكىمدىگى قوماقتى قاراجات بولگەن. بىلتىر كلۋبتىڭ بيۋدجەتى 350 ملن. تەڭگە بولسا, بيىل ول 574 ملن. تەڭگەگە جەتتى. تاعى ايتاتىن نارسە, وبلىستا «قايساردىڭ» قامقورشىلار كەڭەسى جۇمىس ىستەيدى. وعان كىرەتىن وبلىس اكىمدىگى, ۇلكەن كومپانيالار, كاسىپكەرلەر مەن جەكەلەگەن دەمەۋشىلەر كومانداعا قولداۋ كورسەتىپ وتىرادى.
باسقا كوماندالارعا كەلسەك, بيىلدان باستاپ پرەمەر-ليگادا وينايتىن «اقجايىق», «وقجەتپەس» جانە «سۇڭقار» كلۋبتارى دا جاڭا ماۋسىمعا جان-جاقتى دايىندىقپەن كەلدى. سونىڭ ءىشىندە ورالدىق كوماندا وتكەن جىلى قازاقستان فۋتبول فەدەراتسياسىنىڭ پرەمەر-ليگانىڭ كوماندالار سانىن 14-كە كوبەيتۋ تۋرالى شەشىمىنە بايلانىستى ءبىرىنشى ليگاداعى ءتورتىنشى ورىننان ىلىككەن بولاتىن. وسىنى باعالاي بىلەتىن كوماندا بيىلعى ماۋسىمدا پرەمەر-ليگادا قالۋ ءۇشىن بار كۇش-جىگەرىمىزدى سالامىز دەپ وتىر. «سۇڭقار» مەن «وقجەتپەستەگى» جاعداي دا سولاي. ولار فاۆوريت بولماسا دا اۋتسايدەر بولماۋعا كۇش سالماق.
ال چەمپيوناتتىڭ فاۆوريتتەرىنىڭ قاتارىنا بىلتىرعى چەمپيون – «شاحتەر», «استانا», «جەتىسۋ» جانە «اقتوبە» كوماندالارىن جاتقىزۋعا بولادى. سونداي-اق, وتكەن جىلعى ماۋسىمدى التىنشى ورىنمەن اياقتاعان شىمكەنتتىڭ «ورداباسى» كلۋبىن دا مىقتىلار قاتارىنا قوسقان ءجون. قازىر ولاردىڭ ءبارى قاتارىن ءبىراز تاجىريبەلى ويىنشىلارمەن تولىقتىرىپ الدى. ماسەلەن, بۇرىن قوستانايدىڭ كوكمايسا الاڭدارىندا الا دوپتى شىرەنە تەپكەن نۇربول جۇماسقاليەۆ «استانادان» «توبىلعا», ازات نۇرعاليەۆ «ورداباسىدان» «جەتىسۋعا» قايتا ورالدى. ال وسى كەزگە دەيىن ءتۇركيانىڭ «ديارباكىرسپور» كلۋبىندا ويناعان ءالي اليەۆ بولسا, ءوزىنىڭ تۋعان كومانداسى – «قايراتقا» ەمەس, پاۆلوداردىڭ «ەرتىسىنە» كەلدى. وسى كوماندانىڭ ساپىن تاعى ۇلىقبەك باكاەۆ تولىقتىردى. ءسويتىپ, كەزىندە ارابتاردىڭ قىزىل اقشاسىنا قىزىققان وزبەك لەگيونەرى ءباا-ءنىڭ «دۋباي كلاب» كومانداسىندا ءبىر ماۋسىم عانا ويناپ, ءوزبەكستانعا ەمەس, قازاقستانعا قايتا كەلۋدى ءجون كورىپتى.
P.S. بيىلعى ماۋسىمدا كوماندالار «تانگو 12» دوبىمەن وينايتىن بولادى. 2012 جىلعى ەۋروپا چەمپيوناتىنىڭ رەسمي دوبى كەشە كەشكە «استانا-ارەنا» ستاديونىندا قازاقستان سۋپەركۋبوگىن ساراپقا سالعان «ورداباسى» مەن «شاحتەر» كوماندالارىنىڭ ويىنىندا سىناقتان ءوتتى.