ۇكىمەتتە رەسپۋبليكا قالالارىنىڭ اۆتوبۋس پاركتەرىنىڭ تۇبەگەيلى جاڭعىرتۋ جونىندە ۇزاق مەرزىمگە ەسەپتەلگەن جوبا جاساقتالىپ كەلگەنىنەن كوپشىلىك حاباردار. مىنە, ەلىمىزدە ەشقانداي بالاماسى مەن تەڭدەسى جوق قاناتقاقتى جوبانىڭ تۇساۋى رەسپۋبليكا ۇكىمەتى مەن اقتوبە وبلىستىق اكىمدىگى اراسىندا جاسالعان بىرلەسكەن جوباعا سايكەس كەشە تۇڭعىش رەت اقتوبە قالاسىندا كەسىلدى. وسى ارادا وتاندىق اۆتوبۋس قۇراستىرۋشىلار جاڭا ساپالىق جانە كاسىبي دەڭگەيگە بەت بۇردى دەۋگە تولىق نەگىز بار.
كەشە سارسەنبىنىڭ ءساتتى كۇنى وبلىس ورتالىعىنداعى جەكەمەنشىك جانە مەملەكەتتىك اۆتوپاركتەردى تولىقتىرعان سۋ جاڭا سىيىمدىلىعى مول ەكولوگيالىق اۆتوبۋستار قوستانايداعى «الليۋر كومپانيالار توبى» اق-تىڭ اۋماعىندا جاسالعان. اتاپ ايتقاندا, قالالىق باعىتتارعا جول تارتقان 70 اۆتوبۋس پەن بالالارعا ارنالعان شاعىن اۆتوبۋستاردى قۇراستىرىپ شىعارۋ ىسىندەگى قازاقستاندىق ۇلەستىڭ كولەمى تيىسىنشە 70 جانە 35 پايىزدى قۇرايدى.
ەۋرو-5 ستاندارتىنداعى جولاۋشىلار تاسىمالدايتىن جاڭا قالالىق كولىكتەر نەگە ەكولوگيالىق دەپ اتالعان؟ «قدب-ليزينگ» اق باسقارماسىنىڭ توراعاسى نۇرلان بايبازاروۆتىڭ ايتۋىنشا, مۇنىڭ ءمانىسى ەكولوگيالىق تۇرعىدان تازا بولۋىندا. اۋا مەن قورشاعان ورتاعا زياندى زاتتار شىعارماۋىندا. كوگىلدىر وتىننىڭ مەتان دەپ اتالاتىن ءتۇرىن پايدالانۋ ارقىلى قوزعالاتىن اۆتوبۋستار ەكونوميالىق تۇرعىدان دا ءتيىمدى. وبلىس ورتالىعىنا قارجىلىق ليزينگتتىك تاسىلدەر بويىنشا ساتىپ الىنعان اۆتوبۋستاردىڭ قۇنى 2 ملرد 578 ميلليون تەڭگەنى قۇرايدى. قاناتقاقتى جوباعا سايكەس وبلىس ورتالىعىنداعى اۆتوبۋس پاركتەرىنىڭ قۇزىرىنا بەرىلگەن قوعامدىق كولىكتەردىڭ قۇنى قارجىلىق ليزينگ باعدارلاماسىنا سايكەس بەس جىلعا جەتى پايىزدىق وسىممەن ۇسىنىلعان. جوعارىدا اتالعان ليزينگتتىك تاسىلمەن تولەنەتىن قارجىنىڭ وتىز پايىزى وڭىردەگى «تابىس» كوممۋنالدىق كاسىپورنى ەنشىسىنە تيەدى.
ەۋرو-5 ستاندارتى بويىنشا تۇڭعىش رەت اقتوبە وبلىسىنىڭ مىسالىندا جۇزەگە اسىپ ەلىمىزدىڭ بارلىق قالالارىنىڭ اۆتوبۋس پاركتەرىنە ەنگىزىلەتىن ەكولوگيالىق سيپاتتاعى اۆتوبۋستاردىڭ تاعى ءبىر ەرەكشەلىگى – مۇمكىندىگى شەكتەۋلى جاندار ۇشىندە مەيلىنشە ىڭعايلى بولۋىندا. ياعني ارنايى تەتىك ارقىلى اۆتوبۋس توقتاعان كەزدە جىلجىمالى پاندۋس تەز تۇسىرىلەدى دە, بۇل ءتاسىل مۇگەدەكتەر مەن جاسى ۇلعايعان جانداردىڭ اۆتوبۋس سالونىنا كىرۋى مەن شىعۋىن جەڭىلدەتەدى. جاڭا قوعامدىق كولىكتەرگە ءتان تاعى ءبىر ارتىقشىلىقتار – ادامداردىڭ قاۋىپسىزدىگى ءۇشىن بارلىق تەحنولوگيالىق تاسىلدەردىڭ ورنىقتىرىلعانى.
بۇعان تسيفرلى تەحنولوگيانىڭ كەيبىر ەلەمەنتتەرى, بەينەكامەرالار جانە ديسپەتچەرلىك ورتالىقپەن بايلانىس جۇيەلەرى كىرەدى.
رەسپۋبليكا قالالارىنىڭ اۆتوبۋس پاركتەرىن تۇبەگەيلى جاڭعىرتۋ جونىندە ۇزاق مەرزىمگە جاسالعان باعدارلاما تۇڭعىش رەت اقتوبە ايماعىندا جۇزەگە اسۋىنا وراي وتكىزىلگەن سالتاناتتى راسىمدە اقتوبە وبلىسىنىڭ اكىمى بەردىبەك ساپارباەۆ بۇل ومىرشەڭ جاڭالىق تۇرعىنداردىڭ ءومىر ءسۇرۋ دەڭگەيىن جاقسارتۋ ءۇشىن جاسالعان ىرگەلى قادام ەكەنىن اتاپ كورسەتتى. وبلىس باسشىسىنىڭ ايتۋىنشا, تەك سوڭعى ءبىر جىلدىڭ ىشىندە اۆتوبۋس پاركتەرىن جاڭعىرتۋ ءۇشىن 120 جاڭا اۆتوبۋس ساتىپ الىنعان.
مۇنىڭ ءبارى تۇرعىنداردىڭ يگىلىگى ءۇشىن جاسالعانى حاق.سونداي-اق وسى ءراسىم كەزىندە جوعارىدا اتالعان «الليۋر كومپانيالار توبى» اق-نا قاراستى «سارىارقااۆتوپروم» جشس-ءنىڭ ديرەكتورى سىرىم سەمەيباەۆ اقتوبە وبلىسىنىڭ اكىمدىگى جاڭا اۆتوبۋستاردى قالالىق باعىتتارعا ەنگىزۋ مەن ءتيىستى قارجىلىق ليزينگ باعدارلاماسى قۇجاتتارىنىڭ جەدەل ازىرلەۋ ىسىندە ىلكىمدىلىك پەن وڭتايلىلىق تانىتا بىلگەنىن اتاپ كورسەتتى.
سونىمەن رەسپۋبليكا قالالارىنداعى اۆتوبۋس پاركتەرىنىڭ قىزمەتىن تۇبەگەيلى جاڭعىرتۋ جونىندە ۇكىمەتتە ۇزاق مەرزىمگە ارنالعان جوبا اقتوبەدەن باستاۋ الدى. ەندەشە, ىسكە ءسات دەمەكپىز!
تەمىر قۇسايىن,
«ەگەمەن قازاقستان»
اقتوبە