ەلباسىنىڭ وسىعان دەيىنگى جولداۋلارى مەن مەملەكەتتىك ستراتەگيالىق جوسپارلارى «رۋحاني جاڭعىرۋ» باعدارلاماسىنا جالعاستى. ەلىمىز جاڭا دامۋ ساتىسىنا ءوتتى.
ارينە جوبانى جاريالاۋ بار دا, ونى جۇزەگە اسىرۋ بار. جوبا بويىنشا جۇمىستىڭ ماڭىزدى كەزەڭى – ونىڭ ماقساتى مەن ماڭىزىن قالىڭ بۇقاراعا كەڭىنەن جەتكىزىپ ءتۇسىندىرۋ عوي. اسىرەسە وڭىردەگى ەڭ ىرگەلى وقۋ ورنى, بايىرعى ءبىلىم ورداسى رەتىندە ماحامبەت وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنە ارتىلعان جاۋاپتى مىندەتتى انىق سەزىنەمىز.
ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى ءبىزدىڭ ۋنيۆەرسيتەت پورتالىنىڭ باستى بەتىندە, فاكۋلتەتتەر سايتىندا ورنالاستىرىلدى. الەۋمەتتىك جەلىلەردە باعدارلاماعا قاتىستى ارنايى اقپارات پەن اتقارىلىپ جاتقان جۇمىس جونىندەگى مالىمەت تۇراقتى تاراتىلىپ كەلەدى. ماقالانىڭ نەگىزگى ويلارى مەن باسىم باعىتتارىن ناسيحاتتاۋ ماقساتىندا ۋنيۆەرسيتەتتىڭ وقۋ عيماراتتارىندا, اكت زالدارى مەن كابينەتتەردە كورنەكى قۇرالدار ءىلىندى. LED-ەكران ارقىلى ۆيدەو جانە كورنەكى اقپارات جۇيەلى بەرىلىپ, ارنايى «رۋحاني جاڭعىرۋ» ءماجىلىس زالى جابدىقتالدى.
ەڭ باستىسى, بۇل قوعامدىق جوبانى ىسكە اسىرۋ ءۇشىن عىلىمي-ادىستەمەلىك جانە قولدانبالى-تاجىريبەلىك قولداۋ قاجەت. وسى باعىتتا بقمۋ-دا 15 مارتە عىلىمي-پراكتيكالىق كونفەرەنتسيا, 12 رەت دوڭگەلەك ۇستەل ءماجىلىسى وتكەن ەكەن. بۇل باسقوسۋلاردا ايتىلعان ۇسىنىس-پىكىرلەر ءاردايىم ءبىزدىڭ باستى نازارىمىزدا.
ءبىر عانا مىسالدى ايتا كەتەيىن. باعدارلاماعا قاتىستى نەگىزگى باعىتتىڭ ءبىرى – لاتىن الىپبيىنە كوشۋ جوباسى بولاتىن. بۇل تۇرعىدا ۋنيۆەرسيتەتتە قوماقتى جانە كەشەندى ءىس تىندىرىلدى. وسى تاقىرىپقا بىرنەشە كونفەرەنتسيا, دوڭگەلەك ۇستەلدەر مەن سەمينارلار ۇيىمداستىرىلدى. ستۋدەنت جاستارمەن كوپتەگەن كەزدەسۋلەر ءوتتى. باق-تاعى پىكىر الماسۋ جانە ءتۇسىندىرۋ شارالارىنا بقمۋ وكىلدەرى بەلسەندى قاتىستى. ءبىزدىڭ لينگۆيست-عالىمدار لاتىن الىپبيىنە كوشۋدىڭ عىلىمي-ادىستەمەلىك جاعىن قامتۋعا اتسالىسۋدا. ارنايى سەمينارلار وتكىزىلىپ, ادىستەمەلىك قۇرالدار دايىندالىپ جاتىر. ءبىز دايىن اسقا تىك قاسىق بولماي, ەل ەرتەڭىنە قاجەتتى يگىلىكتى ءوزىمىز جاساۋعا تىرىسامىز.
