بيىلعى الەم چەمپيوناتى وتە قىزىقتى ءوتىپ جاتىر. ازىرگە, العاشقى اينالىمنان كەيىن وسىلاي دەۋگە نەگىز بار.
چەمپيوننىڭ جەڭىلۋى, وزگە فاۆوريتتەردىڭ ۇپاي جوعالتۋى, اۋتسايدەرلەردىڭ باتىلدىعى – ءبارى دە قالىڭ كورەرمەننىڭ كوڭىلىنەن شىعۋدا. الەمدىك باسپاسوزدە رەسەيدىڭ جارىستى جاقسى ۇيىمداستىرىپ جاتقانى ءسوز بولدى. اسىرەسە اعىلشىن جانكۇيەرلەرى ءدان ريزا. ولار بۇل مەملەكەتكە قورقاقتاپ كەلگەنى راس. 2016 جىلى فرانتسيا جەرىندە وتكەن ەۋروپا چەمپيوناتىندا رەسەي مەن انگليا فاناتتارى قاقتىعىسىپ, ۇلىبريتانيا ازاماتى سول وقيعادان كوز جۇمدى. بىراق تۇماندى البيوننان كەلگەن 2500 جانكۇيەر رەسەيلىكتەردىڭ ولاردى جاقسى قابىلداپ, قوناقجايلىق تانىتقانىن ايتىپ, تاڭعالۋدا.
چەمپيوناتتا بولعان جاعىمسىز وقيعا – ماسكەۋدەگى تاكسي جۇرگىزۋشىسىنىڭ جول جيەگىنە شىعىپ, 7 ادامدى قاعىپ كەتكەنىنەن باستالدى. قىرعىزستان ازاماتى شىڭعىس اناربەك ءوز كىناسىن موينىنا الىپ, كەشىرىم سۇرادى. سوت شەشىممەن ول 2 ايعا باس بوستاندىعىنان ايىرىلدى.
ال «يۋۆەنتۋس» بولسا العاشقى ويىندا جارق ەتىپ كورىنگەن رەسەيلىك ويىنشى الەكساندر گولوۆينمەن كەلىسسوزدەردى باستادى. ورىس ويىنشىسى يتاليالىق كلۋبقا اۋىسۋعا قارسى ەمەس. تەك ماسكەۋلىك تسسكا جارتىلاي قورعاۋشى ءۇشىن 25 ميلليون ەۋرو سۇراپ, تۋريندىك كلۋب بەرىپ وتىرعان 17 ميلليوندى ازسىندى. قارجىلاي داعدارىسقا ۇشىراپ جۇرگەن اسكەري كلۋب ساتىپ الۋشى 20 ميلليون ۇسىنسا, فۋتبولشىسىن ساتۋعا دايىن.
ساۋد ارابياسى قۇراماسى كەلەڭسىز وقيعاعا تاپ بولدى. پەتەربوردان روستوۆقا ۇشۋ بارىسىندا ولار وتىرعان اۋە كەمەسىن ءورت شالدى. تىكۇشاقتىڭ ءبىر قوزعالتقىشى ىستەن شىعىپ, اۋەجايعا ارەڭ دەگەندە قوندى. كەيىننەن انىقتالعانداي, تىكۇشاقتىڭ جەلدەتكىشىنە قۇستار كىرىپ كەتىپتى. ساۋد ارابياسى قۇراماسى بۇگىن 21:00-دە ۋرۋگۆايمەن كەزدەسەدى.
رەسەيدەگى الەم چەمپيوناتىندا تاعى ءبىر رەكورد جاڭاردى. مەكسيكا قۇراماسىنىڭ كاپيتانى گەرمانياعا قارسى ويىندا الاڭعا كىرىپ, ءوزىنىڭ 5-بىرىنشىلىگىندە دوپ تەپتى. مۇنداي رەكورد وسىعان دەيىن تەك 2 عانا فۋتبولشىدا بولعان. مەكسيكالىق ارداگەر ەندى انتونيو كارباحال مەن لوتتار ماتتەۋستەرمەن ءبىر تىزىمدە تۇرادى.
ارگەنتينا – يسلانديا اراسىنداعى ويىننىڭ تەلەكورسەتىلىمى وتە كوپ اۋديتوريا جيناعانى انىق. جارىق كورگەن ءبىر ستاتيستيكاعا نازار سالساق, مۇز ارالىنىڭ حالقى وسى ويىندى تەگىس كورىپتى. 360 مىڭ حالقى بار ارالدىڭ تەلەۆيزياسى بۇل ويىندى مەملەكەتتە تۇراتىن ازاماتتاردىڭ 99,6 پايىزى كورگەنىن راستادى. كىشكەنتاي ارالدىڭ ۇلكەن جەتىستىگى جايلى كۇللى مەملەكەت كورىپ, ءبىلىپ وتىر دەگەن ءسوز.
سونىمەن 1-تۋردا كوزگە تۇسكەندەر قاتارىنا مەكسيكا, رەسەي, يران, سەربيا جانە حورۆاتيا قۇرامالارىن ايتامىز. ءوز ويىندارىندا جەڭىسكە جەتىپ, توپتارىندا ءبىرىنشى ورىندا تۇر. العاشقى تۋردا جولى بولماي, كوپتەگەن قاۋىپتى ءساتتى گولعا اينالدىرا الماعان لۋيس سۋارەس ۋرۋگۆاي جانكۇيەرلەرىنىڭ تاراپىنان سىن ساداعىنا ءىلىندى. مەسسيدىڭ پەنالتي سوقپاۋى كەشىرىمدى بولعانىمەن, وعان دا ارتىلىپ جاتقان جاۋاپكەرشىلىك مول. ويىن بويى جاراقات الماۋدى ويلاعان نەيمار جانكۇيەرلەردىڭ ەكىۇداي سەزىمىن تۋدىردى. الايدا برازيليا قۇراماسى ءالى ەشتەڭە جوعالتقان جوق. الداعى ەكى ويىندى جەڭسە, «سەلەساو» فاناتتارى ءبارىن ۇمىتار ەدى. كەزىندە اتاقتى ويىنشى بولعان ەريك كانتونا نەيماردىڭ شاش ۇلگىسىن مازاق ەتىپ, الەۋمەتتىك جەلىدە پاروديا جاسادى. فرانتسيالىق ارداگەردىڭ بۇل قىلىعى نەيماردىڭ جەكە جانكۇيەرلەرىنىڭ شامىنا تيگەنى انىق.
2-تۋردا ءبىزدى ارگەنتينا – حورۆاتيا, سەربيا – شۆەيتساريا, پولشا – كولۋمبيا اراسىندا وتەتىن تارتىستى ءارى ماڭىزدى ماتچتار كۇتىپ تۇر.
ەرمۇحامەد ماۋلەن,
«ەگەمەن قازاقستان»