ەلباسى ن.ءا.نازارباەۆتىڭ باستاماسىمەن قولعا الىنعان «رۋحاني جاڭعىرۋ» باعدارلاماسىنىڭ قۇرامداس بولىگى بولىپ تابىلاتىن «جاھانداعى زاماناۋي قازاقستاندىق مادەنيەت» جوباسى اياسىندا قازىرگى قازاق ادەبيەتىنىڭ ۇزدىك ۇلگىلەرىن بۇۇ-نىڭ التى تىلىنە اۋدارۋ كوزدەلىپ وتىرعانى بەلگىلى.
بۇل ارينە, ۇلتتىق قۇندىلىقتارىمىزدى ۇلىقتاپ, بۇكىل دۇنيە جۇزىنە تانىتۋ ماقساتىنداعى يگى يدەيا ەكەندىگى تالاس تۋدىرماسا كەرەك. وسى ورايدا جارىق كورۋگە ءتيىس پوەزيالىق جانە پروزالىق انتولوگيالاردىڭ قۇرىلىمى مەن مازمۇنى قازاقستان جازۋشىلار وداعىنىڭ ارنايى ماجىلىسىندە ماقۇلدانىپ, بەكىتىلگەن بولاتىن.
پاريجدە وسىناۋ ورنى بولەك قوس انتولوگيانى فرانتسۋز تىلىنە اۋدارۋ, باسىپ شىعارۋ جانە تاراتۋ جۇمىستارىنا ارالاساتىن شىعارماشىلىق كونسورتسيۋم قاتىسۋشىلارى انىقتالدى. جوباعا قاتىسۋشىلاردى ىرىكتەۋگە قازاقستاندىقتارمەن بۇرىننان نيەتتەس ءپاريجدىڭ ءبىرىنشى وكرۋگىنىڭ مەرياسى مەن استانالىق مادەنيەت اسسوتسياتسياسى بارىنشا قولداۋ كورسەتتى. قازاقستان باستاماسى, سونداي-اق فرانتسياداعى ۇلتتىق كىتاپ ورتالىعى تاراپىنان دا تۇسىنىستىك تاپتى. ولار باسىلىمداردىڭ ساپالى جارىق كورۋىن ۇيىمداستىرۋدى ءوز مويىندارىنا الىپ وتىر.
ونداعان فرانتسۋز باسپالارىنىڭ ۇسىنىسىن قاراعان, سونداي-اق ستراتەگيالىق ارىپتەستەرىمىزدىڭ كەپىلدەمەلەرىن نازارعا العان «رۋحاني جاڭعىرۋ» باعدارلاماسىن جۇزەگە اسىرۋ جونىندەگى ۇلتتىق كوميسسيا اۋدارماشىلىق, باسپاگەرلىك جانە ادەبيەت پەن ونەردى ناسيحاتتاۋ سالاسىندا وتىز جىلدان استام ۋاقىت تاجىريبە جيناقتاعان ميشەل دە مول باسپاسىن تاڭدادى. باسپانىڭ نەگىزىن قالاۋشى ءارى باس رەداكتورى بەلگىلى فرانتسۋز لينگۆيست-اقىنى تەرري-دە-لا-كرۋا ىزگى نيەتكە تولى ىرگەلى ءىستىڭ بولاشاعىنا زور سەنىم ءبىلدىردى.
پاريج مادەنيەت اسسوتسياتسياسىنىڭ پرەزيدەنتى مادام كارلا وريگوني جوبانىڭ اكادەميالىق سيپاتىن اتاپ كورسەتتى. ونىڭ ويىنشا, انتولوگيا ماتىندەرىنىڭ ادەبي-ەستەتيكالىق قانا ەمەس, زەرتتەۋشىلىك تە ءمانى جوعارى ەكەن. اسسوتسياتسيا قازاقستان مادەنيەتىنىڭ مايەگىن فرانتسۋز وقىرماندارىنا ءمانىن بۇزباي كاسىبي بىلىكتىلىكپەن جەتكىزۋى ءۇشىن ءتارجىما جۇمىستارىنا بەدەلدى مامانداردى تارتپاق كورىنەدى.
جوبا شەڭبەرىندە انتولوگيانىڭ تەك فرانتسيادا عانا ەمەس, سول سياقتى فرانتسۋز ءتىلى كەڭىنەن قولدانىلاتىن باسقا ەلدەردە دە تارالۋىنا قاتىستى قىرۋار شارۋا اتقارىلماق. دۇنيە جۇزىندە مۇنداي مەملەكەتتەر ءارتۇرلى ەسەپتەۋلەر بويىنشا ەلۋدەن اسادى. ال فرانتسۋزشا سويلەيتىندەردىڭ سانى 220 ميلليوننىڭ ماڭايىندا. وسىنداي وراسان ۇلكەن اۋديتورياعا قاسيەتتى قارا ءسوزىمىز بەن جىر جاۋھارلارىن جەتكىزۋمەن اينالىسۋعا كەلىسكەن «پرەستيج كوممۋنيكاتسيون» اگەنتتىگىنىڭ باس ديرەكتورى لوران تايب ەلدى مادەني مۇرالار ارقىلى الەمگە تانىتۋدى كوزدەيتىن «رۋحاني جاڭعىرۋ» باعدارلاماسىنىڭ ماڭىزىنا ايرىقشا توقتالدى.
جوعارىداعى ۇيىمدارمەن اراداعى مەموراندۋمعا قازاقستان جاعىنان قول قويعان پرەزيدەنت جانىنداعى «رۋحاني جاڭعىرۋ» باعدارلاماسىن جۇزەگە اسىرۋ جونىندەگى ۇلتتىق كوميسسيانىڭ حاتشىسى ايدا بالاەۆا سەرىكتەستىكتەر نازارىن الداعى ۋاقىتتا جارىق كورەتىن انتولوگيالاردىڭ اۋدارماسى مەن ەستەتيكالىق ساپاسى جوعارى بولۋىن قامتاماسىز ەتۋ قاجەتتىگىنە اۋداردى.
فرانتسياداعى قازاقستان ەلشىلىگىندە وتكەن كەلىسسوزدەر مەن قول قويۋ راسىمىنە, سونداي-اق قازاقستاننىڭ فرانتسياداعى توتەنشە جانە وكىلەتتى ەلشىسى جان عاليەۆ پەن «ۇلتتىق اۋدارما بيۋروسىنىڭ» ديرەكتورى راۋان كەنجەحان ۇلى قاتىستى.
تالعات باتىرحان, «ەگەمەن قازاقستان»