ورالدا بالعىن قالامگەرلەر ماراپاتتالدى

ايتا كەتۋ كەرەك, «ورال ءوڭىرى» گازەتى كىشكەنتاي وقىرماندارىمەن جۇيەلى بايلانىس ورناتقان. باسىلىمدا بالالار شىعارماشىلىعىنا ارنالعان «اينالايىن» بەتى تۇراقتى جاريالانادى. ال كىشكەنتاي قالامگەرلەردىڭ شىعارماشىلىعىنا ارنالعان بايقاۋ 2002 جىلدان بەرى ءوتىپ كەلەدى. «مەكتەپتە وقىپ جۇرگەن كەزىندە وسى بايقاۋعا قاتىسىپ, جۇلدەگەر بولعان بىرنەشە جاس بۇگىندە جۋرناليستيكا سالاسىندا قىزمەت ەتىپ, ارىپتەس بولىپ ءجۇرمىز» دەيدى «ورال ءوڭىرى» گازەتىنىڭ باس رەداكتورى باۋىرجان عۇبايدۋللين.

بۇل جولعى بايقاۋ 1-6 سىنىپ ارالىعىنداعى وقۋشىلار اراسىندا ۇيىمداستىرىلىپتى. جەڭىمپاز اتانعان كىپ-كىشكەنتاي قالامگەرلەر «جايىق پرەسس» عيماراتىنا ارنايى شاقىرىلىپ, سىيلىقتارى سالتاناتتى جاعدايدا تاپسىرىلدى. ءبىر قۋانىشتى جاعداي, بۇل جولعى جۇلدەگەرلەر بۇرىن «ورىستانعان ءوڭىر» سانالاتىن زەلەنوۆ, ءبورلى, شىڭعىرلاۋ اۋداندارىنان شىعىپتى.

وسى شاراعا ارنايى كەلگەن اقىن, قازاقستان رەسپۋبليكاسىنىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى اقۇشتاپ باقتىگەرەەۆا جاس قالامگەرلەردى قۇتتىقتاپ, اق تىلەگىن ايتتى:

- ءبىز ءسوزدى ۇعىپ, شىعارما تۇسىنەتىن بالدىرعاندارعا ءزارۋمىز عوي. ادەبيەتكە بەي-جاي قاراماي, كىتاپ-گازەت وقۋعا ىنتالى بۇلدىرشىندەردى كورگەنىمە قۋانىپ وتىرمىن. مەن دە سەندەر سەكىلدى اۋىلدا تۋىپ-ءوستىم. العاشقى ولەڭدەرىم دە اۋىلعا ارنالدى. مىنە, ارۋ الماتىنى, اسەم استانانى تاستاپ, اق جايىققا قايتىپ ورالعانىم دا وسى تۋعان جەرگە دەگەن ماحابباتتىڭ ارقاسى. سەندەردىڭ كىشكەنتاي اۋىلدارىڭ – تۋعان جەردىڭ بولشەگى. تۋىپ-وسكەن جەرلەرىڭدى سۇيىڭدەر. قازاقتىڭ ءتىلىن سۇيىڭدەر. وزگە ءتىلدى مەڭگەرىپ, الەمدى شارلاڭدار. ويتكەنى, سەندەر – ەگەمەن ەلدىڭ باقىتتى ۇرپاعىسىڭدار! - دەدى اقۇشتاپ باقتىگەرەەۆا.

بۇگىندە ءتۇرلى ادەبي بايقاۋ, ءمۇشايرا جارىستارى كوپ وتەدى. بىراق ەڭ كىشكەنتاي تالاپكەرلەر اراسىندا وتكەن سايىستىڭ ءجونى بولەك. بالانى كىشكەنە كۇنىنەن ادەبيەتكە, وقۋ-جازۋعا بەيىمدەۋ – جاس ورەندى شىعارماشىلىققا باۋليدى. بۇل جەردە وقۋشىلارىن ادەبيەتكە يكەمدەپ, تالابىن ۇشتاپ, قىزىقتىرا بىلگەن ۇستازدارىنىڭ دا ءجونى ءبىر بولەك ەكەنى ءسوزسىز.

«بالا ءتىلى – بال» دەپ جاتامىز. شىنىمەن دە ءسابي ساناسى شىنايى عوي. وسى بايقاۋعا شىڭعىرلاۋ اۋدانىنىڭ اقتاۋ اۋىلىنان قاتىسقان 2 سىنىپ وقۋشىسى رايحان تاسەمەن كورشى بالا – ءۇش جاسار مەيىرحاننىڭ قىلىعىن جازىپتى. قىستىڭ كۇنى دالاعا شىعىپ ويناعان مەيىرحان قاردان اياز اتا جاسايدى. سوسىن «ويىنشىعىن» ۇيگە الىپ كىرسە, ونىسى ەرىپ كەتىپتى. ەركە بالا قيعىلىق سالىپ, تاعى قار الدىرادى. ۇيدە وتىرىپ جاساعان اياز اتا دا كوپكە ۇزامايدى. «مەنىڭ اياز اتام نەگە ەرىپ كەتە بەرەدى؟» دەپ اڭ-تاڭ بولدى مەيىرحان» دەپ جازادى كىشكەنتاي رايحان. بايقاۋدا جۇلدەگەر بولعان ءار وقۋشىنىڭ شىعارماسىنان, سالعان سۋرەتىنەن وسىنداي شىنايىلىق, ەزۋ تارتقىزار تازالىق سەزىلىپ تۇردى.

سونىمەن, «ورال ءوڭىرى» گازەتىنىڭ عاسىرلىق تويىنا ارنالعان بالالار شىعارماشىلىعى بايقاۋىنىڭ جۇلدەسىن ءوڭىردىڭ زەلەنوۆ اۋدانىنداعى وركەن مەكتەپ بالاباقشا كەشەنى وقۋشىسى راۋكەن زايدۋللين, شىڭعىرلاۋ اۋدانى اقتاۋ اۋىلى مەكتەبى وقۋشىلارى رايحان تاسەمەن مەن شەرحان قايدارعالي, ءبورلى اۋدانى گريگورەۆ مەكتەپ-بالاباقشا كەشەنىنىڭ 4-سىنىپ وقۋشىلارى گۇلايحان عانيەۆا, ەركەبۇلان شاريبدانوۆ, ايكوركەم قاناپيا جەڭىپ الدى. ولاردىڭ ارقايسىسىنا ارنايى ديپلوم, اقشالاي سىيلىق, سپورتتىق بۇيىمدار جانە كىتاپتار توپاماسى سىيعا بەرىلدى.

- جاس بالا ون جاسىنا دەيىن كىتاپ, گازەت-جۋرنال وقۋعا داعدىلانسا, قالعان ومىرىندە جاقسىلىققا ءۇيىر, شىعارماشىل, بىلىمقۇمار, قىلمىستان اۋلاق بولىپ وسەتىنىن نەمىس عالىمدارى دالەلەگەن. ءبىز دە وسى بايقاۋ ارقىلى سابيلەرىمىزدى شىعارماشىلىققا باۋلىپ, ونەر-بىلىمگە, ادەبيەتكە قۇمار تولقىن وسىرگىمىز كەلەدى, - دەيدى بايقاۋدىڭ يدەيا اۆتورى باۋىرجان عۇبايدۋللين.

قازبەك قۇتتىمۇرات ۇلى,

«ەگەمەن قازاقستان»

باتىس قازاقستان وبلىسى

سۋرەتتى تۇسىرگەن تەمىربولات توقمامبەتوۆ