كاسىپقوي بوكسشى گەننادي گولوۆكيننىڭ ەلباسى نۇرسۇلتان نازارباەۆقا تارتۋ ەتكەن چەمپيوندىق بەلبەۋلەرى بۇگىندە ەلباسى كىتاپحاناسىنىڭ «قازاقستانداعى وليمپيادا قوزعالىسى» اتتى تۇراقتى ەكسپوزيتسياسىندا جۇرتشىلىق نازارىنا ۇسىنۋ ءۇشىن قويىلدى. 2018 جىلدىڭ مامىرىندا تۇساۋى كەسىلگەن اتالمىش ەكسپوزيتسيادا وليمپيادا قوزعالىسىنىڭ جەتەكشىلەرىمەن, وتاندىق جانە شەتەلدىك سپورتشىلارمەن كەزدەسۋ بارىسىندا مەملەكەت باسشىسىنا تابىستالعان كادەسىيلار, ماراپاتتار, سپورت قۇرالدارى ساقتالعان.
بۇل جەردە ەلباسىنىڭ سپورت سالاسىنداعى مەملەكەت ساياساتىن ەل ىشىندە عانا ەمەس, شەكارادان تىس ىلگەرىلەتكەنى ءۇشىن العان ماراپاتتارى دا تۇر. ولاردىڭ قاتارىندا سپورت ۇيىمدارى مەن قوعامدارى, قاۋىمداستىقتارى مەن فەدەراتسيالارى تارتۋ ەتكەن ماراپاتتارى, سونداي-اق ۇلتتىق وليمپيادا كوميتەتى (ۇوك) قۇرمەت بەلگىسى (2000), «سپەشيال وليمپيكس قازاقستان قوزعالىسىن قولداعانى ءۇشىن» ەستەلىك مەدالى مەن بەلگىسى (2002), ازيا وليمپيادا كەڭەسىنىڭ وردەنى (2007), FILA حالىقارالىق كۇرەس قاۋىمداستىعىنىڭ التىن وردەنى (2003) سىندى وزگە دە وليمپيادا جانە پاراليمپيادا ويىندارىمەن بايلانىستى ماراپاتتار بار. ولاردىڭ ەڭ العاشقىسى ءارى ەڭ ەرەكشەسى – حوك پرەزيدەنتى حۋان انتونيو سامارانچتىڭ مەملەكەت باسشىسىنا تابىستاعان «ەڭبەگى ءۇشىن» اتتى التىن وليمپيادا وردەنى (1997).
ن.ءا.نازارباەۆتىڭ قولداۋىمەن وتاندىق بوكسشىلار جەتىستىكتەرگە جەتىپ كەلەدى. سول سەبەپتى دە, اۋەسقوي بوكستىڭ حالىقارالىق قاۋىمداستىعى (اIBا) وليمپيادا بوكسىن دامىتۋعا قوسقان ۇلەسى ءۇشىن ەلباسىعا اIBا التىن وردەنىن (2000), اIBا كۇمىس وردەنىن (2000), «ەڭبەگى ءۇشىن» التىن وردەنىن (2002) تارتۋ ەتتى.
ەندىگى كەزەكتە «قازاقستانداعى وليمپيادا قوزعالىسى» كورمەسى ەكسپوزيتسياسىنىڭ تورىنەن گ.گولوۆكيننىڭ WBA – دۇنيەجۇزىلىك بوكس قاۋىمداستىعى (2010), IBO – حالىقارالىق بوكس ۇيىمى (2011), WBC – دۇنيەجۇزىلىك بوكس كەڭەسى (2016), IBF – حالىقارالىق بوكس فەدەراتسياسى (2015-2018) بويىنشا چەمپيوندىق ءتورت بەلبەۋى ەرەكشە ورىن الدى.
ءالي بيتورە,
«ەگەمەن قازاقستان»