تاۋەلسىزدىگىمىزدى ۇلىقتاپ, جاسامپاز ەلىمىزدىڭ تاتۋلىعىن ساقتاۋ بارلىعىمىزدان كۇش-جىگەرىمىزدى ايانباي جۇمساۋدى تالاپ ەتەتىندىگى اقيقات.
تاۋەلسىزدىكتىڭ 20 جىلى قازاقستان, قازاق حالقى ءۇشىن الەۋمەتتىك-ەكونوميكالىق, ساياسي جانە رۋحاني جاڭارۋ كەزەڭى بولدى. تاريحتىڭ ەنشىسىنە اينالىپ ۇلگەرگەن جيىرما جىلدا قازاقستان ساياسي بەلسەندىلىگىمەن الەمدىك قاۋىمداستىقتا الدىڭعى قاتارلى دامىعان ەلدەرمەن تەرەزەسى تەڭ مەملەكەتكە اينالدى. ەلىمىزدىڭ ەقىۇ-عا توراعالىق ەتۋى, بەدەلدى مەملەكەتتەر مەن حالىقارالىق ۇيىم وكىلدەرىنىڭ باسىن قوسقان استانا سامميتىنىڭ, الەمدىك جانە ءداستۇرلى دىندەر ليدەرلەرى ءىىى سەزىنىڭ ءوتۋى, يسلام ىنتىماقتاستىعى ۇيىمىنا توراعالىق ەتۋى, ايماقتىق, ونىڭ ىشىندە تمد اياسىندا ەكونوميكالىق بىرلەستىكتەر مەن ينتەگراتسيالىق ءۇردىستەردى دامىتۋ – وسىنىڭ ايعاعى.
تاۋەلسىزدىك بىزگە وڭايلىقپەن كەلگەن جوق. بىراق ونى ساقتاۋ, قورعاۋ جانە دامىتۋ ودان دا قيىن. سوندىقتان تاۋەلسىزدىكتىڭ ءناتيجەسىندە قول جەتكىزگەن قۇندىلىقتاردى ۋىسىمىزدان شىعارماي, ەڭبەكتەگى تابىستارىمىزبەن, قوعامدىق ومىردەگى بەلسەندى پوزيتسيامىزبەن ەسەلەي ءتۇسۋىمىز كەرەك. وسىنداي يگى ماقساتتار مەن ۇلاعاتتاردى جادىمىزدان شىعارماي دامىتۋدا جاڭاوزەندەگى ورىن العان كەلەڭسىز جاعدايدا جاستاردىڭ ازعىرۋشىلارعا ىلەسۋى, جازىقسىز ادامداردىڭ ءومىرىنىڭ قيىلۋى, عيماراتتار مەن الەۋمەتتىك نىسانداردىڭ قيراۋى قاتتى قىنجىلتىپ, نارازىلىعىمىزدى تۋدىردى. ەندى جاعدايدى تەز ارادا تولىق قالپىنا كەلتىرۋگە جۇمىلا كىرىسىپ, حالقىمىزعا ءتان سابىرلىلىق, بايسالدىلىق جانە پاراساتتىلىق تانىتايىق. سوندا كەز كەلگەن ماسەلەنى شەشۋگە بولادى.
مەن ەلباسى ن.نازارباەۆتىڭ ماڭعىستاۋ وبلىسىنا, جاڭاوزەن قالاسىنا ساپارىنداعى ايتقان سوزدەرىنەن وسىنى ۇقتىم. «اداسقاننىڭ الدى ءجون, ارتى سوقپاق» دەگەن. ەلباسىنىڭ ساليقالى ساياساتىن قولداپ, ماسەلەگە اينالعان ءاربىر ءتۇيىندى اقىل-پاراساتپەن شەشە بىلسەك, جاڭاوزەندەگى اشۋ-ىزا مەن سابىرسىزدىقتىڭ سالدارىنان ورىن العان قانتوگىس پەن عيماراتتاردى ورتەۋ, قاراپايىم ادامداردىڭ دۇنيەسىن توناۋ, ءبۇلدىرۋ دەگەن سوراقىلىقتار بولماس ەدى.
اعايىن, «اشۋ دۇشپان, اقىل دوس», تاۋەلسىزدىك جىلدارىنداعى تاريحىمىزدى زەردەلەپ, وي ەلەگىنەن وتكىزىپ, ەلىمىزدىڭ الەمدىك ارەناداعى بۇگىنگى جەتىستىكتەرىنە قۇرمەتپەن قارايىق. بەيبىت حالقىمىزدىڭ تىنىشتىعى مەن سابيلەردىڭ سىڭعىرلاعان كۇلكىسى ءاربىر قازاقستاندىق ءۇشىن قىمبات. سوندىقتان, ەلباسىنىڭ سارابدال ساياساتىن قولداۋ, ەلىمىزدىڭ قارىشتاپ دامۋىنا ۇلەسىمىزدى قوسۋ – ءاربىر قازاقستاندىقتىڭ مىندەتى. ەڭسە تىكتەتەر ەلدىكتىڭ ۇلگىسى دە وسىندايدا كورىنەدى ەمەس پە؟!.
اسقار ءابدۋالى, تاراز مەملەكەتتىك پەداگوگيكالىق ينستيتۋتىنىڭ رەكتورى, تاريح عىلىمدارىنىڭ دوكتورى, پروفەسسور.
جامبىل وبلىسى.