ۇلتتىق مۋزەيدە ەلىمىزدەگى قىتاي حالىق رەسپۋبليكاسىنىڭ ەلشىلىگى مەن قازاقستان رەسپۋبليكاسى ۇلتتىق مۋزەيى بىرلەسىپ ۇيىمداستىرعان «تاڭعاجايىپ قىتاي. اسپان استى ەلىنىڭ كورىكتى جەرلەرى» اتتى فوتوكورمەنىڭ سالتاناتتى اشىلۋى ءوتتى.
سولتۇستىك جانە ورتالىق قىتاي پروۆينتسيالارىنىڭ الەۋمەتتىك, ەكونوميكالىق جانە مادەني سالالارداعى زور جەتىستىكتەرى مەن ەكولوگيالىق ورتانى قورعاۋ جانە تۇراقتى دامۋدى قامتاماسىز ەتۋ ىسىندەگى قۇندى تاجىريبەسىن ايعاقتايتىن سۋرەتتەر توپتاماسى قويىلعان كورمەنىڭ اشىلۋ سالتاناتىندا قىتاي حالىق رەسپۋبليكاسى ەلشىلىگىنىڭ سەنىمدى وكىلى ليۋ يزيان پين: «قىتاي حالىق رەسپۋبليكاسىنىڭ قازاقستانداعى ەلشىلىگىنىڭ اتىنان وسى شارانى ۇيىمداستىرعان بارشاڭىزعا العىسىمدى ايتامىن.
وسى جىلدىڭ باسىندا قىتاي ەلشىلىگى ۇلتتىق مۋزەيمەن بىرلەسىپ, «تاڭعاجايىپ قىتاي» فوتوكورمەسىن ۇيىمداستىرعان بولاتىن. قىتايدىڭ ەرەكشە جانە سان الۋان مادەنيەتىن پاش ەتەتىن كورمەنىڭ كەلبەتىنەن ونىڭ اشىق ەسىك ساياساتىنىڭ 40 جىلدىق دامۋ جولىنداعى جەتىستىكتەرىن كورۋگە بولادى. ء«بىر بەلدەۋ, ءبىر جول» جوباسىن بىرگە سالىپ, ورتاق تاعدىرلار توعىسىندا الار اسۋلار مەن بيىك بەلەستەردى بىرگە باعىندىرامىز دەپ سەنەمىن», دەدى.
بەيجىڭ, تيانزين قالالارىنىڭ جانە حەنان, حۋبەي, حۋنان پروۆينتسيالارىنىڭ سوڭعى 40 جىل ىشىندەگى ساۋلەتتى كورىنىستەرى – كورمەنىڭ وزەگى. بەيجىڭ قالاسىنداعى ۇلى قىتاي قورعانى مەن تىيىم سالىنعان يمپەراتورلىق قالانىڭ تاريحي مۇراسىنان باستاپ, چجۋنگۋانتسۋن, بانك جانە قارجى كوشەسىنە دەيىنگى قىتاي استاناسىنىڭ ەسكى كورىنىسى مەن جاڭا كەلبەتىن تاماشالاي الاسىز. سونىمەن قاتار بەسىنشى اۆەنيۋدەگى شىعىس پەن باتىستىڭ ۇيلەسىمدى قوسپاسى, تيانحە-1 جانە تيانتسين پورتتارى سۇلۋلىعىمەن كوز تارتادى.
ليۋشانداعى شاولين, لونگمەن ۇڭگىرلەرىنىڭ مادەني مۇراسى مەن ەركىن ساۋدا ايماعى, چجەنچجوۋ اۋەجايىنىڭ بۇگىنگى كورىنىسى, حەنان پروۆينتسياسىنىڭ ەكونوميكالىق دامۋ ءۇردىسى فوتوگرافتاردىڭ وبەكتيۆىنە ءساتتى ىلىنگەن. شانحايگۋاننىڭ قارقىندى ءيمپۋلسى, پەكين-تايانتسين-حەبەي ينتەگراتسياسى, سۋناگ اۋدانىنىڭ جاڭا جوباسى, ءداستۇرلى قىتاي مۋزىكالىق ونەرى مەن اسپاپتارى دا كورمەدە كورىنىس تاپقان.
كورمەگە قويىلعان 100-دەن اسا تاڭداۋلى سۋرەتتەردەن سولتۇستىك جانە ورتالىق قىتايدىڭ تىرشىلىك تىنىسى مەن ءومىر اعىسىنان مول حابار العانداي بولاسىڭ. جاڭا زاماننىڭ ساۋلەت ونەرى مەن تەحنولوگيالىق دامۋى دا كىسى قىزىعارلىقتاي.
«تاڭعاجايىپ قىتاي» فوتوكورمەسىنىڭ توپتاماسى قىتايدىڭ سوڭعى بەس جىل ىشىندەگى قول جەتكىزگەن تاريحي جەتىستىكتەرىن جان-جاقتى اشىپ, رەفورما مەن ەكونوميكا, ساۋدا, كەدەيشىلىكپەن كۇرەس, عىلىم مەن تەحنيكا, يننوۆاتسيا, ترانسپورت, قورشاعان ورتانى قورعاۋ, سىبايلاس جەمقورلىقپەن كۇرەس, اسكەر قۇرىلىسى, سىرتقى بايلانىس سياقتى ساياسي ۇستانىمداردى دا ەركىن سەزىندىرەدى.
باعاشار تۇرسىنباي ۇلى,
«ەگەمەن قازاقستان»