جۋىردا پارلامەنت ءماجىلىسىنىڭ جالپى وتىرىسىندا «ارحيۆ ءىسى» تۋرالى زاڭ جوباسى تالقىلاندى. مەملەكەت باسشىسىنىڭ «قازاقستان-نىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىن ىسكە اسىرۋ ماقساتىندا ازىرلەنگەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ارحيۆ ءىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ارحيۆ سالاسىنىڭ زاڭنامالىق بازاسىن جەتىلدىرۋگە, ارحيۆ ءىسىنىڭ جەكەلەگەن باعىتتارىنىڭ تيىمدىلىگىن ارتتىرۋعا, قىزمەتىن كەڭەيتۋگە باعىتتالعان.
اتالعان زاڭدا ۇعىمدىق اپپارات كەڭەيتىلدى, مەملەكەتتىك ارحيۆتەر اقىلى نەگىزدە كورسەتەتىن قىزمەتتەر تىزبەسى ناقتى كورسەتىلگەن. اقىلى قىزمەتتەردىڭ قاتارىنا اتاپ ايتار بولساق, تاقىرىپتىق, گەنەالوگيالىق سۇراۋلار, ارحيۆ قۇجاتتارىنىڭ دەپوزيتارلىق ساقتالۋى جانە دە تاعى باسقا كوپتەگەن قىزمەت تۇرلەرى جاتادى. اقىلى قىزمەتتەن تۇسكەن قاراجات ارحيۆتەردىڭ ماتەريالدىق-تەحنيكالىق بازاسىن جاقسارتۋعا ءارى وسى سالادا قىزمەت اتقارىپ كەلە جاتقان مامانداردىڭ جالاقىسىن كوتەرۋگە جۇمسالادى. بۇل ءوز كەزەگىندە وسى سالاعا قىزىعۋشىلىعى بار مامانداردى ىنتالاندىرادى ءارى ولاردىڭ جۇمىس ىستەۋىنە قولايلى جاعداي جاسايدى.
ءماجىلىستىڭ جالپى وتىرىسىندا زاڭ جوباسىن ءبىرىنشى وقىلىمدا ماقۇلداعان دەپۋتاتتار دا سالا ماماندارىنىڭ جالاقىسىن ارتتىرۋ ماسەلەسىن كوتەرگەن بولاتىن. الەۋمەتتىك سالا قىزمەتكەرلەرى اراسىندا ەڭ تومەنگى جالاقى الاتىن – ارحيۆ سالاسىنىڭ قىزمەتكەرلەرى ەكەنىن ايتا كەتەيىك. بىراق جالاقى از دەپ سالا ماماندارى ەشقاشان قول قۋسىرىپ وتىرعان جوق. ورتالىق مەملەكەتتىك كينو-فوتوقۇجاتتار مەن دىبىس جازبالارى ارحيۆىندە قازىرگى تاڭدا 27 مامان قىزمەت اتقارادى. ونىڭ 20-سى جوعارى ءبىلىمدى, بىلىكتى ماماندار. ولار كينو تاريحىن, ءان ونەرىن, مادەنيەت پەن سالت-داستۇرلەردى زەرتتەۋ ءۇشىن قازاقستاندىقتارعا قۇندى قۇجاتتاردىڭ قولجەتىمدى بولۋىنا جاعداي جاساپ كەلەدى. ءارحيۆىمىزدىڭ قورىندا قازىرگى ۋاقىتتا جالپى سانى 300 مىڭعا جۋىق ۇلكەن ماڭىزعا يە كينوفوتوقۇجات پەن دىبىس جازبالارى ساقتالعان. جىل سايىن ارحيۆ ماماندارىنىڭ قاراۋىنا 3 مىڭنان استام قۇجات كەلىپ تۇسەدى. اقىلى قىزمەتتەن تۇسەتىن قارجىنىڭ تاعى ءبىر بولىگى وسى فوتو-فونوقۇجاتتاردى زاماناۋي تەحنيكالىق جابدىقتالعان جاعدايدا اۋدارۋعا جۇمسالاتىن بولادى. ياعني كوگەرگەن, ب ۇلىنگەن زاقىمدانۋلارمەن كۇرەسۋگە, ماتەريالداردىڭ تەحنيكالىق جاي-كۇيىن ۇنەمى باقىلاۋعا باعىتتالادى. سونىمەن قاتار ۋلترادىبىستىق تاسىلمەن كينوقۇجاتتاردى تازالايتىن, ولاردى سكانەرمەن كوشىرەتىن, ەلەكتروندى قۇجاتتاردى قۋاتتى سەرۆەرلەرگە ساقتايتىن, ارحيۆ قورىنداعى كينوقۇجاتتاردىڭ كوشىرمەلەرىن قاجەتتى ۇلگىدە دايىندايتىن, قوسىمشا جاڭا جابدىقتار الۋعا دا مۇمكىندىك تۋادى. قازىرگى ۋاقىتتا ارحيۆ قورىنىڭ 70% فونوقۇجاتتارى قايتا قالپىنا كەلتىرىلىپ, ساقتالىپ, زاماناۋي تاسىعىشتارعا اۋىستىرىلدى. قولجەتىمدىلىكتى ارتتىرۋ ماقساتىندا ساندىق جۇيەگە كوشۋ جۇمىستارى قارقىندى جۇرگىزىلىپ كەلەدى.
جىل سايىن 5 مىڭعا جۋىق كينوفوتوقۇجات پەن دىبىس جازباسى تسيفرلى فورماتقا كوشىرىلەدى. بۇل وتە ۇلكەن, اۋقىمدى جۇمىس. ءبىز قولىمىزداعى بارلىق تاريحي جادىگەرلەردى قازاقستانىمىزدىڭ بولاشاعى وسكەلەڭ ۇرپاقتىڭ نازارىنا ۇسىنىپ, ساناسىنا ءسىڭدىرۋ ارقىلى ولاردى وتانسۇيگىشتىككە, ءوزىنىڭ تاريحىنا قۇرمەتپەن قاراۋعا تاربيەلەي الامىز. الداعى ۋاقىتتا ۇلتتىق قۇندىلىقتار قازىناسىن ساندىق تەحنولوگيالار جەتىستىكتەرىن پايدالانا وتىرىپ, ولاردى عاسىردان-عاسىرعا, ۇرپاقتان-ۇرپاققا جەتكىزۋ جولىندا قارقىندى جۇمىس جاساي بەرەمىز.
تاسقىن تويباەۆ,
«ورتالىق مەملەكەتتىك كينو-فوتوقۇجاتتار جانە دىبىس جازبالار ءارحيۆى» رمم ديرەكتورى