كوپتىڭ كوڭىلىنەن شىققان ماڭىزدى باعىت – «تۋعان جەر» جوباسى. بۇل جوبا شەڭبەرىندە عىلىمي جانە عىلىمي-تانىمدىق ەكسپەديتسيالاردىڭ ورنى ەرەكشە. سوڭعى كەزدە ۋنيۆەرسيتەتتە بىرنەشە عىلىمي-تانىمدىق ەكسپەديتسيا ۇيىمداستىرىلدى. 2017 جىلى تامىز ايىندا «قازاقستاننىڭ جالپى ۇلتتىق 100 كيەلى نىسانى» تىزىمىنە ەنگەن ورتاعاسىرلىق جايىق قالاسى اۋماعىندا دوتسەنت مۇرات قالمەنوۆ ارحەولوگيالىق قازبا جۇمىسىن جۇرگىزگەن ەدى. ۋنيۆەرسيتەتتىڭ پروفەسسورلىق-وقىتۋشىلىق قۇرامى مەن ستۋدەنتتەردەن جاساقتالعان ەكسپەديتسيا بوكەي وردا وڭىرىندە, شىڭعىرلاۋ اۋدانىندا جۇمىس اتقارىپ قايتتى. مۇنىڭ ءبارى تەوريا مەن پراكتيكانى ۇشتاستىرىپ, ستۋدەنت ساناسىندا ۇمىتىلماس اسەر سىيلارى انىق.
«جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى بويىنشا جارىق كورگەن 18 وقۋلىق ۋنيۆەرسيتەتكە جەتكىلىكتى كولەمدە الىندى. وسى وقۋلىقتار جونىندە پروفەسسور-وقىتۋشىلار قۇرامى, قىزمەتكەرلەر مەن ستۋدەنتتەر باق ارقىلى ءوز وي-پىكىرىن ءبىلدىرىپ, وقۋ ۇردىسىندە ءتيىمدى پايدالانۋ جولىن قاراستىرۋدا. بۇل جەردە عىلىمي-ادىستەمەلىك بولىمدەر مەن ساراپتاما كەڭەسى بەلسەندى جۇمىس ىستەپ وتىر. مىسالى, ساراپتاما كەڭەسىندە «يۋدايزم, حريستياندىق پەن يسلامداعى 4000 جىلدىق ىزدەنىس: قۇدايتانۋ بايانى» اتتى وقۋلىق قىزۋ تالقىلاندى.
وقۋ ورنىمىزدىڭ عالىمدارى مەن قىزمەتكەرلەرى وسى باعىتتاعى جۇمىستا تەك ۋنيۆەرسيتەت كولەمىمەن شەكتەلمەي, قالا, وبلىس جانە شەتەل كولەمىندە دە تارالدى. سونىڭ ىشىندە «جاhانداعى زاماناۋي قازاقستاندىق مادەنيەت» جوباسى بويىنشا شارالارعا ەرەكشە كوڭىل بولىنۋدە. اتاپ ايتساق, ەلىمىزدىڭ مادەنيەتىمەن تانىستىرۋ الىس-جاقىن شەت ەلدەرىندەگى ارىپتەس ءبىلىم وردالارىندا, مىسالى پولشا, لاتۆيا, رەسەي وقۋ ورىندارىندا تۇراقتى وتكىزىلۋدە. 2017-2018 وقۋ جىلىندا پولشا رەسپۋبليكاسىنىڭ بىدگوشش قالاسىنداعى ەكونوميكا ۋنيۆەرسيتەتىندە, كەيىن لاتۆيا رەسپۋبليكاسىنىڭ ريگا تەحنيكالىق ۋنيۆەرسيتەتىندە «رۋحاني جاڭعىرۋ» باعىتىن قازاقستاننىڭ مادەنيەتىمەن تانىستىرۋ شارالارى تابىستى ءوتتى.
