قازاقستانداعى ادام قۇقىقتارى جونىندەگى ۋاكىل اسقار شاكىروۆ قازاقستان پرەمەر-مينيسترىنە بيلىكتىڭ اتقارۋشى ورگاندارىنىڭ ۇلتتىق قۇقىق قورعاۋ مەكەمەسىمەن ءوزارا ءىس-قيمىلىنىڭ وزەكتى ماسەلەلەرى بويىنشا جۇگىندى.
ومبۋدسمەن پرەمەر-مينيستر باقىتجان ساعىنتاەۆقا جولداعان ۇندەۋىندە اتقارۋشى بيلىك ورگاندارىنىڭ ۇلتتىق قۇقىق قورعاۋ مەكەمەسىمەن ءوزارا ءىس-قيمىلىن وڭ سيپاتتاي كەلىپ, بىرقاتار ماڭىزدى ماسەلەلەرگە نازار اۋدارعان.
ومبۋدسمەن جۇيەلى سيپاتقا يە ۇندەۋلەرى مەن ۇسىنىمدارى ورتالىق مەملەكەتتىك ورگاندار تاراپىنان بىرنەشە رەت تيىسىنشە قاراستىرىلماعانىنا ۇكىمەت باسشىسىنىڭ نازارىن اۋدارعان. وسىعان بايلانىستى ۇلتتىق قۇقىق قورعاۋ مەكەمەسىنىڭ ۇندەۋ حاتتارى ازاماتتاردىڭ شاعىمدارى مەن وتىنىشتەرىنىڭ تالداماسىنان نەگىزدەلگەنى, سونداي-اق وندا قازاقستان پرەزيدەنتىنىڭ مەملەكەتتىك باعدارلامالار شەڭبەرىندەگى تاپسىرمالارىنا تىكەلەي ساي كەلەتىن نىسانالى ۇسىنىستار قامتىلعانى اتاپ كورسەتىلگەن.
وسىلايشا, مەملەكەت باسشىسىنىڭ بيىلعى 5 قازاندا قازاقستان حالقىنا ارناعان جولداۋىندا ازىرلەۋدى تاپسىرعان «جول كارتاسىنا» مەكتەپكە دەيىنگى مەكەمەلەردىڭ قىزمەتىن جەتىلدىرۋدىڭ ناقتى ۇسىنىمدارى ۇكىمەتكە قاراۋ ءۇشىن ۇسىنىلدى. بۇعان دەيىن باسقا دا وزەكتى ماسەلەلەر بويىنشا, اتاپ ايتقاندا «التىن القا» بەلگىسىمەن ماراپاتتالعان كوپ بالالى انالاردىڭ مەملەكەتتىك تۇرعىن ءۇي قورىنان ءبىرىنشى كەزەكتە تۇرعىن ءۇي الۋ قۇقىعىن ىسكە اسىرۋدا قۇقىقتىق كولليزيانى جويۋ, سونداي-اق سانيتارلىق-ەپيدەميولوگيالىق جانە تەحنيكالىق تالاپتارعا ساي كەلمەيتىن تۇرعىن ءۇي ۇسىنىلعان ازاماتتاردى ەسەپكە قويۋ ماسەلەلەرى بويىنشا ۇندەۋ حاتتار جىبەرىلگەن بولاتىن.
جولدىباي بازار,
«ەگەمەن قازاقستان»