ەلباسى نۇرسۇلتان نازارباەۆتىڭ «رۋحاني جاڭعىرۋ» جوباسى بويىنشا قر ۇلتتىق يادرولىق ورتالىعى مەن يادرولىق تەحنولوگيالار پاركى بىرلەسىپ «كۋرچاتوۆ قالاسىنداعى تەحنولوگيالىق قاسيەتتى ورىندار» اتتى باعدارلاما قابىلداعان ەدى. اتالمىش باعدارلاما وبلىس اكىمى دانيال احمەتوۆتىڭ باستاماسىمەن بيىل جاز ايىندا تۇڭعىش رەت جۇزەگە اسا باستادى. وسىعان وراي الىستان ات ارىلتىپ كەلگەن قوناقتار ەڭ الدىمەن سەمەي يادرولىق سىناق پوليگونىنىڭ دەرەكتەرىنەن حابار بەرەتىن مۋزەيدى ارالادى.
– مۋزەيدە كسرو كەزىندە يادرولىق جارىلىستار ورىن العان, سىناقتار جۇرگەن «دەگەلەڭ», «بالاپان», «وپىتنوە پولە» سياقتى الاڭداردان كورىنىستەر تولىق قامتىلعان,-دەدى كۋرچاتوۆ قالاسىنىڭ اكىمى الماس وڭداقانوۆ,-مۋزەي قورىندا 100-دەن استام ءتۇرلى ەستەلىكتەر, ەكسپوناتتار, كارتالار, فوتو جانە بەينە ماتەريالدار بار. سىناق الاڭدارىنان تىكەلەي اكەلىنگەن دەرەكتى زاتتاردىڭ بارلىعى دا وسىندا.
«ۇلتتىق قاسىرەتتەن-ۇلتتىق ماقتانىشقا دەيىن» دەپ اتالاتىن ەكسپوزيتسيا زالىندا پرەزيدەنت ن.نازارباەۆتىڭ جارلىعىمەن قۇرىلعان ۇلتتىق يادرولىق ورتالىقتىڭ تاريحى كەڭىنەن قامتىلىپتى. توكاماك كتم, كير «بايكال-1», پيلوتسىز باسقارۋداعى جابدىق, قازىرگى تاڭداعى زاماناۋي ولشەۋىش-ەسەپتەگىش جانە كاسىپورىننىڭ ماراپاتتارى مەن ناگرادالارىن دا وسى مۋزەيدەن تاماشالاۋعا بولادى.
سەمەيدەن ارنايى كەلگەن قوناقتار «يادرولىق تەحنولوگيالار پاركى» اق-ىنداعى «ەلۆ-4» اۋماعىنا دا باردى. «ەلۆ-4» دەگەنىمىز بۇل ءتۇرلى ماتەريالداردى ارنايى جابدىقتا رادياتسيالىق تەكسەرۋدەن, باعامداۋدان وتكىزۋ جانە مولشەرىن انىقتاۋ قۇرىلعىسى. قازىرگى ۋاقىتتا اتالمىش ەلەكتروندى قوندىرعىدا پوليمەرلەر بۇيىمداردى تىگۋ, مەديتسينالىق بۇيىمداردى زارارسىزداندىرۋ, رەزەڭكەلەردى قىزدىرىپ وڭدەۋ جۇمىستارى جۇرەدى.
كۋرچاتوۆ قالاسىنىڭ اكىمى الماس وڭداقانوۆتىڭ ايتۋىنشا, كيەلى جەرلەردى ارالاۋعا كەلگەن قاۋىم عالىم ي.ۆ.كۋرچاتوۆتىڭ ەسكەرتكىشىنە بارىپ, عالىم قىزمەت ەتكەن جۇمىس كابينەتىمەن تانىسىپ قايتتى. وسىنىڭ ءوزى تاريحتان ۇلكەن اقپارات بەرەدى, دەدى ول. ال سەمەي يادرولىق سىناق پوليگونى مەن كۋرچاتوۆ قالاسىنىڭ تاريحى تۋرالى كەرەمەت ءفيلمدى كەلگەن قاۋىم قالاداعى مادەنيەت ۇيىنەن تاماشالادى.
باعدارلاما سوڭىندا ەرەسەكتەرمەن بىرگە كەلگەن سەمەي قالاسىنىڭ وقۋشىلارى «الەم بالالارى اتوم بومباسىنا قارسى!» اتتى ينتەراكتيۆتى ويىنعا قاتىستى. ويىن بارىسىندا ولار بەيبىت اتوم سالاسىن زەرتتەۋدەگى الەم عالىمدارىنىڭ جۇمىستارىمەن تانىستى. تامىز ايىنىڭ سوڭىنا دەيىن الماتى قالاسى جانە شىعىس قازاقستان وبلىسىنىڭ بارلىق اۋداندارىنان ءارتۇرلى جاستاعى بالالار سەمەي مەن كۋرچاتوۆ قالالارىنا وسى جوباعا وراي ارنايى كەلىپ قايتپاقشى.
راۋشان نۇعمانبەكوۆا
سۋرەت اۆتوردىكى
كۋرچاتوۆ - سەمەي