كەلەشەكتە «رۋحاني جاڭعىرۋ» باعدارلاماسىنىڭ عىلىمي نەگىزىن كۇشەيتۋ ءۇشىن عىلىمي جوبالار بويىنشا جۇمىستىڭ كولەمىن كەڭەيتۋ قاجەت. سول سەبەپتى الەۋمەتتىك جانە گرانتتىق عىلىمي جوبالار دا قولعا الىنۋدا. ۋنيۆەرسيتەت فاكۋلتەتتەرىندە ديپلوم جوبالارى مەن ماگيسترلىك ديسسەرتاتسيا تاقىرىپتارى بازاسى قوعامدىق سانانى جاڭعىرتۋدىڭ نەگىزگى باعىتتارىنا ارنالعان زەرتتەۋ تاقىرىپتارىمەن تولىقتىرىلدى.
«رۋحاني جاڭعىرۋ» باعدارلاماسىنا ارنالىپ ل.ن.گۋميلەۆ اتىنداعى ەۇۋ بازاسىندا ۇيىمداستىرىلعان جاس عالىمداردىڭ رەسپۋبليكالىق عىلىمي جۇمىستار بايقاۋىندا ۋنيۆەرسيتەتىمىزدىڭ جاس ىزدەنۋشىلەرى بىرنەشە باعىت بويىنشا 4 جۇلدەلى ورىنعا يە بولدى. الەۋمەتتىك زەرتتەۋلەردى ۇيىمداستىرۋ, ۇلتتىق بىرەگەيلىكتى ساقتاۋ, «ماڭگىلىك ەل» پاتريوتتىق يدەيانىڭ قۇندىلىقتارى مەن قازىرگى جاستاردىڭ بەينەسىنە قاراستى جوبالار بويىنشا جۇمىستار قولعا الىنۋدا.
«رۋحاني جاڭعىرۋ» باعدارلاماسىنىڭ نەگىزگى ۇستانىمدارىن ءبىلىم الۋشىلارعا وقۋ ءۇردىسى ارقىلى جەتكىزۋ ءۇشىن ارنايى وقۋ باعدارلامالارى – ەلەكتيۆتى كۋرستار دايارلاندى.
ەلباسى زاماناۋي قازاقستاننىڭ ازاماتى قانداي بولۋى قاجەت ەكەنىن ايقىنداپ بەردى. ءبىز جۇرگىزگەن مونيتورينگ ناتيجەسى جاستاردىڭ «رۋحاني جاڭعىرۋ» باعدارلاماسىن ماقۇلداپ, قولدايتىنىن كورسەتەدى. بولاشاقتا م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىندە دە جوسپارلى جانە كەشەندى جۇمىس اتقارىلا بەرمەك.
«جاڭا جاعدايدا جاڭعىرۋعا دەگەن ىشكى ۇمتىلىس – ءبىزدىڭ دامۋىمىزدىڭ ەڭ باستى قاعيداسى» دەگەن ەلباسى ماقالاسى زامان كوشىنەن قالماي, الەم كوز تىككەن, دامىعان وزىق ەلدەر قاتارىنان ورىن الۋ ءۇشىن جاھاندىق باسەكەگە قابىلەتتىلىكتى ارتتىرىپ, ء«ومىر ءۇشىن وزگەرە ءبىلۋ كەرەكتىگىن, وعان كونبەگەندەر تاريحتىڭ شاڭىنا ىلەسە المايتىنىن» ۇقتىرعانداي.
نۇرلان سەرعاليەۆ,
ماحامبەت وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ رەكتورى,
بيلولوگيا عىلىمدارىنىڭ كانديداتى,
قاۋىمداستىرىلعان پروفەسسور
ورال