قاراعاندى وبلىسى جەزقازعان قالاسىنىڭ اكىمى ءوز ەركىمەن قىزمەتىنەن كەتتى, دەپ حابارلايدى قاراعاندى وبلىستىق اكىمدىگىنىڭ ءباسپاسوز قىزمەتى.
«جەزقازعان قالاسىنىڭ اكىمى باتىرلان احمەتوۆ ءوز ەركىمەن جۇمىستان كەتۋ تۋرالى تۇسىرگەن وتىنىشىنە بايلانىستى قىزمەتىنەن كەتتى. ونىڭ ۋاقىتشا مىندەتىن اتقارۋ اكىمنىڭ ورىنباسارى امانگەلدى مۇحامبەدينگە جۇكتەلدى».
باتىرلان دۇيسەنباي ۇلى 1969 جىلدىڭ 30 قاڭتارىندا قاراعاندى وبلىسىنىڭ جەزقازعان قالاسىندا دۇنيەگە كەلگەن. قاراعاندى پوليتەحنيكالىق ينستيتۋتىنىڭ جەزقازعان فيليالىن, قازاق مەملەكەتتىك باسقارۋ اكادەمياسى جانىنداعى نارىق ينستيتۋتىن جانە ە.ا.بوكەتوۆ اتىنداعى قاراعاندى مەملەكەتتىك ۋنيۆەرسيتەتىن بىتىرگەن.
بىلىكتىلىگى بويىنشا تاۋ-كەن ينجەنەر-بايىتۋشى, ەكونوميست جانە زاڭگەر. ەڭبەك جولىن 1989 جىلى «جەزقازعانتۇستىمەتالل» عىلىمي-وندىرىستىك بىرلەستىگىنىڭ ديىرمەن ماشينيسىنەن باستاعان.
1992 جىل مەن 2012 جىلدار ارالىعىندا ءار ءتۇرلى ماماندىقتا سالىق ورگاندارىندا سونىڭ ىشىندە جەزقازعان جانە ساتباەۆ قالالارىنىڭ سالىق باسقارماسىندا باسشى قىزمەتىن اتقاردى. «نۇر وتان» پارتياسىنىڭ مۇشەسى.
2012 جىلدىڭ اقپان ايى مەن 2013 جىلدىڭ ناۋرىز ايى ارالىعىندا ساتباەۆ قالاسىنىڭ اكىمى بولدى. 2013 جىلدىڭ ناۋرىز ايىنان تاعايىنداعان مەرزىمگە دەيىن جەزقازعان قالاسى اكىمىنىڭ ورىنباسارى مىندەتىن اتقاردى.