كەشە ورتالىق كوممۋنيكاتسيالار قىزمەتىنىڭ كوشپەلى ءباسپاسوز كونفەرەنتسياسىندا «قالالىق ورتا: اقىلدى ايماق» يننوۆاتسيالىق بايقاۋىنىڭ جەڭىمپازدارى انىقتالدى.
«Astana Innovations» اق باسقارما توراعاسى ولجاس سارتاەۆتىڭ مالىمدەۋىنشە, بايقاۋعا قاتىسۋشىلار ءۇش كۇن ىشىندە يننوۆاتسيالار, ۋرباندالۋ جانە «جاسىل» تەحنولوگيالار باعىتتارى بويىنشا جوبالار ۇسىنعان. ونىڭ ىشىندە «اقىلدى اۋدان» تاقىرىبى بويىنشا جەڭىمپاز اتانعان توپ ءوز جوبالارىن ءىس جۇزىندە جۇزەگە اسىرۋعا مۇمكىندىك الىپ وتىر.
بايقاۋ قورىتىندىسى بويىنشا باس جۇلدەنى «Sredalab» كومانداسى يەلەندى. ولار قىسقا جىلىجايلار قۇرۋدىڭ ماڭىزدىلىعىنا توقتالسا, جۇلدەلى ءبىرىنشى ورىنعا يە بولعان «Nurcelona» توبى كولىك تۇراقتارىنا ارنالعان AirBnB ۇقساس جۇيەنى قۇرۋ ارقىلى كوزگە ءتۇستى. ەكىنشى ورىندى – «RainTech» كومانداسى الدى. ولار قالالىق درەناجدىق جۇيەنى قۇرۋدى ۇسىنىپ وتىر. مۇمكىندىكتەرى شەكتەۋلى جاندارعا ارنايى IT مەكتەپ اشۋدى ۇسىنعان «IT تەحنولوگيالار مەكتەبى» توبى ءۇشىنشى ورىنعا يە بولدى. سونىمەن قاتار قالا اكىمىنىڭ ارنايى جۇلدەسىمەن «King Win» توبى ماراپاتتالدى. بايقاۋدىڭ جالپى جۇلدە قورى 3 300 000 تەڭگەنى قۇرادى. ايتا كەتەرلىگى, قاتىسۋشىلاردىڭ جۇمىستارىن شەتەلدىك ساراپشىلار مەن ينۆەستورلار جانە مەملەكەتتىك قىزمەتكەرلەر باعالادى. اتالعان بايقاۋ حالىقارالىق ساۋلەتشىلەر كونگرەسى اياسىندا ءوتىپ وتىر.
ەركەجان ايتقازى, «ەگەمەن قازاقستان»