قازاقستان پاتريوتتارى پارتياسىنىڭ بەلسەندىلەرى كەشە الماتى وبلىسىنىڭ تالعار اۋدانىندا بولىپ, ءبىرقاتار كەزدەسۋلەر وتكىزدى. سونداي كەزدەسۋدىڭ ءبىرى «اسەم ي ك» كومپانياسىنىڭ قۇرىلىسشىلارىمەن بولدى.
اتالعان قۇرىلىس كومپانياسىن پاتريوتتار پارتياسى اتىنان ءماجىلىس دەپۋتاتتىعىنا كانديدات سەرىك ايتحوجين باسقارادى. ونىڭ قول استىندا جۇمىس ىستەيتىندەردىڭ باسىم كوپشىلىگى تالعاردىڭ تۇرعىندارى بولعاندىقتان, وسىندا كوپتەپ جۇمىس ورىندارىنىڭ اشىلعانىن, جاڭا كاسىپورىندار ىسكە قوسىلعانىن قالايتىندىقتارىن دا ءبىلدىرىپ جاتتى. ءاسىرەسە, تالعارلىقتار ۇكىمەت ءجۇزەگە اسىرىپ جاتقان يندۋستريالاندىرۋ باعدارلاماسىنداعى باسىم سانالاتىن جوبالار قاعاز جۇزىندە قالماسا ەكەن دەگەن ويلارىن دا بۇكپەسىز جەتكىزگەن. سونداي-اق تابيعاتى سۇلۋ تالعار جەرىندە ەكولوگيا ماسەلەسى دە نازاردان تىس قالماعان.
«تابيعات» ەكولوگيالىق وداعىنىڭ توراعاسى مەلس ەلەۋسىزوۆ پەن ونىڭ ورىنباسارى ايجان سقاقوۆا ەكولوگيا ءماسەلەسىن وتكىر كوتەرگەنى بەلگىلى بولدى. ا.سقاقوۆا ءوز سوزىندە تالعاردى وڭتۇستىك ءوڭىردىڭ مارجانى دەي كەلىپ, مۇندا تۋريزم سالاسىن جولعا قويۋ قاجەتتىگىن ورتاعا سالدى. قىسقى ازيا ويىندارىنا ارنالىپ سالىنعان سپورت نىساندارىنىڭ جۇمىسىن ارى قاراي دا ءجۇرگىزە بەرۋ قاجەتتىگى كولدەنەڭ تارتىلدى. سولدات شاتقالىنداعى بياتلونعا ارنالعان جەرلەر, شاڭعىمەن سىرعانايتىن ورىندار دەمالۋشىلاردىڭ يگىلىگىنە جۇمىس ىستەۋى ءتيىس.
تۇرعىنداردىڭ ەرەكشە قوزعاعان ماسەلەسى اۋىل شارۋاشىلىعى مينيسترلىگى وسى وڭىرگە كوڭىل اۋدارىپ, اۋىل شارۋاشىلىعى ءونىمدەرىن ءوندىرۋشىلەرگە دەگەن كوزقاراستارىن تۇبەگەيلى وزگەرتۋى قاجەتتىگى. ويتكەنى, الما مەن المۇرتتىڭ ءوزىن وتكىزەتىن جەر بولماعاندىقتان, شاراپ جاسايتىن زاۋىتقا جونەلتىپ جاتادى. وسى جەمىستەردى بالاباقشالار مەن مەكتەپتەرگە جەتكىزۋ جايى, ونىڭ ساقتالۋى, تاعىسىن تاعى جايتتەر جۇيەلى ءتۇردە شەشىمىن تاپپاعان. مۇنىڭ بارلىعى, ارينە, جانار-جاعار ماي قىمباتشىلىعىنا بايلانىستى بولىپ وتىرعانى دا جاسىرىن ەمەس.
پاتريوتتىقتار, سونىمەن قاتار, تالعار قالاسىنداعى زاعيپتار قوعامىندا بولىپ, وسىنداعى جاعدايدى ءوز كوزدەرىمەن كورىپ, جۇمىسىمەن تانىستى. مۇندا ارنايى تسەح بار, بىراق جۇمىس ورنىنىڭ كوپ بولعانى دۇرىس بولار ەدى دەگەن وتىنىشتەر دە ەستىلىپ قالدى. سونداي-اق ناسيحات توبى وسىنداعى بالالار ۇيىندە دە بولىپ, ولاردىڭ جاعدايىمەن تانىستى. اتالعان بالالار ءۇيى بارىنشا وتباسىلىق جاعدايعا جاقىنداتىلعان, ياعني بالالار اتا-انالارىمەن بىرگە تۇرىپ جاتقانداي جاعدايدا ءومىر ءسۇرۋدە ەكەن. ءبىز ءوز تاراپىمىزدان بالالارعا ءار ءتۇرلى جەمىستەردى الىپ بارىپ, ولاردى ءبىر قۋانتىپ تاستادىق, دەپ سىر ءبولىستى پاتريوتتار پارتياسىنىڭ الماتى قالالىق كوميتەتىنىڭ ءبىرىنشى حاتشىسى گۇلدانا نۇرپەيىسوۆا. ونىڭ سوزىنە قاراعاندا, قازىر وسى بالالار ماسەلەسىنە مەملەكەت قولداۋ كورسەتەتىندەي تەتىكتەردى قاراستىرۋ كەرەك. ەگەر پارتيا الداعى سايلاۋدا ءماجىلىسكە وتەتىندەي بولسا, وندا الدىمەن وسى جەتىمدەر ءماسەلەسىن وتكىر قوياتىندىقتارىن دا جاسىرمادى.
اسقار تۇراپباي ۇلى.