س.مۇقانوۆ اتىنداعى قازاق سازدى-دراما تەاترىنىڭ ترۋپپاسى بۋحارەست قالاسىندا وتكەن «بۋليۆارداعى تەاتر فەستيۆالى» شاراسىنا ارنايى شاقىرتۋمەن قاتىسىپ, 1986 جىلعى جەلتوقسان كوتەرىلىسىنىڭ جەلىسىمەن ساحنالانعان «86» سپەكتاكلىن قويدى.
بولگاريا, يتاليا, رەسەي, فرانتسيا جانە تاعى دا باسقا ەلدەردىڭ تەاتر تارلاندارىمەن تەرەزەسى تەڭ ونەر كورسەتكەن جەرلەستەرىمىز شەتەلدىكتەردىڭ ەرەكشە ءىلتيپاتىنا بولەندى. 2000 جىلدان بەرى جۇمىس ىستەپ كەلە جاتقان ۇجىم ومىرىندە ايشىقتى ساتتەر كوپ. 2003 جىلى العاش رەت كاير قالاسىندا ۇيىمداستىرىلعان حالىقارالىق فەستيۆالگە قاتىسىپ, العاشقى قادامى جوعارى باعالانعان بولاتىن. ەندى,مىنە, قازاقستان اتىنان جالعىز بارعان ونەر وشاعى ەۋروپا تورىندە دە دە ايشىقتى ءىز قالدىردى.
«بيىل الماتىدا وتكەن حالىقارالىق فەستيۆالدا ءبىز ساحنالاعان «86» قويىلىمى وسى شارانى ۇيىمداستىرۋشى ارالۋكا حانىمعا ۇناپ قالسا كەرەك, رۋمىنياعا كەلۋىمىزدى قاتتى وتىنگەن بولاتىن. ونداعى كورەرمەندەر قازاق ءتىلىن تۇسىنبەسە دە, ساحناداعى ارەكەتتەرگە, مۋزىكالىق ۇيلەسىمدىلىككە, اۋەزدى اندەرگە كەرەمەت ەموتسيالىق كوڭىل-كۇيمەن جاۋاپ بەرىپ, دۋ قول شاپالاقپەن قوشەمەت ءبىلدىرىپ وتىردى», دەيدى س. مۇقانوۆ اتىنداعى قازاق سازدى-دراما تەاترىنىڭ ديرەكتورى ءبىرجان جالعاسباەۆ.
تەاتر قاراشا ايىندا وتەتىن قازاقستان مەن رەسەي اراسىنداعى 15-ءشى وڭىرارالىق ىنتىماقتاستىق فورۋمىنا ارنايى قويىلىم ۇسىنباق.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى