ەلورداداعى ۇلتتىق كىتاپحانادا مادەنيەت جانە سپورت مينيسترلىگىنىڭ جانىنان قۇرىلعان جاس اقىن-جازۋشىلار كەڭەسىنىڭ العاشقى وتىرىسى بولدى.
جيىندى اشقان مادەنيەت جانە سپورت ءمينيسترى ارىستانبەك مۇحامەدي ۇلى: «سىزدەردىڭ ارقايسىڭىزدىڭ وتاندىق ادەبيەت پەن مادەنيەتتىڭ دامۋى جونىندەگى پىكىرلەرىڭىز ءبىز ءۇشىن وتە ماڭىزدى. سوندىقتان دا بۇگىن مىنە سىزدەرمەن ادەبيەت سالاسىنداعى بىرقاتار ماسەلەلەردى تالقىلاۋ ءۇشىن جينالىپ وتىرمىز», دەپ كەڭەستىڭ ماقساتى مەن ماڭىزى تۋرالى اڭگىمەلەدى.
وتىرىستا اقىن, قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى اقبەرەن ەلگەزەك جاستار ادەبيەتىنىڭ جاي-كۇيى تۋرالى بايانداما جاساپ, قازاقستاندا جوعارى وقۋ ورنى مارتەبەسى بار «ازيا əدەبيەت اكادەمياسىن» قۇرۋدى ۇسىنىپ, ونىڭ قانداي ىستەر اتقارۋ كەرەكتىگى جونىندە جىلىكتەپ ايتىپ بەردى. سونداي-اق ول جاستار əدەبيەتىنىڭ وزىق ۇلگىلەرىن بۇۇ-نىڭ التى تىلىنە اۋدارۋ تۋرالى ۇسىنىسىن ايتا كەلىپ: «ۇشىنشىدەن, «مادەنيەت تۋرالى» زاڭدا ادەبيەتكە قاتىستى ەشقانداي ءبولىم نە باپ جوق. زاڭدا كينەماتوگرافيا بار, تەاتر بار, ءتىپتى كىتاپحانا دا بار, ال سولاردىڭ باستاۋىندا تۇرعان ادەبيەت جانرى جوق. بۇل ارينە ادەبيەتكە جاساۋعا بولاتىن يگىلىكتەردى شەكتەپ وتىر», دەدى.
ودان كەيىن قازاقستان جازۋشىلار وداعى استانا قالالىق فيليالىنىڭ ديرەكتورى, اقىن باۋىرجان قاراعىز ۇلى ءسوز الىپ, ادەبيەتتىڭ جوعارى وقۋ ورىندارىندا ناسيحاتتالۋى جونىندە وي ءوربىتتى. قازىرگى جوو باعدارلامالارى, قازاق əدەبيەتى وقۋلىعىن قايتا قاراۋ, وقۋ باعدارلاماسىنا وزگەرىستەر ەنگىزۋ تۋرالى ۇسىنىستارىمەن بىرگە. 30-40 جاس ارالىعىنداعى قالامگەرلەرگە مەملەكەتتىك دارەجەدە سىيلىق تاعايىنداۋ كەرەكتىگى تۋرالى ايتتى. «مەملەكەتتىك «دارىن» سىيلىعى 29 جاسقا دەيىن بەرىلسە, ەكى جىلدا ءبىر بەرىلەتىن مەملەكەتتىك سىيلىق 50-60 جاستان ءارى قاراي بەرىلەتىن سىيلىق رەتىندە قالىپتاسىپ قالدى, ال ناعىز شىعارماشىلىقتىڭ كۇش الاتىن كەزى 30-40 جاس ارالىعىنداعى قالامگەرلەرگە شابىت بەرەتىن ەدى», دەدى ول.
پىكىر الماسۋ نەگىزىندە ەركىن فورماتتا وتكەن جيىندا كەڭەس مۇشەلەرى ءوز ويلارىن ورتاعا سالدى. كەڭەس قۇرامىندا جاس اقىن-جازۋشىلارمەن بىرگە ايتىس اقىندارى دا بار. سولاردىڭ ءبىرى, ەكى دۇركىن «التىن دومبىرا» يەگەرى مۇحتار نيازوۆ ەفيردەن بەرىلەتىن ايتىستىڭ قيسىنسىز قيىلىپ قالاتىنىن, ايتىس اقىندارىنىڭ اسىل سوزدەرىنىڭ تەك ايتقان جەردە قالىپ, قانشا جىلدان بەرى سۇرىپتالىپ كىتاپ بولىپ شىقپاي كەلە جاتقاندىعىن ايتتى. مينيستر بۇل ماسەلە تۋرالى كەڭىنەن اڭگىمەلەپ, الداعى ۋاقىتتا ايتىستىڭ دا وتەتىنىن, كىتاپتىڭ دا شىعاتىنىن ايتتى.
ال, كەڭەس مۇشەسى, اقىن, قالقامان سارين الداعى ۋاقىتتا قالامگەرلەرگە تولەنەتىن قالاماقى تۋرالى وي قوزعاپ, اۆتورلاردىڭ شىعارمانى قايتا باستىرۋ قۇقىعى وزىندە بولسا دەگەن ۇسىنىس ايتتى. سونىمەن بىرگە ادەبيەتتى كينو ارقىلى ناسيحاتتاۋ جاعىن ەسكەرۋ كەرەكتىگىن دە ەسكە سالدى. «مىسالى, نەگە مۇقاعالي تۋرالى ءفيلىم تۇسىرمەسكە؟» دەدى.
قازاقستان جازۋشىلار وداعى الماتى وبلىستىق فيليالىنىڭ ديرەكتورى, اقىن ەرلان ءجۇنىس كىتاپ شىعارۋ ىسىندە جاس قالامگەرلەرگە باسىمدىق بەرىلىپ, كەمى 20% جاڭا بۋىنىڭ كىتابى شىقسا دەگەن ويىن ورتاعا سالسا, كەڭەس مۇشەسى, اقىن ميراس اسان كىتاپتاردىڭ اۋديو نۇسقالارىن شىعارۋمەن بىرگە كەزىندە «Qazaqstan» ۇلتتىق ارناسىندا ءجۇرىلىپ, كەيىن توقتاپ قالعان «پوەزيا əلەمى» باعدارلاماسى قايتا جالعاسىن تاپسا دەپ تىلەك ءبىلدىردى. جازۋشى بەيبىت سارىباي دراماتۋرگياعا قاتىستى ءسوز قوزعاپ, جاڭا شىعارمالاردىڭ جارىققا شىعۋى ءۇشىن قازىرگە دەيىن تانىلعان 10 جاس قالامگەرگە گرانت ءبولىپ ونەر اكادەمياسىندا وقىتۋ مəسەلەسىن كوتەرىپ: «بۇل ءتاسىل ارقىلى بىرىنشىدەن, قازاق ادەبيەتىندە كەنجەلەپ جاتقان دراماتۋرگيا جانرى دامىسا, ەكىنشىدەن تەاتر رەپەرتۋارى جاڭارادى. كينو سالاسىندا دا جەمىسىن بەرەر ەدى» دەپ تۇيىندەدى ءسوزىن. ال, جازۋشى ماقسات مəلىك ءتۇرلى ونەر ۇيىمدارىنىڭ بايلانىسىن جەتىلدىرۋ كەرەكتىگىن, تەاتر, كينو سالالارىنا قالامگەرلەردى تارتۋ قاجەتتىگىن ايتتى.
ۇسىنىستاردىڭ ءبارىن تىڭداعان مينيستر ءوز ويىن دا ورتاعا سالا وتىرىپ, مۇنىڭ ءبارى كەڭەستە قارالاتىنىن جانە نەگىزىنەن شەشىمىن تاباتىن ماسەلەلەر ەكەندىگىن ايتتى. جالپى, جاڭا زامانداعى قازاق ادەبيەتى ءوزىنىڭ اتقارۋعا ءتيىستى مىندەتتەرىن تولىق ورىنداۋ ءۇشىن مەملەكەت قولدان كەلگەن جاعدايدى جاسايتىنىن, قازىر وتاندىق ادەبيەت پەن مادەنيەتتىڭ دامۋىنا بايلانىستى بىرقاتار اۋقىمدى جۇمىستار جۇرگىزىلىپ, بۇگىندە مينيسترلىك زاماناۋي قازاقستاندىق جازۋشىلاردىڭ تۋىندىلارىن الەمنىڭ باستى تىلدەرىنە اۋدارۋ ىسىنە ەرەكشە ءمان بەرىپ وتىرعانىن تىلگە تيەك ەتىپ, بۇعان جاستاردى بەلسەندى اتسالىسۋعا شاقىردى.
ۇلاربەك نۇرعالىم ۇلى,
«ەگەمەن قازاقستان»