بۇل ەلەكتروبۋس قازىرگى ۋاقىتتا وبلىس ورتالىعىندا 30 كۇندىك تەستىلەۋدەن وتۋدە. ياعني قىسى قىتىمىر, جازى جايدارى ءارى جاۋىندى كەلەتىن وسكەمەننىڭ اۋا رايىنا توزىمدىلىگى تەكسەرىلىپ جاتىر. ەگەر تاڭسىق كولىك سىناقتان سۇرىنبەي وتسە, توقپەن جۇرەتىن اۆتوبۋس شاھاردا قوعامدىق كولىك رەتىندە پايدالانىلۋى ابدەن مۇمكىن.
وتاندىق عالىمدارىمىزدىڭ قىتاي ماماندارىمەن بىرلەسە جاساعان «Quazar» دەپ اتالاتىن جوعارى تەحنولوگيالى ەلەكتروبۋستارى, بىرىنشىدەن, وسكەمەن سەكىلدى اۋاسى لاستانعان قالا ءۇشىن ەكولوگيالىق تۇرعىدان ءتيىمدى بولسا, ەكىنشىدەن, ديزەلمەن جۇرەتىن قاراپايىم اۆتوبۋستارمەن سالىستىرعاندا بىرنەشە ەسە ۇنەمدى دەيدى ماماندار. فيرما وكىلدەرىنىڭ ايتۋىنشا, قازىر كۇندەلىكتى قولدانىستاعى اۆتوبۋستار كۇنىنە 250 شاقىرىمعا 125 ليتر وتىن جاقسا, ەلەكتروبۋستار ءبىر اۋىسىمدا 189 كۆت ەنەرگيا جۇمسايدى.
ايتپاقشى, وسكەمەنگە «جەرسىندىرىلىپ» جاتقان ەلەكتروبۋس 1 مامىر كۇنى وبلىس اكىمى دانيال احمەتوۆكە تانىستىرىلدى. «بۇل كولىكتەردى ءالى ساتىپ العان جوقپىز. ءوڭىر جولدارىندا ءوزىن قالاي كورسەتەدى, مۇمكىندىگى قانداي, وسىنى ناقتىلاۋ ءۇشىن №44 باعىتتاعى اۆتوبۋستىڭ باعدارىنا جىبەردىك», دەيدى ايماق باسشىسى.
وبلىس اكىمىنىڭ ءباسپاسوز قىزمەتىنىڭ تاراتقان مالىمەتتەرىنە سۇيەنسەك, بۇگىندە وڭىردە قوعامدىق كولىكتەردى جاڭارتۋ جۇمىستارى قارقىندى جۇرگىزىلۋدە. ماسەلەن, جاقىندا سەمەيدە 15 جاڭا اۆتوبۋس جولاۋشىلاردى تاسىمالداۋعا كىرىسىپتى.
ازامات قاسىم, «ەگەمەن قازاقستان»
وسكەمەن