عاسىرلىق تاريحى بار «قازاق راديوسى» ازىرلەيتىن «تۇركىستاننان تارتۋ» باعدارلاماسى الەمنىڭ قىرىققا جۋىق تىلىندە حابار تاراتاتىن «تۇركيا ءۇنى» راديوسى ارقىلى تىڭداۋشىلارعا جول تارتتى.
اعايىن اراسىنا التىن ارقاۋ بولعان بۇل يگى ءىس «قازاق راديولارى» جشس مەن تۇركيا مەملەكەتتىك تەلەراديو كورپوراتسياسىنىڭ (TRT) «تۇركيا راديولارى» باسقارماسى اراسىنداعى ەكىجاقتى كەلىسسوزدەر ناتيجەسىندە جۇزەگە اسىپ وتىر. اتاپ ايتقاندا, بيىلعى مامىر ايىندا سەرىكتەستىك باسشىسى ءمادي ماناتبەك ۇلى باستاعان راديو دەلەگاتسياسى ارنايى شاقىرتۋمەن تۇركيادا بولىپ, باۋىرلاس ەكى ەلدىڭ ارىپتەس قۇرىلىمدارى اراسىندا مادەنيەت, رۋحانياتقا ارنالاتىن حابار الماسۋ تۋرالى ۋاعدالاسقان ەدى.
«قازاق راديوسى» تاريحي وتانىنان تىس جۇرگەن اعايىنعا حالقىمىزدىڭ باي مادەني مۇراسى جايلى مول ماعلۇمات بەرىپ, رۋحاني اسىل قازىنامىزدى ناسيحاتتاۋدى ماقسات ەتكەن «تۇركىستاننان تارتۋ» باعدارلاماسىن ۇسىندى. راديوحابار تۋعان جەردى اڭساپ, ءتول ونەرىمىزگە شولىركەپ جۇرگەن قيىرداعى قانداستاردىڭ ساعىنىشىن باسۋدى كوزدەيدى.
ال «تۇركيا ءۇنى» راديوسى دايىندايتىن «انادولى تىنىسى» حابارى قازاق تىڭدارمانىن تۇركياداعى مادەني ءھام سپورتتىق جاڭالىقتاردان قۇلاعدار ەتەدى. بۇدان بولەك, اتالعان باعدارلاما قازاقستاندىق تىڭداۋشىنى تۇركيادا تۇراتىن قازاقتاردىڭ ءومىر سالتىمەن جانە ەكى ەل اراسىنداعى دوستىق قارىم-قاتىناس اياسىنداعى ءىس-شارالارمەن تانىستىرادى.
بۇل باعدارلامالار ارقىلى ءتۇبى ءبىر حالىقتاردىڭ رۋحاني, مəدەني, تىلدىك جانە تاريحي تامىرلاستىعىن اقپاراتتىق كەڭىستىكتە دە نىعايتا ءتۇسۋ كوزدەلگەن.
ايتا كەتەرلىگى, العاش 2018 جىلدىڭ 3 ماۋسىمىندا اۋە تولقىنعا شىققان راديوباعدارلامالاردى اپتا ارالاتىپ, جەكسەنبى كۇنى تىڭداۋعا بولادى. «تۇركىستاننان تارتۋ» حابارى استانا ۋاقىتىمەن 19:40-تا «تۇركيا ءۇنى» راديوسىنىڭ ەفيرىنەن بەرىلەدى. ال «انادولى تىنىسى» باعدارلاماسىن «قازاق راديوسىنىڭ» تىڭدارماندارى ساعات 15:00-دە تىڭداي الادى.