الماتىداعى جۇرت كوپ جينالاتىن عيماراتتاردىڭ بىرىندە تۇرعان مىنا ءبىر اسىقتان ورىلگەن ارعىماقتىڭ جانىنان وتكەن جان ەلەڭ ەتپەي كەتپەيدى. ارى-بەرى اعىلعان حالىقتىڭ وسىناۋ تاڭعاجايىپ ونەر تۋىندىسىنا تەلمىرە كوز تاستاعانىن, بولماسا قاسىنا تۇرا قالىپ سۋرەتكە ءتۇسىپ جاتقانىن ءجيى بايقايسىز.
بەلگىلى قولونەر شەبەرلەرى نۇرلان ءادىلحان مەن نۇرلان ابىشەۆتىڭ قولتاڭباسىنان تۋعان بىرەگەي تۋىندى الەمدەگى تەڭدەسى جوق ونەر مۇرالارىنىڭ ساناتىنا كىرگەن. جىپتىكتەي ءارى ناقىشتى جاسالعان اسەم ءمۇسىن بىردەن كوز باۋرايدى. كادىمگى اسىقتان دا مۇنداي كەرەمەت ءمۇسىن سومداۋعا بولادى ەكەن عوي دەپ تاڭىرقايسىز. تاڭىرقاپ قانا قويماي, شەبەرلىك اسقان توزىمدىلىك پەن ەپتىلىكتى قاجەت ەتەتىن ايرىقشا ونەر ەكەنىن مويىنداۋىڭىزعا تۋرا كەلەدى.
ەلىمىزدىڭ ءار ايماعىنان اكەلىنگەن سەگىز مىڭ اسىقتان جاسالعان جىلقى ءمۇسىنى تاۋەلسىزدىكتى, بىرلىكتى, ساتتىلىكتى بەينەلەيدى. العا قاراي اتىرىنعان جاس تۇلپاردىڭ سۇلۋ تۇلعاسى مول قۋاتتىڭ, جىگەر جالىننىڭ, ەركىندىكتىڭ بەينەسىن كوز الدىڭىزعا اكەلەدى.
«قازاقتا اسىعىڭ الشىسىنان ءتۇسسىن دەگەن اق تىلەك بار. وسىنى ەسكەرىپ, اسىقتى الشىسىنان تۇرعىزىپ, وڭقايىن سول قاپتالعا, سولاقايىن وڭ قاپتالعا ورنالاستىردىق. «الشى تۇرۋ» – ۇلكەن ساتتىلىكتىڭ بەلگىسى. بۇل تۋىندىمىزدى ەگەمەن ەلىمىزدىڭ ءاربىر جاسى ەركىندىكتى سەزىنىپ وسسە دەگەن نيەتپەن جاسادىق», دەيدى اۆتورلار.
حالقىمىز قامبار اتا بالاسى سانالعان جىلقى مالىن قاشاننان دا قادىر تۇتقان. ال اسىق بولسا بالانى ۇتقىرلىققا, دالدىككە باۋليتىن ۇلتتىق ونەر. سوڭعى جىلدارى وتاندىق قولونەر شەبەرلەرىنىڭ ۇلت مۇراسىنان سىر شەرتەتىن ءتۇرلى دەڭگەيدەگى بۇيىمدار جاساۋعا دەن قويعانى كوڭىل قۋانتادى. ءبىز ءسوز ەتىپ وتىرعان تۇلپار تۇرپاتىن تانىتاتىن تاماشا ءمۇسىن مەن قورشاعان ورتا اراسىنداعى بايلانىس ءوزارا جاراسىم تاۋىپ تۇرعانداي كورىنەدى.
اسىقتان ورىلگەن ارعىماق ءمۇسىن...
ارمان وكتيابر,
«ەگەمەن قازاقستان»
الماتى