«جۇبانوۆتار الەمى» مادەنيەت ورتالىعى مەن قۇرمانعازى وركەسترى اراسىندا شىعارماشىلىق بايلانىس ورناتىلدى.
وتكەن جىلدىڭ كۇزىندە اقتوبە قالاسىندا قازاق كۇي ونەرىنىڭ تەڭدەسى جوق تۇلعاسى, ونەر زەرتتەۋشىسى, قازاقتىڭ قۇرمانعازى اتىنداعى اكادەميالىق حالىق اسپاپتار وركەسترىن ءوز قولىمەن قۇرعان احمەت جۇبانوۆ پەن كلاسسيكالىق مۋزىكا جانرىندا تالاي تاماشا تۋىندىلار تۋعىزعان كورنەكتى كومپوزيتور عازيزا جۇبانوۆانىڭ شىعارماشىلىق جولدارىن دارىپتەيتىن تاماشا ورتالىق اشىلعان ەدى. سودان بەرى جاڭادان قۇرىلعان مادەنيەت پەن ونەر شاڭىراعى وڭىردە شىعارماشىلىق الەۋەتتىڭ تولىسا تۇسۋىنە ۇيىتقى بولىپ كەلەدى. مۇندا «بۇلاق كورسەڭ, كوزىن اش» دەگەندەي جاس دارىنداردىڭ تالانتىن ۇشتاۋدا ءبىراز ءىس-شارالار بەلگىلەنگەن.
ءبىز تاياۋدا وسى ورتالىقتا تاعى ءبىر يگىلىكتى ءىستىڭ جۇزەگە اسقانىنا كۋا بولدىق. ياعني مۇندا «جۇبانوۆتار الەمى» مادەنيەت ورتالىعى مەن قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترى اراسىندا شىعارماشىلىق جانە گاسترولدىك ىنتىماقتاستىقتى دامىتۋ جونىندەگى كەلىسىمگە قول قويىلدى. اتالعان ونەر مەن مادەنيەت ۇجىمدارىنىڭ باسشىلارى لاۋرا مايتەكوۆا مەن نۇرعيسا داۋەشەۆتىڭ ايتۋىنشا, ەكىجاقتى مادەني جانە رۋحاني بايلانىستار كاسىبي شەبەرلىكتى شىڭداۋعا جانە شىعارماشىلىق تاجىريبەنى تولىقتىرا تۇسۋگە نەگىز قالايدى.
ەلىمىزدىڭ مادەنيەت پەن مۋزىكالىق باعىتتاعى مۇرالارى مەيلىنشە باي. بۇگىنگى كەزدە «جۇبانوۆتار الەمى» ورتالىعى نازار اۋدارىپ وتىرعان باستى ماسەلەلەردىڭ ءبىرى دە ونىڭ جاۋھار ۇلگىلەرىن دارىپتەۋ بولىپ تابىلادى. وسىنداي ومىرشەڭ ءارى كەڭ كوزقاراس تۇرعىسىنان قاراستىرعاندا بۇل جاڭا مادەني قۇرىلىمنىڭ قىزمەتى تەك ءبىر عانا احمەت پەن عازيزا جۇبانوۆتاردىڭ شىعارماشىلىق مۇراسىن زەرتتەۋمەن جانە ناسيحاتتاۋمەن شەكتەلىپ قالمايتىنىن ايقىن اڭعارا الامىز.
ال ەكىنشى ءبىر وي تارازىسىنان سالماقتاساق, رەسپۋبليكامىزداعى وركەسترلەر مەن ديريجەرلەر, انسامبلدەر مەن جەكە ورىنداۋشىلار وزدەرىمەن ءوزى, توماعا-تۇيىق كۇيىندە قالىپ قويماۋى ءتيىس. ايتپەسە مۇنداي جاعدايدا ونەر مەن مادەنيەتتىڭ ءورىسى تارىلماي تۇرا المايدى. كەرىسىنشە ورتاق رۋحاني جوبالار مەن ايماقتىق ورىنداۋشىلىق مەكتەپتەردىڭ بىرلەسكەن كونتسەرتتەرى بۇعان دەيىن قالىپتاسقان قاساڭ قاعيدالاردى ىعىستىرىپ شىعارا الادى. مۇندايدا ىنتىماقتاستىق ارنالارىنىڭ مەيلىنشە كەڭ بولۋىنىڭ ماڭىزى جوعارى. ەڭ باستىسى, ءوزارا تاجىريبە الماسۋ ءتارتىبىن تەرەڭدەتۋ, ونەر ۇجىمدارىنىڭ ءبىر-بىرىنەن ۇيرەنۋى, ءارى ءبىرىن-ءبىرى بايىتا ءتۇسۋى مەن تولىقتىرۋى الدىڭعى كەزەككە شىعۋىنىڭ تيگىزەر پايداسى مول. ءارى مۇنداي شىعارماشىلىق بايلانىستار مەن قارىم-قاتىناستار رەسپۋبليكامىزدا فيلارمونيالار بىرلەستىگىنىڭ شىنايى شىعارماشىلىق بازاسىن قۇرۋعا مۇمكىندىك بەرەدى.
ماسەلەنىڭ مۇنداي مانىسىنەن كەلگەندە دە «جۇبانوۆتار الەمى» مادەنيەت ورتالىعى مەن قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترىنىڭ اراسىندا جاسالعان كەلىسىم ەكى تاراپقا دا پايدالى اسەر كوەففيتسيەنتىن تيگىزە الارى انىق. بيىلعى شىلدە ايىنىڭ العاشقى ون كۇندىگىندە وسى كەلىسىمگە سايكەس العاشقى قادامدار جاسالدى دا. ونىڭ باستى دالەلى نۇرعيسا داۋەشەۆ باستاعان قۇرمانعازى وركەسترى مۇشەلەرى «جۇبانوۆتار الەمى» مادەنيەت ورتالىعىنىڭ ديرەكتورى لاۋرا مايتەكوۆانىڭ شاقىرۋىنا سايكەس الماتىدان ارنايى كەلىپ, اتالعان ورتالىقتىڭ زالىندا ءۇش كۇن قاتارىنان كونتسەرت قويىپ, كۇي مەن ءان ونەرىن ءپىر تۇتقان اقتوبەلىكتەردىڭ كوڭىلدەرىن ءبىر سەرپىلتىپ تاستاعانى. كەلەشەكتە ەكى اراداعى كەلىسىمگە سايكەس تاراپتار جوعارىدا ايتىلعان ماقساتتار مەن مىندەتتەر اياسىندا وزگە دە بىرلەسكەن ءىس-شارالاردى جۇرگىزىپ, ونى مازمۇن جاعىنان دا, ءتۇر جاعىنان دا ودان ءارى تولىقتىرا ءتۇسۋدى ۇيعارىپ وتىر.
تەمىر قۇسايىن,
«ەگەمەن قازاقستان»
اقتوبە