وبلىس ورتالىعىنداعى ە.ومىرزاقوۆ اتىنداعى وبلىستىق فيلارمونيانىڭ كونتسەرت زالىندا ينە شانشار ورىن جوق. مۇندا قوستانايلىقتار «توبىلىم – تورعايىم, جۇرەكتەن جىرلايىن!» اتتى رەسپۋبليكالىق ايتىستى تاماشالاۋعا جينالدى.
«رۋحاني جاڭعىرۋ باعدارلاماسى اياسىندا ءوتىپ جاتقان ايتىس باتىر شاقشاق جانىبەكتىڭ 325 جىلدىعى, اقىن اقسۇلۋ ورىسبايقىزىنىڭ 145 جىلدىعى جانە اقىن, عالىم قاينەكەي جارماعامبەتوۆتىڭ 100 جىلدىعىنا ارنالدى. الامان دودادا ەسىمى ەلىمىزگە تانىمال ايتىس اقىندارى مۇحتار نيازوۆ, قازىرەت بەردىحان, ايبەك قاليەۆ, مەيىربەك سۇلتانحان, سالتانات وتەلباەۆا, اسەم ەرەجەقىزى, شۇعايىپ سەزىمحان, توبا وتەپباەۆ, باتىرلان ساعىنتاەۆ, ازامات ءمالجانباي, مەدەت بايزاقوۆ, مارات احمەتوۆ, قانات مىرزاحان, مارعۇلان وسپانوۆ ونەر كورسەتەدى.
ادىلقازىلار القاسىنىڭ قۇرامىندا حالىق اقىندارى ءاسيا بەركەنوۆا مەن اسەلحان قالىبەكوۆا, «الاش» سىيلىعىنىڭ لاۋرەاتى اقىلبەك شاياحمەت, اقىن نۇرقانات قۇلاباەۆ, ايتىس اقىنى باۋىرجان قاليوللا بار. جىر دوداسىن قازاقستاننىڭ ەڭبەك سىڭىرگەن قايراتكەرى, اقىن ءجۇرسىن ەرمان جۇرگىزىپ وتىر.
«ايتىس وبلىس اكىمى ارحيمەد مۇحامبەتوۆتىڭ تىكەلەي قولداۋىمەن ءوتىپ وتىر. قوستانايدا ءبىرىنشى ايتىس 1943 جىلى وتكەن ەكەن, وعان دا بيىل 75 جىل تولدى, وڭىردەن شىققان ءىرى تۇلعالاردىڭ مەرەيجاسىمەن قاتار, وسى بۇل دا ەسكەرەر مارتەبە دەپ بىلەمىز. بۇل ايتىسقا ءجۇرسىننىڭ جەتى جۇيرىگىنە قوستاناي جەتى جۇيرىگىن قوسىپ وتىر» دەدى جۇرتشىلىقتى ايتىستىڭ باستالۋىمەن قۇتتىقتاعان وبلىستىق مادەنيەت باسقارماسىنىڭ باستىعى ەرلان قالماقوۆ.
ايتىس ەرتەڭ جالعاساتىن بولادى, جىر جۇيرىكتەرىنىڭ دە اتى ەرتەڭ اتالادى.
ءنازيرا جارىمبەت,
«ەگەمەن قازاقستان»
قوستاناي