ورالدا «قازاقستاننىڭ ۇزدىك تاۋارى» رەسپۋبليكالىق بايقاۋىنىڭ وڭىرلىك ىرىكتەۋ كورمەسى ءوتتى

كورمە ءوتىپ جاتقان قازاق تەاترىنىڭ كەڭ فويەسى ابىر-سابىر, مەرەكەلىك قاربالاسقا تولعان. قاز-قاتار ورنالاسقان كابينالاردا جۇپ-جۇمىر جۇمىسى بار جەكە كاسىپكەر دە, بولاشاقتا الىپ زاۋىتقا اينالماق امبيتسياسى بار الپاۋىت تسەحتار دا بايقالادى. جىل سايىن وتكىزىلىپ كەلە جاتقان «قازاقستاننىڭ ۇزدىك تاۋارى» بايقاۋىنىڭ ماقساتى دا سول: ەڭ باستى تالاپ – تۇتىنۋشى سۇرانىسىنا يە بولاتىن, كوڭىلىنەن شىعاتىن ساپالى تاۋار ۇسىنۋ.

- بىلتىر وسى كورمە-جارمەڭكەگە قاتىسۋشىلاردىڭ سانى 30-عا جەتپەگەن ەدى. بيىل كوبەيدى. قاتىسۋشىلار ءۇش ءتۇرلى جولدامانى ساراپقا سالادى. ياعني «وندىرىستىك ماقساتتاعى ۇزدىك تاۋارلار», «حالىق تۇتىناتىن ۇزدىك تاۋارلار» جانە «ۇزدىك ازىق-ت ۇلىك تاۋارلارىن» انىقتايمىز. جەڭىمپازدار رەسپۋبليكالىق سىنعا جولدانادى. ول جاقتان ۇزدىك اتانسا, تمد ەلدەرىنىڭ ۇزدىك تاۋارلارى كورمەسىندە قازاقستان اتىنان قاتىسادى. مۇنىڭ ءبارى تاۋار ءوندىرۋشى ءۇشىن وتە ءتيىمدى, تەگىن جارناما عوي, - دەيدى وسى شارانى ۇيىمداستىرۋشى, باتىس قازاقستان وبلىستىق كاسىپكەرلەر پالاتاسىنىڭ ديرەكتورى ساكەن قارين.

كورمەنى ارالاپ كەلەمىز. زەلەنوۆ اۋدانىنان كەلگەن قولونەرشى ارمان ايتپاەۆتى كوپتەن تانيمىز. «اۋىلداعى ارماني» اتانعان شەبەر جىگىت مۇمكىندىگى شەكتەۋلى بولعانىنا قاراماستان ءتۇرلى تەرى بۇيىمدارىن جاسايدى. ءاميان, ايەل سومكەلەرى, بەلدىكتەر, تۇمار ت.ب. ۇلتتىق ناقىشتاعى دۇنيەلەرىمەن تانىمال ارمان جىل وتكەن سايىن كاسىبىن دامىتىپ, سورەسىن جاڭا تاۋارلارمەن تولىقتىرىپ كەلەدى ەكەن.

«AsArCollection» جشس ۇيىمداستىرعان كورمە الدىندا بوگەلىپ قالدىق. ساپاسى مەن ادەمىلىگى شەتەلدىك بۇيىمداردان كەم ەمەس مىنا اياقكيىمدەر ءوزىمىزدىڭ قازاقستاندا, ونىڭ ۇستىنە ورال قالاسىندا جاسالىپ جاتىر دەگەنگە كەيبىرەۋلەر سەنبەۋى دە مۇمكىن.

- ءبىزدىڭ كاسىپورىن 2017 جىلدىڭ قاراشا ايىندا عانا ىسكە قوسىلدى. تسەحىمىز تولىق قۋاتىنا قوسىلعاندا كۇنىنە 2400 دانا اياق كيىم شىعارا الامىز, - دەيدى كاسىپورىننىڭ كوممەرتسيالىق ديرەكتورى اسەت بەكتۇرعانوۆ.

اسەت رامازان ۇلىنىڭ ايتۋىنشا, كاسىپورىن جەرگىلىكتى تۇرعىنداردان تەرى الىپ, وڭدەۋگە كىرىسكەن, ازىرگە قوي تەرىسىن يلەۋ, وڭدەۋ, بوياۋ كەزەڭدەرى جولعا قويىلعان.

- ازىرگە جەرگىلىكتى شيكىزاتتى جوعارى ساپالى اياق كيىمدەر تىگۋگە لايىقتاپ وڭدەۋگە قول جەتە قويعان جوق. تەكستيلدى تەرى ءوندىرۋ – وتە قيىن پروتسەسس. بىراق ءبىز بۇيىرسا وعان دا جەتەمىز. ويتكەنى باتىسقازاقستاندىق قوي تەرىسىنىڭ تابيعي ساپاسى وتە جوعارى – قىسى سۋىق, جازى ىستىق اۋا رايىنىڭ ءوزى بۇل جەردەگى قوي تەرىسىنە ەرەكشە قاسيەت بەرگەن, - دەيدى ءوندىرىس قۇپياسىمەن بولىسكەن اسەت بەكتۇرعانوۆ.

باتىس قازاقستان وبلىسى اكىمىنىڭ ورىنباسارى ميرجان ساتقانوۆ كورمەگە قاتىسۋشى بارلىق كاسىپكەردىڭ تاۋارلارىن اسىقپاي كورىپ, قولداۋ ءبىلدىرىپ, مەملەكەت تاراپىنان, جەرگىلىكتى بيلىك تاراپىنان كاسىپكەرلىكتى دامىتۋعا بارىنشا كومەك بەرىلەتىنىن ايتتى.

