ەلباسى نۇرسۇلتان نازارباەۆ تاياۋدا شىمكەنت قالاسىنىڭ ميلليوننان استام تۇرعىنى بار قالالار قاتارىنا قوسىلعانىن مالىمدەپ, سول سەبەپتى جاڭادان تۇركىستان وبلىسىن قۇرىپ, ونىڭ ورتالىعىن تۇركىستان قالاسىنا كوشىرۋ تۋرالى جارلىققا قول قويعانى بەلگىلى.
«تۇركىستان – ەر تۇرىكتىڭ بەسىگى عوي» دەپ ماعجان اقىن جىرلاعانداي, بۇل تاريحي شەشىمگە بارشا تۇركى حالىقتارى قۋانىپ, باۋىرلاس ەلدەردىڭ بۇقارالىق اقپارات قۇرالدارى اقجولتاي جاڭالىقتى جارىسا جازدى. بۇل اقپاراتتى TRT Avaz ارناسى, Anadoly Agency اگەنتتىگى, Dünya Bülteni اقپارات پورتالى ءسۇيىنشى سۇراپ, العاشقىلاردىڭ ءبىرى بولىپ حابارلادى.
*****
بۇدان بولەك, جەلى قولدانۋشىلارى دا ءبىر-بىرىنەن ءسۇيىنشى سۇراپ, الەۋمەتتىك جەلىدەگى پاراقشالارىندا جاڭالىقپەن ءبولىستى. ماسەلەن, چاگداش بايراكتار ەسىمدى ازامات بىلاي دەيدى:
«بىرنەشە جىل بۇرىن نۇرسۇلتان نازارباەۆ تۋرالى جازۋدى ويلاپ جۇرگەن ەدىم. ۋاقىت وتە بەردى. ەندى وسى شەشىمنەن كەيىن ول كىسى تۋرالى جازۋىم مىندەتتى. ول ءوز مىندەتىن ادال اتقارىپ, قامقورلىق تانىتادى».
سونگۇل بەرك ەسىمدى ازامات «نۇرسۇلتان نازارباەۆ بۇگىن قول قويدى. بۇدان بىلاي وڭتۇستىك قازاقستان وبلىسى تۇركىستان دەپ اتالادى. تۇركى ەلدەرى مەن ەرلەرى, قۇتتى بولسىن!», دەپ اعىنان جارىلىپتى.
تايفۋن تانجۋ كارا ەسىمدى فەيسبۋك قولدانۋشىسى وقيعانى عاجايىپ وقيعاعا بالاپ وتىر. «وڭتۇستىك قازاقستان وبلىسى تۇركىستان بولىپ وزگەردى. وبلىس ورتالىعى تۇركىستان قالاسىنا كوشىرىلەدى. ءتۇپ-تامىرىنا قۇرمەت كورسەتكەن قازاقتاردى وسىناۋ تاريحي شەشىممەن قۇتتىقتايمىن. تۇركىستان مىڭداعان جىلدار بويى تۇركى الەمىنىڭ رۋحاني جانە ساياسي تىرەگى بولعان ەدى. مىڭ جاسا, قازاقستان! تۇركى حالىقتارىنىڭ باۋىرلاستىعى ماڭگىلىك بولسىن», دەيدى ول.
وسىلايشا, باۋىرلاس ەلدەردەگى الەۋمەتتىك جەلى قولدانۋشىلارى اقجولتاي حاباردى جاپپاي ءبولىسىپ, ءبىر-بىرىنەن ءسۇيىنشى سۇراپ جاتىر.
ايتپاقشى, وسى وقيعا قارساڭىندا رەسەيدىڭ Regnum اقپارات اگەنتتىگى بۇدان بىلاي وزدەرىنىڭ سايتتارىندا ورتالىق ازيا ايماعىن تۇركىستان دەپ اتاۋ جونىندە شەشىم قابىلداپتى. بۇل تۋرالى اگەنتتىكتىڭ باس رەداكتورى مودەست كولەروۆ مالىمدەدى.
*****
«Regnum ورتالىق/ورتا ازيا/قازاقستان تۇسىنىگىنەن ارىلىپ, قازاقستان, وزبەكستان, تۇرىكمەنستان, تاجىكستان جانە قىرعىزستاننىڭ ءداستۇرلى اتاۋى تۇركىستاندى قولدانادى», دەلىنگەن م.كولەروۆتىڭ فەيسبۋكتەگى پاراقشاسىندا.
ازىرگە باسقا رەسەيلىك بۇقارالىق اقپارات قۇرالدارى Regnum اقپارات اگەنتتىگىنىڭ باستاماسىن قولداپ, ءوڭىر اتاۋىن وزگەرتكەن جوق. ايتسە دە, كەلەشەكتە بۇل ماسەلە دە ءوز شەشىمىن تاۋىپ, ورتالىق ازيا ءوڭىرى تاريحي اتاۋىن قايتارىپ, تۇركىستان اتانىپ جاتسا نۇر ۇستىنە نۇر ەمەس پە؟!
دايىنداعان اباي اسانكەلدى ۇلى,
«ەگەمەن قازاقستان»