الماتىدا ەلىمىزدەگى ەڭ بايىرعى شىعارماشىلىق وداقتاردىڭ ءبىرى – 85 جىلدىق تاريحى بار قازاقستان سۋرەتشىلەر وداعىنىڭ كەزەكتى ءحVىىى قۇرىلتايى ءوتتى. قازاقستانداعى سۋرەتشىلەر مەن ونەرتانۋشىلاردىڭ باسىن بىرىكتىرەتىن وداقتىڭ 1100 مۇشەسى بار جانە وبلىستاردا 17 بولىمشەسى جۇمىس ىستەيدى. قۇرىلتايدىڭ اشىلۋىنا مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى ءادىل جولامانوۆ قاتىسىپ, ءتورت جىلدا ءبىر رەت وتەتىن ونەر شەبەرلەرىنىڭ ماڭىزدى شاراسىنىڭ جۇمىسىنا ساتتىلىك تىلەدى.
قۇرىلتايدا توراعانىڭ ەسەپ بەرۋىنەن باستاپ, سۋرەتشىلەردىڭ كورمەسىن ۇيىمداستىرۋ, وداقتىڭ قارجىلىق جۇيەسىنە ەسەپ بەرۋ, بۋحگالتەرلىك اۋديت ماسەلەسى, جاڭا سەكرەتاريات قۇرامىن سايلاۋ, وداقتىڭ جاڭا باسقارما توراعاسىن سايلاۋعا دەيىنگى سەگىز ماسەلە كۇن تارتىبىنە قويىلدى. سۋرەتشىلەر وداعى توراعاسىنىڭ مىندەتىن اتقارۋشى ومىربەك جۇبانيازوۆتىڭ جارتى ساعاتقا جوسپارلانعان ەسەپتى بايانداماسىندا بۇگىنگى وداقتىڭ جاي-كۇيى مەن تىنىس-تىرشىلىگى ەگجەي-تەگجەيلى باياندالدى.
بۇگىندە سۋرەتشىلەر وداعى اتىنان مادەنيەت جانە سپورت مينيسترلىگىنە «ونەر سۇحباتى – ديالوگ ونەرى» اتتى حالىقارالىق بەينەلەۋ ونەرىنىڭ فەستيۆالى» جوباسى, 85 جىلدىق مەرەيتويعا بايلانىستى ءىس-شارالار جوباسى جولدانعان. الماتى قالاسىنىڭ اكىمدىگىنە التى جوبا, ونىڭ ەڭ باستىسى, شاھاردىڭ 15 ساياباعىندا ساندىك-ساياباقتىق مۇسىندەردى ورنالاستىرۋدىڭ ديزاين-جوباسى, وداق اۋلاسىندا كورمە زالىن سالۋ, استانا قالاسىنىڭ 20 جىلدىعىنا وراي كەسكىندەمە ونەرى بويىنشا سيمپوزيۋم وتكىزۋ جوباسى قاراۋعا جىبەرىلگەن. سونداي-اق وداق جانىنان جاستار بىرلەستىگى قۇرىلعان. ماسكەۋدىڭ حالىقارالىق كونفەدەراتسيا باسپاسىنان «قازاقستاننىڭ بەينەلەۋ ونەرى», «ەركىن مەرگەنوۆ» جانە «دۋلات اليەۆ» اتتى ءۇش يلليۋستراتسيالىق البوم باسىلىپ شىقتى. سۋرەتشى ءۇشىن ماڭىزدى سانالاتىن مۇنداي البوم مەن كاتالوگتىڭ 19-ى ءوز ەلىمىزدەگى باسپالاردان دا جارىق كورگەن. سۋرەتشىلەر وداعى عىلىمي-رۋحاني ورتالىققا اينالدىرۋ ماقساتىندا ۇيىمداستىرىلعان استاناداعى ۇلتتىق مۋزەي قورىن جاساقتاۋعا دا كوپ جاردەم بەرىپ, قازاق حالقىنىڭ تاريحى مەن تانىمىن ايشىقتايتىن تۋىندىلاردى تارتۋ ەتتى. ءا.قاستەەۆ اتىنداعى مەملەكەتتىك ونەر مۇراجايىمەن, استاناداعى قارۋلى كۇشتەر مۋزەيىمەن, الماتىداعى قارۋلى كۇشتەر مۋزەيىمەن, وقۋشىلار سارايىمەن جانە تاۋەلسىز مارتەبەسى بار بارلىق زاڭدى تۇلعالارمەن بىرلەسىپ جۇمىس ىستەۋ تۋرالى شارتتار جاسالعان. بىرقاتار سۋرەتشىلەر تاراپىنان داۋ تۋعىزعان قابانباي باتىر كوشەسىندەگى شەبەرحانالاردىڭ تەحنيكالىق پاسپورتى مەن پايدالانۋعا ەنگىزۋ اكتىسى بۇگىندە تولىقتاي دايىندالعان.
باسىنان داۋ-داماي, تالاس-تارتىس ارىلمايتىن شىرعالاڭى مول شىعارماشىلىق وداقتاردىڭ اراسىنان سۋرەتشىلەر وداعىنىڭ دا توبەسىنىڭ «شوقتانا» كورىنەتىنى بارىنە بەلگىلى شىندىق. توراعانى سايلاۋ توڭىرەگىنەن تۋىندايتىن تارتىس تا كوپ جاعدايدا ءدال وسى وداققا ءتان. سوندىقتان التىباقان الاۋىزدىققا ەمەس, بىرلىككە, تاتۋلىققا شاقىرعان ءسوز بۇل جيىندا دا ايتىلدى. قۇرىلتايعا جيىلعان ونەر قايراتكەرلەرى, ەندى قالىپتاسىپ كەلە جاتقان ەركىن وي يەلەرى وسى قاعيدامەن كەلىسكەنى بولار, ۇسىنىلعان ءۇش ۇمىتكەردىڭ ىشىنەن ءبىر جىلدان اسا «وداق توراعاسىنىڭ مىندەتىن اتقارۋشى» بولىپ كەلە جاتقان قازاقستاننىڭ ەڭبەك سىڭىرگەن قايراتكەرى ومىربەك ءجۇبانيازوۆتى قازاقستان سۋرەتشىلەر وداعىنىڭ باسقارما توراعاسى ەتىپ سايلاۋعا ءبىر اۋىزدان ءپاتۋالاستى.
ايگۇل احانبايقىزى,
«ەگەمەن قازاقستان»
الماتى