الماتى وبلىسى نارىنقول اۋدانىنىڭ اۋماعىنا اياق باسقان ادامنىڭ نازارىن الىستان مۇنارتقان اقباس شىڭدى تاۋ سىلەمى ەرىكسىز وزىنە تارتار ەدى. قازاق تانىمىندا ءتاڭىرتاۋ اتاۋىنا يە بولعان الەمدەگى ەڭ بيىك شىڭنىڭ ءبىرى ء–حانتاڭىرى وسى.
تەڭىز دەڭگەيىنەن 7010 مەتر بيىكتىكتە تۇرعان شىڭ ەلىمىزدىڭ وڭتۇستىك-شىعىس شەكاراسىنداعى بەرىك بوساعا عانا ەمەس, جاھاننىڭ قىزۋ قاندى تۋريستەرىن قىزىقتىرعان ايگىلى تۋريستىك نىسان رەتىندە دە تانىمال. ورتالىق تيان-شان تاۋ جوتاسىنىڭ شىعىسى بولىگىندەگى اسپانمەن تىلدەسكەن وسى مۇزارتتىڭ ەڭ بيىك نۇكتەسىنە جەتۋ ادامزاتتىڭ اۋزىمەن قۇس تىستەگەن الپينيستەرىنىڭ ارمانى بولۋدان اينىعان ەمەس. جاراعىن سايلاعان جاۋجۇرەك جانداردىڭ توبى جىل سايىن ءحانتاڭىرىن باعىندىرۋعا كەلىپ-كەتىپ جاتادى. بۇل تۋرالى شىتىرمان وقيعالى شىعارما نەمەسە كوركەم كينو تۇسىرۋگە بولار...
كۇنى كەشە ءحانتاڭىرى بيىگىنەن قازاقستان تۋىن جەلبىرەتۋگە بەل بۋعان تاعى ءبىر ەكسپەديتسيا جولعا شىقتى. الماتى وبلىسىندا جۇزەگە اسىپ جاتقان «قاسيەتتى قازاقستان» باعدارلاماسىنىڭ شەڭبەرىندە جاساقتالعان توپتىڭ قۇرامىندا بەلگىلى اكتەر, تۋريستىك ەكسكۋرسيالار ۇيىمداستىرۋمەن اتى شىققان «سampit» كومپانياسىنىڭ وكىلى ءانۋار نۇرپەيىسوۆ, وپەراتور الەكساندر كۋزنەتسوۆ, تەاتر جانە كينو ءارتىسى, «الپينيادا» تاۋ كلۋبىنا قاتىسۋشى ايسۇلۋ ازىمباەۆا جانە جوبانى جۇزەگە اسىرۋعا جاۋاپتى «جەتىسۋ گەوگرافيالىق قاۋىمداستىعىنىڭ» توراعاسى ءانۋار دەمەگەنوۆ بار. - الماتى وبلىسىنىڭ تۋريستىك الەۋەتى زور. جەتىسۋ - تاماشا فلورا جانە فاۋناسىمەن قىزىقتىراتىن وڭىرلەردىڭ ءبىرى. بىزدە ءشول, تاۋلار مەن وزەندەر كوپ. «جەتىسۋ گەوگرافيالىق قاۋىمداستىعى» ءوز قىزمەتى شەڭبەرىندە جوبالار مەن ەكسپەديتسيالارعا قاتىسۋ ءۇشىن ەنتۋزياستار مەن زەرتتەۋشىلەردى تارتادى. قوعامنىڭ العاشقى جوباسى 20 مىڭ مەتر بيىكتىكتەگى جەتىسۋ شىڭدارىن باعىندىرۋ بولىپ وتىر, – دەيدى بۇل جايىندا الماتى وبلىستىق ىشكى ساياسات باسقارماسىنىڭ باسشىسى رۋستام الپىسباەۆ.
دەمەك, بۇل ەكسپەديتسيانىڭ ءجونى بولەك بولىپ تۇر. تورتەۋ تۇگەلدەنگەن توپ تاۋ باسىنا قىزىق ءۇشىن ورمەلەپ بارمايدى. اتاۋ-سويى «مەديا-ەكسپەديتسيا» دەپ ايشىقتالعان جوبانىڭ ماقساتى جەتىسۋ وڭىرىدەگى ءتۋريزمنىڭ وركەندەۋىنە ولشەۋسىز ۇلەس قوسىپ, دۇنيەجۇزىنە قازاقستاننىڭ تۇمسا تابيعاتى تۋرالى دايەكتى دەرەكتەر ۇسىنۋ بولىپ وتىر. سەگىزىنشى تامىزعا دەيىن جالعاساتىن تۋريستىك تۋر اياسىندا اۋەسقوي الپينيستەر ءحانتاڭىرىنىڭ ەڭ بيىك شىڭىنا كوتەرىلۋدى جوسپارلاپتى.
جالپى, «جەتىسۋ گەوگرافيالىق قاۋىمداستىعى» ۇيىمى وتاندىق تۋريزم مەن ەلىمىزدىڭ كيەلى جەرلەرىنىڭ كارتاسى بويىنشا تانىمدىق تۋرلار ۇيىمداستارۋعا بەل شەشە كىرىسىپ وتىر. بۇيىرسا, حانتاڭىرىنە اتتانعان مەديا-ەكسپەديتسيا توبىنان بولەك, ايگىلى شىڭعىسحاننىڭ قولباسشىسى بولعان مۇقالي نوياننىڭ ءىزىمىن حالىقارالىق ەكسپەديتسيا جولعا شىقپاقشى. «رۋحاني جاڭعىرۋ» باعدارلاماسى اياسىندا كونە تاريح كوشىمەن ءجۇرىپ وتەتىن ساپاردىڭ نەگىزگى بولىگى قىتاي ەلىنىڭ اۋماعىندا وتپەك.
قالماحانبەت مۇقامەتقالي, «ەگەمەن قازاقستان» الماتى وبلىسى