اقتاۋداعى بارلىق مەملەكەتتىك بالاباقشالار قاتەرلى ىسىككە شالدىققان بۇلدىرشىنگە قارجى جيناۋعا كومەكتەستى

دارىگەرلەر قىزدى قاتەرلى ىسىك دەرتىنە شالدىقتى دەگەن دياگنوز قويىپ وتىر جانە تولىقتاي ساۋىعىپ كەتۋىنە كەپىلدىك بەرمەگەن. سوعان قاراماستان اليمانىڭ اتا-اناسى ءۇمىت ۇزبەيدى جانە اقش, گەرمانيا, يسپانيا سياقتى ەلدەرگە بارۋعا نيەتتى. الايدا ەمگە جۇمسالاتىن قارجى ءجۇز مىڭ ەۋرودان باستالادى. مۇنداي قوماقتى قاراجاتتى جيناۋ ءۇشىن ەلىمىزدىڭ بارلىق ايماقتارى قول ۇشىن سوزۋدا. بۇل ساۋاپتى ىستەن اقتاۋداعى بالاباقشالار دا تىس قالمادى.   

اقتاۋ قالاسى № 26 «قارلىعاش» بوبەكجايىنىڭ ديرەكتورى گۇلنار شىنعاليەۆانىڭ ايتۋىنشا, ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا ايتىلعان «تۋعان جەر» باعدارلاماسىن جۇزەگە اسىرۋ اياسىندا قالالىق ءبىلىم ءبولىمىنىڭ ءىس-شارالار جوسپارىنا سايكەس, سونداي-اق استانا قالاسىنىڭ 20 جىلدىعى جانە اقتاۋ قالاسىنىڭ 55 جىلدىعىنا وراي قايىرىمدىلىق جارمەڭكەسى وتكىزىلىپ وتىر. وعان شاھارداعى بارلىق مەملەكەتتىك بالاباقشالار قاتىستى. 

-قازاق اۋەلدەن جەتىمىن جىلاتپاعان حالىق ەكەندىگى بەلگىلى. ارامىزدا جانى جومارت جاندار از ەمەس, قالتاسى قالىڭ ازاماتتار قول ۇشىن سوزىپ جاتقاندىعى قۋانتادى. ساتىلىمعا شىعارىلعان تاتتىلەر, كيىم-كەشەكتەر, اشەكەي بۇيىمداردى ساتىپ الۋعا اتا-انالار, بالاباقشا تاربيەشىلەرى مەن قالا تۇرعىندارى بەلسەندىلىك تانىتتى. بارىنشا قارجى جيناۋعا كومەكتەرىن ايامادى جانە كىشكەنتاي اليما قىزىمىزدىڭ ساۋىعىپ كەتۋىنە شىن تىلەكتەرىن جەتكىزدى. سونداي-اق, بۇل شاراعا «جانەل» جەكەمەنشىك بوبەكجايى دا بەلسەندى قاتىسىپ, جارمەڭكە ۇيىمداستىردى, دەدى گۇلنار شىنعاليەۆا.

ايتا كەتۋ كەرەك, ساتىلىمعا شىعارىلعان ونىمدەرىنىڭ دەنى بالاباقشا تاربيەلەنۋشىلەرىنىڭ قولىمەن جاسالعان, اتاپ ايتقاندا ءتۇرلى توقىما بۇيىمدارى, شاشقا تاعاتىن زاكولكا, مونشاق, بانتيك, ش ۇلىقتار بولدى. سونىمەن قاتار, جاسى ۇلكەندەر وزدەرىنىڭ قاراجاتىنا كونديتەردىك ونىمدەر (تورت, بيسكۆيت, ءبالىش, قۇيماق), كيىم-كەشەكتەر, كادەسىيلار, ويىنشىقتاردى ساتىلىمعا شىعاردى. قايىرىمدىلىق شارانىڭ ناتيجەسىندە 550.000 جۋىق تەڭگە كومەككە مۇقتاج وتباسىنىڭ شوتىنا اۋدارىلدى.

شارا اياسىندا بۇلدىرشىندەر ءان ايتىپ, بي بيلەپ ءوز ونەرلەرىن كورسەتتى. سونىمەن قاتار, جارمەڭكەگە بەلسەندى قاتىسقان بالاباقشا ۇجىمدارىنا اقتاۋ قالالىق ءبىلىم ءبولىمىنىڭ اتىنان العىس حاتتار تابىستالدى.    

كامشات ءىزباساروۆا,

قر جۋرناليستەر وداعىنىڭ مۇشەسى   

ماڭعىستاۋ وبلىسى