ەۋرازيالىق توپ (ERG) قۇرامىنداعى سوكولوۆ-سارىباي كەن ءوندىرۋ بىرلەستىگىنىڭ ەكولوگيا جانە جەر قويناۋىن پايدالانۋ دەپارتامەنتىنىڭ قولداۋىمەن رۋدنىيداعى №19 ورتا مەكتەپتە پلاستيكتى جەرگىلىكتى وڭدەۋ شەبەرحاناسى اشىلدى.
بۇدان بىلاي وقۋشىلار تۇرمىسقا قاجەتتى زاتتاردى پلاستيكتەن وزدەرى جاساي الادى. بۇل «جاستار» قوعامدىق بىرلەستىگى مەن سسكوب ەكولوگيا جانە جەر قويناۋىن پايدالانۋ دەپارتامەنتىنىڭ ارىپتەستىگى ناتيجەسىندە مۇمكىن بولىپ وتىر. وقۋ ورنىندا وتكەن وتكەن شەبەرحانا تۇساۋكەسەرىندە ەكوبەلسەندىلەر سسكوب-ءتىڭ قارجىلاي كومەگىمەن قۇرىلعان مامانداندىرىلعان «تانىمدى ەكولوگيا جانە ەنەرگيا ۇنەمدەۋ ورتالىعى» سىنىبىن كورسەتتى. جوبانىڭ نەگىزى رەتىندە گوللانديالىق ەكولوگ-ونەرتاپقىش دەيۆ حاككەنستىڭ تەحنولوگياسى الىنعان.
«2019 جىلدان باستاپ قازاقستاندا پلاستيك قالدىقتاردى پوليگوندا كومۋگە تىيىم سالىنادى. بۇگىندە قازاقستاندا قوقىستاردى سۇرىپتايتىن ەكى زاۋىت قانا بار ونىڭ ءبىرى استانادا جانە ەكىنشىسى الماتىدا جاقىندا عانا اشىلدى. سول سەبەپتى قوقىستى قايتا وڭدەۋ ماسەلەسى وتكىر تۇر. قوقىستاردى جينايتىن جانە سۇرىپتايتىن ۇيىمداردىڭ كوپشىلىگى پلاستيك ونىمدەرىن قايتا وڭدەۋمەن اينالىسپايدى. تەك رەسەي مەن قىتايعا قايتا ساتۋ ءۇشىن قايتالاما شيكىزاتتى شىعارادى. ءبىز, تىم بولماعاندا, باستاپقى دەڭگەيدە پلاستيك قالدىقتاردى قايتا وڭدەپ, ودان جاڭا ءونىم ءوندىرۋدى ۇيرەنۋىمىز كەرەك» دەيدى «جاستار» قوعامدىق جاستار بىرلەستىگىنىڭ توراعاسى ماكسيم فرولوۆ.
جوبانى جۇزەگە اسىرۋ ءۇشىن ستانوكتار ساتىپ الىندى. دەيۆ حاككەنس ويلاپ تاپقان تەحنولوگيا بالقىتىلعان پلاستيكتەن جاڭا فورمالاردى قۇراستىرۋعا بولاتىن 3D-پرينتەردىڭ جۇمىس پرينتسيپىنە ۇقسايدى. ءوزىنىڭ جوباسى دەيۆ Precious Plastic – «قۇندى پلاستيك» دەپ اتادى.
ساتىپ الىنعان جابدىقتار گۇل وسىرەتىن قۇمىرالار, شەلەكتەر, ىدىستار, پلافوندار, پرينتەرگە ارنالعان ءجىپ, ينتەرەرلىك پليتكالار مەن تاعى دا باسقا قاجەتتى زاتتاردى شىعارۋعا مۇمكىندىك بەرەدى.
ءنازيرا جارىمبەت,
«ەگەمەن قازاقستان»
رۋدنىي