بۇگىن قر پرەزيدەنتى نۇرسۇلتان نازارباەۆتىڭ تاپسىرماسى بويىنشا پرەمەر-مينيستر باقىتجان ساعىنتاەۆ پەن پرەزيدەنت اكىمشىلىگىنىڭ باسشىسى ادىلبەك جاقسىبەكوۆ جاڭادان قۇرىلعان تۇركىستان وبلىستىق ءماسليحاتىنىڭ سەسسياسىنا قاتىستى.
وتىرىس بارىسىندا پرەمەر-مينيستر باقىتجان ساعىنتاەۆ تۇركىستان وبلىسىنىڭ اكىمى لاۋازىمىنا جانسەيىت قانسەيىت ۇلى تۇيمەباەۆتى تاعايىنداۋ تۋرالى ۇسىنىسى جازىلعان مەملەكەت باسشىسىنىڭ وبلىستىق ءماسليحات دەپۋتاتتارىنا جولداعان حاتىن وقىپ بەردى. داۋىس بەرۋ قورىتىندىسى بويىنشا دەپۋتاتتار پرەزيدەنت ۇسىنعان كانديداتۋرانى ءبىراۋىزدان قولدادى.
ج. تۇيمەباەۆ 1958 جىلى دۇنيەگە كەلگەن. س. م. كيروۆ اتىنداعى قازاق مەملەكەتتىك ۋنيۆەرسيتەتىن جانە ماسكەۋ مەملەكەتتىك الەۋمەتتىك ۋنيۆەرسيتەتىن تامامداعان. فيلولوگيا عىلىمدارىنىڭ دوكتورى. ءار جىلدارى قر پرەزيدەنتى حاتتاماسىنىڭ جەتەكشىسى, قر پرەزيدەنتىنىڭ كەڭەسشىسى, قر-نىڭ رف-تەگى توتەنشە جانە وكىلەتتى ەلشىسى, قر ءبىلىم جانە عىلىم ءمينيسترى, قر-نىڭ تۇركيا رەسپۋبليكاسىنداعى توتەنشە جانە وكىلەتتى ەلشىسى قىزمەتتەرىن اتقارعان. 2016 جىلعى قازان ايىنان باستاپ وڭتۇستىك قازاقستان وبلىسىنىڭ اكىمى لاۋازىمىن اتقارعان.
بۇدان كەيىن پرەمەر-مينيستر باقىتجان ساعىنتاەۆ پەن قر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ تۇركىستان وبلىسىنىڭ اكتيۆىمەن كەزدەسىپ, جاڭا اكىمدى تانىستىردى.
باقىتجان ساعىنتاەۆ كەشە مەملەكەت باسشىسىنىڭ تاريحي شەشىمىمەن ەلىمىزدە جاڭا تۇركىستان وبلىسى قۇرىلعانىن ەسكە سالدى.
«تۇركىستان كوپتەگەن عاسىرلار بويى تەك ورتالىق ازيانىڭ ەمەس, سونداي-اق بۇكىل تۇركى الەمىنىڭ ساياسي ءارى رۋحاني ءومىرىنىڭ ورتالىعى بولدى. مەملەكەت باسشىسىنىڭ كيەلى تۇركىستاندى وبلىس ورتالىعى رەتىندە بەلگىلەۋى تۋرالى شەشىمى ءوڭىردى ودان ءارى دامىتۋعا سەپتىگىن تيگىزەدى. ەلباسىنىڭ وسى تاريحي شەشىمى جەرگىلىكتى حالىقتىڭ ءومىرىن جاقسارتۋعا, سونداي-اق جالپى ءوڭىردىڭ الەۋمەتتىك-ەكونوميكالىق دامۋىنا وڭ ىقپال ەتەدى», — دەدى ب. ساعىنتاەۆ.
مەملەكەت باسشىسىنىڭ تاپسىرمالارىن ورىنداۋ ماقساتىندا قر پرەمەر-ءمينيسترىنىڭ ءبىرىنشى ورىنباسارى ا. ءماميننىڭ توراعالىعىمەن تۇركىستان قالاسىنىڭ تۇركى الەمىنىڭ مادەني جانە رۋحاني ورتالىعى رەتىندە دامۋىنا ىقپال ەتەتىن باس جوسپاردى ازىرلەۋ بويىنشا ۇكىمەتتىك كوميسسيا قۇرىلدى.
تانىستىرۋ بارىسىندا باقىتجان ساعىنتاەۆ ج. تۇيمەباەۆتىڭ ءتۇرلى جاۋاپتى باسشىلىق قىزمەتتەردەگى ۇلكەن جۇمىس تاجىريبەسىن اتاپ ءوتتى.
سونداي-اق, كەزدەسۋ اياسىندا جەرگىلىكتى جۇرتشىلىق وكىلدەرى دە ءسوز سويلەدى. جازۋشى مارحابات بايعۇت, قوعام قايراتكەرى ش. مىرزاحمەتوۆ ءوڭىر اتىنان مەملەكەت باسشىسىنا حالىقتىڭ رۋحاني كۇش-جىگەرىن كوتەرەتىن جانە ءوڭىردى دامىتۋعا جاڭا سەرپىن بەرەتىن شەشىم قابىلداعانى ءۇشىن العىس ءبىردىردى.
ايتا كەتەيىك, 19 ماۋسىمدا پرەزيدەنتتىڭ «قر اكىمشىلىك-اۋماقتىق قۇرىلىسىنىڭ كەيبىر ماسەلەلەرى تۋرالى» جارلىعىمەن وڭتۇستىك قازاقستان وبلىسى تۇركىستان وبلىسى دەپ قايتا اتالىپ, اكىمشىلىك ورتالىعى تۇركىستان قالاسى بولدى.