ۇلتتىق ناقىشتاعى ساندىك كيىمدەرىمەن رەسپۋبليكاعا بەلگىلى «ماريا حانىم» ءسان ءۇيى وسى كورمەدە ىسكەر ايەلدەرگە ارنالعان زاماناۋي كيىم ۇلگىلەرىن ۇسىنعان ەكەن. وتكەن جىلى بىرىككەن اراب امىرلىكتەرىندە, فرانتسيادا وتكەن كورمەلەردە ورالدىق ءسان برەندتەرى ەرەكشە قىزىعۋشىلىق تۋدىرىپتى.

- اۆتوكولىكتىڭ پايدالانۋعا جارامسىز بولىپ قالعان رەزىڭكە دوڭگەلەكتەرىنەن مىناداي ءتۇرلى-ءتۇستى پليتالار جاساۋ – ءبىر وقپەن ەكى قوياندى اتقانداي عوي, - دەيدى قىزىل-جاسىل ءتۇستى ادەمى رەزىڭكە توسەمدەر شىعاراتىن «شينى Live» فيرماسىنىڭ جەتەكشىسى سەرگەي گۋبەر. 2012 جىلى تىركەلگەن جەكە كاسىپكەر سوڭعى ءۇش جىلدان بەرى «قازاقستاننىڭ ۇزدىك تاۋارى» كورمەسىنە تۇراقتى قاتىسىپ كەلەدى ەكەن.

ەرىنبەي ەڭبەك ەتكەن ادامعا كاسىپتىڭ كوزى كوپ قوي. «دۋتكينا» جەكە كاسىپكەرلىگىن قۇرعان ۆلاديمير مەن يۋري تەڭىز ونىمدەرىن وڭدەپ, ساتىلىمعا شىعارعان. «قيىر شىعىستان مۇزداتىلعان بالىق الدىرىپ, ورالداعى شاعىن تسەحتا تۇزداپ, وڭدەپ جاتىرمىز. كاسىپورىندا 8 ادام قىزمەت ەتەدى. ءونىمىمىزدى جەرگىلىكتى ساۋدا ۇيلەرىنە, سۋپەرماركەتتەرگە تاپسىرامىز, حالىقتىڭ سۇرانىسى جاقسى» دەيدى كاسىپكەرلەر.

سونىمەن, ورالدا وتكەن «قازاقستاننىڭ ۇزدىك تاۋارى» وڭىرلىك كورمە-بايقاۋىنا قاتىسۋشى كاسىپكەرلەر ۇسىنعان تاۋارلاردى تۇگەل ساراپتاپ شىققان ارنايى كوميسسيا مۇشەلەرى ەڭ ۇزدىك توعىز كاسىپورىنعا رەسپۋبليكالىق بايقاۋعا جولداما ۇسىندى.

جوعارىدا ايتىلعانداي, جولداما «وندىرىستىك ماقساتتاعى ۇزدىك تاۋارلار», «حالىق تۇتىناتىن ۇزدىك تاۋارلار» جانە «ۇزدىك ازىق-ت ۇلىك تاۋارلار» اتالىمدارى بويىنشا ساراپقا ءتۇستى.

ارنايى كوميسسيانىڭ شەشىمى بويىنشا «ورال ساۋدا-ونەركاسىپ كومپانياسى» جشس, «باتىسمۇنايجابدىقتارى» جشس جانە «باتىس قازاقستان ماشينا جاساۋ كومپانياسى» جشس ۇسىنعان كۇردەلى تەحنيكالىق جابدىقتار باتىس قازاقستان وبلىسىنىڭ «وندىرىستىك ماقساتتاعى ۇزدىك تاۋارى» بولىپ تانىلدى.

«حالىق تۇتىناتىن ۇزدىك تاۋارلار» اتالىمىنا مەكتەپ كيىم ۇلگىسىن ۇسىنعان «نادەجدا» جشس, «كوندەنسات» جشس جانە «ماريا حانىم» ءسان ءۇيى يە بولدى.

ال «ۇزدىك ازىق-ت ۇلىك تاۋارلارى» اتالىمى بويىنشا كونديتەرلىك ءتاتتى تورتتارىمەن ايگىلى «بالزيا» جشس, ءسۇت ونىمدەرىن وڭدەۋشى «كاۆەرينا» جك جانە تازا سۋ شىعاراتىن «فيرما «رودنيك» جشس ۇزدىك دەپ تانىلدى.

كورمەنى قورىتىندىلاعان قازاقستان رەسپۋبليكاسى «اتامەكەن» ۇلتتىق كاسىپكەرلەر پالاتاسىنىڭ وكىلى مادينا مۇقاتوۆا مەن باتىس قازاقستان وبلىستىق كاسىپكەرلەر پالاتاسىنىڭ ديرەكتورى ساكەن كارين كورمەگە قاتىسقان بارلىق كاسىپورىن يەلەرىنە العىس حات تابىستادى.

ايتا كەتۋ كەرەك, رەسپۋبليكالىق بايقاۋعا ەلىمىزدىڭ بارلىق 17 ايماعىنان ۇمىتكەرلەر قاتىسىپ, سولاردىڭ ىشىنەن تەك 9 عانا جەڭىمپاز اتانادى.

قازبەك قۇتتىمۇرات ۇلى

«ەگەمەن قازاقستان»

ورال قالاسى